“Magahatag ug Luna Niini”
1 Usa ka higayon, sa dihang nakig-estorya sa iyang mga tinun-an bahin sa kaminyoon, si Jesus nagtumong sa pagkatagsaanon ingong ‘usa ka gasa.’ Dayon siya miingon: “Siya nga makahatag ug luna alang niini magahatag ug luna niini.” (Mat. 19:10-12) Pipila ka tuig sa ulahi, si apostol Pablo nagsulat bahin sa mga bentaha sa pagkatagsaanon ug nagdasig sa uban sa pagsunod sa iyang panig-ingnan nga magpabiling dili minyo. (1 Cor. 7:7, 38) Daghan karong panahona ang ‘naghatag ug luna’ sa pagkatagsaanon ug nakapahimulos sa mga bentaha niini. Unsa ang pipila sa maong mga bentaha?
2 Pag-alagad nga “Walay Pagkalinga”: Nasabtan ni Pablo nga ang pagkatagsaanon naghatag kaniyag kahigayonan sa pag-alagad kang Jehova nga “walay pagkalinga.” Sa susama karong adlawa, ang usa ka tagsaanong igsoong lalaki makaaplay sa Ministerial Training School, ug ang dili minyong tawo sagad mas gawasnon sa pagsulod sa payunir nga buluhaton, pagkat-on ug laing pinulongan, pagbalhin sa dapit diin mas dako ang panginahanglan, pag-alagad sa Bethel, o sa pagkahimong andam alang sa uban pang linaing mga pribilehiyo sa pag-alagad. Siya hayan dunay mas dakong panahon ug mga kahigayonan sa paghimog dulot personal nga pagtuon ug pagpamalandong ug sa pagpakigsulti kang Jehova diha sa kinasingkasing nga pag-ampo. Ang dili minyong tawo sagad may dakong panahon nga magugol sa pagtabang sa uban. Ang tanan sa maong kalihokan maoy alang sa “kaugalingong kaayohan” sa usa.—1 Cor. 7:32-35; Buh. 20:35.
3 Ang maong walay babag nga pag-alagad sa Diyos maghatag ug dagayang mga panalangin. Human sa 27 ka tuig sa Kenya, usa ka tagsaanong sister misulat: “Adunay daghan kaayong mga higala ug daghang trabaho! Nagtambayayongay mi sa pagbuhat sa mga butang [ug] nagduaway sa usag usa. . . . Nakaarang ako sa paggamit sa ekstrang kagawasan ug kamapailin-ilinon nga ikahatag sa pagkatagsaanon aron magpabiling puliki diha sa ministeryo, ug kini naghatag kanako ug dakong kalipay.” Siya midugang: “Latas sa katuigan mas nasuod ako kang Jehova.”
4 Hustong Paggamit sa Gasa sa Pagkatagsaanon: Si Jesus nag-ingon nga ang angayng motibo sa pag-ugmad sa gasa sa pagkatagsaanon maoy “tungod sa gingharian sa mga langit.” (Mat. 19:12) Sama sa uban pang mga gasa, ang pagkatagsaanon angayng gamiton sa hustong paagi aron makahatag ug kalipay ug mga kaayohan. Pinaagi sa pagpahimulos sa mga kahigayonan nga ikahatag sa pagkatagsaanon ug sa pagsalig kang Jehova alang sa kaalam ug kusog, nasabtan sa daghang dili minyo nga mga tawo ang bili sa pagdawat sa gasa sa pagkatagsaanon.