Ang Hunahuna sa Bibliya
Sa Dihang ang Pagkatagsaanon Maoy Usa ka Gasa
‘AKO nagmamingawon,’ mimulo ang usa ka Kristohanong babaye nga nabiyuda sulod sa daghang katuigan. ‘Ako nangandoy ug usa ka kapikas. Ang pagkapuliki kanunay makatabang. Ang pagbaton ug mga higala makatabang. Apan buot kong magminyo.’
Sa dihang ikaw sinserong nagtinguha nga magminyo apan ang imong pagpangita sa usa ka kapikas dili malamposon, ang pagkatagsaanon daw dili usa ka gasa—daw bation gani nimo nga ikaw gihukmang mabilanggo sa negatibong mga emosyon nga nagpahimo kanimong lapoy ug magul-anon. O kon aduna ka nay kaugalingong pamilya apan tagsaanon, hayan anaa nimo ang bugtong responsabilidad sa pagtagana sa tanang panginahanglan sa imong mga anak.
Busa, dili tingali nimo isipon ang imong pagkatagsaanon ingong usa ka gasa. Hinunoa, ang uban nag-isip sa pagkatagsaanon ingong usa ka butang nga bililhon kaayo, ug gipalabi nila nga mag-inusara sa kinabuhi. Busa ang pagkatagsaanon ba usa ka gasa, ug kon mao, kanus-a ug ngano? Unsay giingon sa Bibliya?
Babag sa Kalipay?
Ang kaminyoon mahimong usa ka tuboran sa dakong kalipay. (Proverbio 5:18, 19) Ang pipila “nakombinsir nga ang kaminyoon mao lamang ang paagi sa pagbaton ug kalipay ug katagbawan,” mipahayag ang Los Angeles Times. Ang kaminyoon ba mao ang bugtong paagi sa pagbaton ug kalipay?
Usa ka propesyonal sa mental nga kahimsog, si Ruth Luban, miingon, sumala sa Los Angeles Times: “Ang mga babaye [ug mga lalaki] mahibulong kon unsa ka dakong katagbawan ang ilang makaplagan sa dihang sila mohunong sa pagkinabuhi ug makapatagbawng kinabuhi sa paglaom nga ang usa ka lalaki [o babaye] magluwas kanila gikan sa kinabuhing tagsaanon.” Oo, ang pagkatagsaanon dili babag sa pagkab-ot ug usa ka malipayon, makapatagbawng kinabuhi. Daghang diborsiyadong tawo ang mosugid nga ang kaminyoon dili sa awtomatiko usa ka dalan sa kalipay. Ang tinuod nga kalipay mao ang sangpotanan sa usa ka maayong relasyon uban sa Diyos. Busa, ang usa ka Kristohanon mahimong malipayon tagsaanon man o minyo.—Salmo 84:12; 119:1, 2.
Gawas pa sa paghisgot sa gipahinabo-sa-kaugalingong mga kababagan, si Marie Edwards ug Eleanor Hoover, diha sa ilang librong The Challenge of Being Single, nagpamatikod sa magbabasa sa laing posibleng babag sa kalipay—pagpit-os sa mga tawo. Sila nag-ingon nga ang “pagtuo mao nga kon ikaw dili minyo ikaw nagaantos sa dulot, mangiob, emosyonal nga sakit. . . . Seguradong may deperensiya ka.”
Bisan ang maayog-tuyo nga mga higala mahimong dili-tinuyong makapabug-at pag-ayo sa mga tagsaanon pinaagi sa pagsigeg pangutana, ‘Kanus-a ka man magminyo?’ o, ‘Nganong ang usa ka ambongang lalaki sama kanimo wala pa makakaplag ug asawa?’ Bisan tuod ang mga komento nga sama niini mahimong kinomedya lang, kini tingali ‘molagbas sama sa espada,” nga moresulta sa kahiubos o kaulaw.—Proverbio 12:18.
Gasa sa Matag Usa
Si apostol Pablo dili minyo sa panahon nga siya nagbiyahe ingong misyonaryo. Tungod ba kini kay supak siya sa kaminyoon? Dili gayod. Si apostol Pablo maoy tagsaanon tungod kay gipili niya nga magpabiling dili minyo “alang sa maayong balita.”—1 Corinto 7:7; 9:23.
Si Pablo adunay gahom sa paglikay sa kaminyoon, bisan pa niana iyang giila nga dili tanan ang mahisama kaniya. Siya miingon: “Ang matag usa adunay iyang kaugalingong gasa gikan sa Diyos, ang usa niining paagiha, ug ang lain nianang paagiha.”—1 Corinto 7:7.
Ang pagkatagsaanon mahimong usa ka dalan sa kalipay, bisan tuod dili kini mao ang dalan nga imong giplanong subayon. Sa pagkatinuod, ang kaminyoon nalakip taliwala sa daghang gasa nga nadawat gikan kang Jehova. Apan ang Bibliya nagpakita nga ang pagkatagsaanon mahimo usab nga usa ka “gasa”—kon ikaw “makahatag ug luna niini.” (Mateo 19:11, 12; 1 Corinto 7:36-39) Nan, unsa ang mga benepisyo sa pagkatagsaanon?
Si Pablo nag-ingon nga ang mga minyo mabalak-on sa “pag-uyon” sa ilang mga kapikas, samtang ang mga dili minyo “mabalak-on sa mga butang sa Ginoo.” Kini nagpasiugda sa usa sa dagkong mga benepisyo sa pagkatagsaanon—ang kahigayonan nga mag-alagad kang Jehova nga “walay pagkalinga.”—1 Corinto 7:32-35.
Ang Bibliya wala mag-ingon nga ang usa ka tagsaanon magkinabuhi nga wala gayoy mga linga. Apan, ang usa ka tawo nga nag-inusara pagpuyo kasagaran mas diyutay ug mga linga kay sa usa nga nag-atiman sa usa ka pamilya, sanglit siya lamang maoy tagdon sa dihang siya mohimog desisyon. Pananglitan, sa dihang gisugo sa Diyos si Abraham nga mobiya sa Haran ug mobalhin ngadto sa yuta sa Canaan, ang Bibliya nag-ingon: “Gidala ni Abram si Sarai nga iyang asawa ug si Lot nga anak sa iyang igsoong lalaki ug ang tanang manggad nga ilang nahipos ug ang mga kalag nga ilang natigom sa Haran, ug nanglakaw sila.” (Genesis 12:5) Bisan tuod ang kahimtang sa pamilya ni Abraham wala magpugong kaniya, walay duhaduha naggugol siyag igoigong panahon sa pag-organisar sa iyang panimalay alang sa maong misyon.
Itandi ang pagbalhin ni Abraham nianang kang apostol Pablo. Samtang si Pablo ug Silas nagsangyaw sa maayong balita didto sa siyudad sa Tesalonica, ang usa ka masuk-anong panon naghiusa batok kanila. Niadtong samang gabii, ang mga igsoon nagpadala dayon kang Pablo ug Silas sa Berea. Sa laing okasyon, didto sa Troas, si Pablo nakadawat ug usa ka panan-awon nga ‘motabok ngadto sa Macedonia ug tabangan [sila].’ Karon sa dihang iyang nakita ang panan-awon, miadto siya sa Macedonia. Dayag, ang pagkawalay-asawa ni Pablo nagtugot ug mas dakong kagawasan sa paglihok sulod sa mubong yugto sa panahon, usa ka butang nga labi pang malisod kon may pamilya.—Buhat 16:8-10; 17:1-15.
Ang laing kaayohan nga itagana sa pagkatagsaanon mao ang mas dakong kagawasan sa personal nga pagpili. Sa dihang ikaw magkinabuhing mag-inusara, ang paghukom kon asa mopuyo, kon unsa ang kaonon o kanus-a mokaon, o bisan gani ang panahon nga matulog sagad nga mas sayon. Kining maong kagawasan naglakip usab sa espirituwal nga mga kalihokan. Mas daghang panahon ang ikagugol sa personal nga pagtuon sa Pulong sa Diyos, sa pagpakig-ambit sa publikong ministeryo, ug sa pagpahimulos sa mga kahigayonan nga makatabang sa ubang mga tawo.
Busa, kon ikaw tagsaanon tungod kay buot nimo o tungod sa mga sirkumstansiya, magmadeterminado nga gamitong maalamon ang imong panahon. Ikaw makabaton ug mas malipayong kinabuhi sa dihang ang imong pagkatagsaanon ginagugol sa pagtabang sa uban. (Buhat 20:35) Kon buot kang magminyo, ayawg bilanggoa ang imong kaugalingon sa negatibong mga pagbati o magkinabuhi nga daw may nakulang kanimo tungod kay kanang ‘espesyal nga tawo’ wala pa moabot sa imong kinabuhi. Magmapuliki kanunay diha sa pag-alagad sa Diyos, ug sumala sa giingon ni Pablo, hayan makaplagan nimo nga ang pagkatagsaanon maoy usa ka gasa.