Pangutana

◼ Kanus-a angayng tukoron ang usa ka grupo nga langyaw ug pinulongan?

Sa dihang ang teritoryo sa kongregasyon gilangkoban ug dakodakong populasyon sa mga tawo nga nagsultig langyawng pinulongan, angayng organisahon sa mga ansiyano ang pagsangyaw aron matabangan ang mga tawo nga nagsulti sa maong pinulongan. (km 7/02 p. 1) Malagmit nga ang komunidad nga nagsultig langyawng pinulongan nakatag pag-ayo sa tibuok teritoryo sa duha o kapin pa ka dug-ol nga mga kongregasyon. Sa maong kaso, ang (mga) magtatan-aw sa sirkito motaganag gikinahanglang pagtultol, sa ingon nagatabang sa nalangkit nga mga kongregasyon nga mokooperar sa pagsangyaw. Matag karon ug unya, mahimong dumalahon ang usa ka pakigpulong publiko o Pagtuon sa Bantayanang Torre aron matino ang gidaghanon sa tumatambong diha sa mga tigom sa langyawng pinulongan.

Ang usa ka langyawg-pinulongan nga grupo mahimong tukoron kon makab-ot ang mosunod nga mga kinahanglanon: (1) Dunay mga magmamantala o interesadong mga tawo nga makasabot pag-ayo sa maayong balita diha sa langyawng pinulongan. (2) Dunay takos nga ansiyano o ministeryal nga alagad nga makapanguna ug makadumala ug labing menos usa ka senemanang tigom. (3) Dunay lawas sa mga ansiyano nga andam mopaluyo sa maong grupo. Sa dihang makab-ot na kining maong mga kinahanglanon, kinahanglang pahibaloon sa mga ansiyano ang sangang buhatan aron opisyal nga maila ang maong grupo ug ikahatag ang dugang nga mga instruksiyon.

Ang kadaghanang grupo nagsugod pinaagi sa pagdumala ug Pagtuon sa Libro sa Kongregasyon matag semana. Sa ulahi, mahimong aprobahan sa mga ansiyano nga dugangan ug uban pang mga tigom, sama sa Miting Publiko ug ang Pagtuon sa Bantayanang Torre. Ang mga Asaynment Num. 2, 3, ug 4 sa Teokratikanhong Tunghaan sa Ministeryo mahimong ipresentar diha sa laing lawak klasehanan kon may takos nga ansiyano o ministeryal nga alagad nga makasulti sa maong pinulongan nga makaalagad ingong magtatambag. Hinunoa, ang maong grupo moduyog sa kongregasyon alang sa nagatudlong pakigpulong, mga haylayt sa Bibliya, ug Tigom sa Pag-alagad. Ang mga tigom sa dayon nga pagsangyaw mahimong hikayon usab alang sa grupo.

Ang tanan diha sa grupo magpasakop sa pagdumala sa lawas sa mga ansiyano. Kinahanglang itagana sa mga ansiyano ang timbang nga direksiyon ug ipakita ang tiunayng interes sa pag-atiman sa mga panginahanglan sa maong grupo. Sa dihang moduaw ang magtatan-aw sa sirkito sa nagpaluyo nga kongregasyon, iyang hikayon usab nga makasangyaw duyog sa maong grupo aron mapalig-on kini sa espirituwal. Uban sa panalangin ni Jehova, ang langyawg-pinulongan nga grupo mahimong usa ka kongregasyon sa ngadtongadto.