Madasigong Pag-agda nga Sundon ang Warning Examples for Our Day
Kitang tanan makapalig-on sa atong determinasyon nga huptan ang atong integridad pinaagi sa pagpadapat sa mga leksiyon nga nakat-onan gikan sa drama sa Bibliya nga gipakita sa video nga Warning Examples for Our Day. Sa dili pa tan-awon kana, palihog basaha ang Numeros kapitulo 25 ug ang nalangkit nga materyal diha sa Insight on the Scriptures, Tomo 2, panid 419, mga parapo 3-5. Dayon tubaga kining mga pangutanaha: Kinsa ang mga Moabihanon, ug nganong giingnan ni Jehova si Moises nga dili makiggubat batok kanila? (Deut. 2:9) Sa unsang paagi gilaraw ni Balaam nga gamiton ang mga Moabihanon sa paglaglag sa nasod sa Israel? Nganong dili nato angayng kalimtan nga daghang Israelinhon ang napakyas sa usa ka hinungdanong pagsulay sa wala pa mosulod sa Yutang Saad?—1 Cor. 10:11, 12.
Samtang nagtan-aw sa video nga Warning Examples, hunahunaa ang mosunod nga upat ka bahin sa kinabuhi nga kinahanglan natong hatagan ug ugdang nga pagtagad karong adlawa kon buot natong mapamatud-ang matinumanon ug maangkon ang pag-uyon sa Diyos. (1) Tinamdan: Sa unsang paagi ang pipila ka Israelinhon nagpakitag sayop nga tinamdan ngadto kang Jehova ug sa iyang mga kahikayan? Sa kasukwahi, unsang tinamdan ang angay natong paningkamotang ipakita? (2) Mga Kauban: Nganong dili buot ni Jehova nga makighigala ang mga Israelinhon uban sa mga Moabihanon? (Ex. 34:12; Prov. 13:20) Nganong kinahanglang maalamon natong pilion ang atong mga higala? (3) Panggawi: Ngadto sa unsang seryosong sala nga ang daotang mga kauban nagdaldal sa duolag 23,000 ka Israelinhon? (1 Cor. 10:8) Karong adlawa, unsay nakadani sa pipila sa katawhan sa Diyos nga makahimog imoralidad, apan unsaon nato pagpanalipod ang atong kaugalingon? (4) Pagsimba: Sa unsang paagi gisulayan ang mga Israelinhon maylabot sa kaputli sa ilang pagsimba? Ngadto sa unsang malinglahong matang sa idolatriya nga mahimong monunot ang pipila karong adlawa, apan unsaon nato paglikay niana?—Col. 3:5.
Diha sa drama, sa unsang paagi gigantihan si Jamin tungod sa iyang moral nga integridad? Pinaagi niini nga video, unsang madasigong pag-agda ang gihimo sa Nagamandong Lawas ngadto sa tanang matuod nga mga Kristohanon? Kon ikaw usa ka ulo sa pamilya, nganong gibati mong maalamon alang sa imong panimalay nga sublisublion pagtan-aw kining salidaha?