Ipakita ang Kristohanong Pagkamaunongon Kon Adunay Paryente nga Napalagpot
1. Unsang kahimtang nga mahimong magsulay sa pagkamaunongon sa usa ka Kristohanon?
1 Ang bugkos tali sa mga membro sa pamilya mahimong lig-on kaayo. Kini magdalag pagsulay sa usa ka Kristohanon sa dihang ang kapikas sa kaminyoon, anak, ginikanan, o laing suod nga paryente napalagpot o nagdis-asosyet sa iyang kaugalingon gikan sa kongregasyon. (Mat. 10:37) Sa unsang paagi trataron sa maunongong mga Kristohanon ang maong paryente? Lahi ba ang pagtratar kon ang tawo nagpuyo sa inyong panimalay? Una, atong sublion kon unsay giingon sa Bibliya bahin niining ulohana, ang mga prinsipyo nga mapadapat usab niadtong napalagpot o nagdis-asosyet sa ilang kaugalingon.
2. Sumala sa Bibliya, sa unsang paagi trataron sa mga Kristohanon kadtong napalagpot gikan sa kongregasyon?
2 Kon Unsaon Pagtratar sa mga Napalagpot: Ang Pulong sa Diyos nagsugo sa mga Kristohanon nga dili makig-uban sa usa ka tawo nga napalagpot gikan sa kongregasyon: ‘Hunong na sa pagpakig-uban kang bisan kinsa nga gitawag ug igsoon nga usa ka makihilawason o tawong dalo o tigsimbag idolo o tigsultig pasipala o palahubog o mangingilkil, dili gani mokaon uban sa maong tawo. . . . Kuhaa ang tawong daotan gikan sa inyong taliwala.’ (1 Cor. 5:11, 13) Ang mga pulong ni Jesus nga narekord sa Mateo 18:17 naghisgot usab maylabot niana: “Isipa [ang gipalagpot] nga sama sa tawo sa mga nasod ug ingon nga usa ka maniningil ug buhis.” Nahibalo pag-ayo ang mga naminaw kang Jesus nga ang mga Hudiyo niadtong mga adlawa wala makig-uban sa mga Hentil ug ilang gilikayan ang mga maniningil ug buhis ingong mga sinalikway sa katilingban. Busa si Jesus nagtudlo sa iyang mga sumusunod nga dili makig-uban sa mga napalagpot.—Tan-awa Ang Bantayanang Torre sa Marso 15, 1982, mga panid 12-14 (Septiyembre 15, 1981, mga panid 18-20 sa Ingles).
3, 4. Unsang matanga sa pagpakig-uban ang gidili uban sa napalagpot ug nadis-asosyet nga mga tawo?
3 Kini nagkahulogan nga ang matinumanong mga Kristohanon walay espirituwal nga pagpakig-uban kang bisan kinsa nga napalagpot gikan sa kongregasyon. Apan labaw pa ang nalangkit. Ang Pulong sa Diyos nag-ingon nga kita kinahanglang ‘dili gani makigpangaon uban sa maong tawo.’ (1 Cor. 5:11) Busa, likayan usab nato ang sosyal nga pagpakig-uban sa napalagpot nga tawo. Dili siya paubanon sa piknik, salosalo, dula, o pagpanuroy sa katindahanan o sinehan o makigpangaon kaniya diha sa balay o sa restawran.
4 Komosta man ang pagpakigsulti sa napalagpot nga tawo? Bisan tuod wala maghisgot ang Bibliya sa tanang posibleng situwasyon, ang 2 Juan 10 nagtabang kanato sa pagsabot sa panglantaw ni Jehova sa mga butang: “Kon adunay moanha kaninyo ug wala magdala niini nga pagtulon-an, ayaw gayod siya pasak-a sa inyong mga balay o mangomosta kaniya.” Nagkomento bahin niini, Ang Bantayanang Torre sa Marso 15, 1982, mga panid 18-20 (Septiyembre 15, 1981, panid 25 sa Ingles), nag-ingon: “Ang usa ka yanong ‘Hello’ sa usa ka tawo maoy unang lakang nga maugmad ang panagkolokabildo ug malagmit pa ngani panaghigalaay. Buot ba natong buhaton kanang unang lakang uban sa tawong gipalagpot?”
5. Sa dihang mapalagpot, unsay mawala sa usa ka tawo?
5 Sa pagkatinuod, sama gayod kini sa giingon sa mga panid 26-7 (panid 31 sa Ingles) sa samang gula sa Ang Bantayanang Torre: “Ang kamatuoran mao nga kon itugyan sa Kristohanon ang iyang kaugalingon sa pagpakasala ug kinahanglang palagpoton, dako gayod ang mawala kaniya: ang iyang inuyonang baroganan atubangan sa Diyos; . . . matam-is nga panag-uban sa mga igsoon, lakip sa mga asosasyon uban sa iyang Kristohanong mga paryente.”
6. Kinahanglan bang putlon sa usa ka Kristohanon ang tanang pakiglabot sa usa ka napalagpot nga paryente nga nagpuyo sa mao rang panimalay? Ipatin-aw.
6 Sakop sa Kaugalingong Panimalay: Nagkahulogan ba kini nga ang mga Kristohanon nga nagpuyo sa samang panimalay uban sa napalagpot nga membro sa pamilya dili na makigsulti, makigpangaon, ug makig-uban sa maong tawo sama sa ilang naandan nga buhaton adlaw-adlaw? Ang Bantayanang Torre sa Abril 15, 1991, sa potnot sa panid 22, nag-ingon: “Kon adunay gipalagpot nga paryente diha sa Kristohanong panimalay, kana siya bahin gihapon sa normal, adlaw-adlaw nga pakiglabot ug mga kalihokan sa pamilya.” Busa, ang mga membro sa pamilya mao na ang mag-igo sa gidak-on nga mahimong iuban ang napalagpot nga membro sa pamilya sa dihang mokaon o moduyog sa ubang mga kalihokan sa panimalay. Ug bisan pa niana, sila dili buot mohatag ug impresyon ngadto sa mga igsoon nga ilang gipakig-ubanan nga ang tanang butang sama ra gihapon sa wala pa mahitabo ang pagpalagpot.
7. Sa unsang paagi mausab ang espirituwal nga panag-uban diha sa panimalay kon ang usa ka membro sa pamilya napalagpot?
7 Hinuon, Ang Bantayanang Torre sa Marso 15, 1982, mga panid 22-23 (Septiyembre 15, 1981, panid 28 sa Ingles), nagpunting mahitungod sa napalagpot o nadis-asosyet nga tawo: “Ang kanhing espirituwal nga higot bug-os nga nabugto. Matuod usab kini bisan diha sa iyang mga paryente, lakip kadtong sakop sa iyang kaugalingong pamilya. . . . Nagpasabot kana ug kausaban sa espirituwal nga panag-uban nga malagmit naglungtad diha sa panimalay. Pananglitan, kon ang bana gipalagpot, ang iyang asawa ug kabataan dili mahimutang kaniya nga magdumalag pagtuon sa Bibliya sa pamilya o mangulo sa pagbasa sa Bibliya ug pag-ampo. Kon gusto siyang mag-ampo, sama sa panahon sa pangaon, may katungod siya sa pag-ampo sa iyang kaugalingong balay. Apan sila makahimo sa pag-ampo sa ilang kaugalingon sa hilom ngadto sa Diyos. (Prov. 28:9; Sal. 119:145, 146) Apan unsa na man kon ang usa ka tawong gipalagpot diha sa panimalay buot motambong sa panahon nga ang pamilya magbasa o magtuon sa Bibliya? Seguro motugot ang uban nga motambong siya aron sa pagpamati basta dili lang siya mosulay sa pagtudlo kanila o sa pagpaambit sa iyang relihiyosong mga opinyon.”
8. Unsa ang responsabilidad sa Kristohanong mga ginikanan ngadto sa napalagpot nga menor-de-edad nga anak nga nagpuyo sa balay?
8 Kon usa ka menor-de-edad nga anak nga nagpuyo sa balay napalagpot, ang Kristohanong mga ginikanan mao gihapon ang responsable sa pagmatuto kaniya. Ang Bantayanang Torre sa Nobyembre 15, 1988, panid 20, nag-ingon: “Sama nga magpadayon sila sa pagtagana kaniya ug pagkaon, sapot, ug puloy-anan, kinahanglang ilang tudloan ug disiplinahon siya sumala sa Pulong sa Diyos. (Proverbio 6:20-22; 29:17) Ang mahigugmaong mga ginikanan mahimong makahikay sa paghimog pagtuon sa Bibliya sa balay uban kaniya, bisan pa ug napalagpot siya. Tingali makakuha siya sa labing makatul-id nga kaayohan gikan sa ilang pagtuon kaniya nga siya rang usa. O kaha sila mohukom nga siya makahimo sa pagpakigbahin sa kahikayan sa pagtuon sa pamilya.”—Tan-awa usab Ang Bantayanang Torre sa Oktubre 1, 2001, mga panid 16-17.
9. Ngadto sa unsang gidak-on angayng makiglabot ang usa ka Kristohanon uban sa napalagpot nga paryente nga nagpuyo sa gawas sa balay?
9 Mga Paryente nga Wala Magpuyo sa Samang Balay: “Lahi ang situwasyon kon ang tawong napalagpot o nadis-asosyet maoy usa ka paryente nga nagpuyo sa gawas sa suod nga sirkulo sa pamilya ug balay,” nag-ingon Ang Bantayanang Torre sa Abril 15, 1988, panid 28. “Tingali posibleng dili na makigkita pa sa paryente. Bisan kon adunay pila ka butang sa pamilya nga nagkinahanglag panagkita, kini angay limitahan,” sibo sa sugo sa Diyos nga “mohunong na sa pagpakig-uban kang bisan kinsa” nga nakasala nga dili mahinulsolon. (1 Cor. 5:11) Ang maunongong mga Kristohanon angayng maningkamot sa paglikay sa wala kinahanglanang pagpakig-uban sa maong paryente, bisan gani ang mga pakiglabot sa negosyo kinahanglang menosan.—Tan-awa usab Ang Bantayanang Torre sa Marso 15, 1982, mga panid 24-5 (Septiyembre 15, 1981, mga panid 29-30 sa Ingles).
10, 11. Unsay tagdon sa usa ka Kristohanon sa dili pa modawat pag-usab sa napalagpot nga paryente ngadto sa iyang panimalay?
10 Ang Bantayanang Torre nagpunting sa atong pagtagad sa lain pang kahimtang nga mahimong mobangon: “Unsa na man kon ang sakop sa iyang kaugalingong pamilya anak ba kaha o ginikanan nga wala na magpuyo sa balay, unya napalagpot ug sa ulahi niini buot mobalik sa pagpuyo didto? Ang pamilya ang mohukom kon unsay angay buhaton depende sa situwasyon. Pananglitan, tingalig nagmasakiton ang usa ka gipalagpot nga ginikanan o kaha dili na makasugakod sa pag-atiman sa iyang kaugalingon sa pinansiyal o sa pisikal. Ang Kristohanong kabataan adunay Kasulatanhon ug moral nga obligasyon sa pagtabang. (1 Tim. 5:8) . . . Ang buhaton nagadepende sa mga butang sama sa tinuod nga panginahanglan sa ginikanan, ang iyang kaisipan ug ang paglantaw sa ulo sa panimalay alang sa espirituwal nga kaayohan sa panimalay.”—Ang Bantayanang Torre sa Marso 15, 1982, panid 23 (Septiyembre 15, 1981, mga panid 28-9 sa Ingles).
11 Alang sa usa ka anak, ang samang artikulo mipadayon: “Usahay mahimong dawaton sa mga ginikanan ang batang napalagpot sa ilang panimalay nga nagmasakiton sa pisikal o sa emosyonal. Apan sa matag kahimtang maayong timbangtimbangon una sa ginikanan ang indibiduwal nga mga sirkumstansiya. Ang gipalagpot ba nga anak nagkinabuhi na sa iyang kaugalingon, ug siya ba karon dili na makasugakod nga mag-inusara? O gusto ba lamang niyang mobalik tungod kay makapasayon kini sa iyang kinabuhi? Unsa na man ang iyang moral ug ang iyang tinamdan? Siya ba magdalag ‘lebadura’ diha sa panimalay?—Gal. 5:9.”
12. Unsa ang pipila ka kaayohan sa kahikayan sa pagpalagpot?
12 Mga Kaayohan sa Pagkamaunongon Ngadto Kang Jehova: Makaayo man ang pagkooperar sa Kasulatanhong kahikayan sa pagpalagpot ug pagsalikway sa di-mahinulsolong mga makasasala. Kini maghupot sa kahinlo sa kongregasyon ug magpalahi kanato ingong mga tigpaluyo sa hataas nga mga sukdanan sa Bibliya sa moral. (1 Ped. 1:14-16) Kini magpanalipod kanato gikan sa makadaot nga mga impluwensiya. (Gal. 5:7-9) Maghatag usab kinig kahigayonan sa makasasala nga mapahimuslan sa bug-os ang nadawat nga disiplina, nga makatabang kaniya sa pagpatunghag “madaitong bunga, nga mao, ang pagkamatarong.”—Heb. 12:11.
13. Unsang kausaban ang gihimo sa usa ka pamilya, ug uban sa unsang resulta?
13 Human makapatalinghog sa pakigpulong didto sa usa ka sirkitong asembliya, naamgohan sa usa ka igsoong lalaki ug sa iyang igsoong babaye nga kinahanglan silang mohimog mga kausaban sa ilang paagi sa pagtratar sa ilang inahan, kinsa nagpuyo sa laing lugar ug napalagpot sulod na sa unom ka tuig. Dihadiha human sa asembliya, ang maong lalaki mitawag sa iyang inahan, ug human mapasaligi siya sa ilang gugma, siya mipatin-aw nga dili na sila makig-estorya kaniya gawas lang kon dunay importanteng pamilyahanong mga butang nga kinahanglan siyang kontakon. Wala madugay human niadto, ang iyang inahan misugod sa pagtambong sa mga tigom ug sa ngadtongadto napasig-uli. Gawas pa, ang iyang di-magtutuong bana nagsugod sa pagtuon ug sa kapulihay nabawtismohan.
14. Nganong angay natong maunongong paluyohan ang kahikayan sa pagpalagpot?
14 Ang maunongong pagpaluyo sa kahikayan sa pagpalagpot nga gilatid sa Kasulatan nagpasundayag sa atong gugma kang Jehova ug naghatag ug tubag ngadto sa usa nga nagtamay Kaniya. (Prov. 27:11) Sa baylo, kita makasalig sa panalangin ni Jehova. Si Haring David misulat bahin kang Jehova: “Kon bahin sa iyang mga lagda, ako dili motipas gikan kanila. Sa maunongon ikaw magmaunongon.”—2 Sam. 22:23, 26.