Mga Batan-on Nangutana . . .

Nganong Ania Kanako Kining mga Pagbatia?

“Gibati ko nga dunay gibugnong gubat sa sulod nako. Wala ako masayod kon asa mangitag tabang.”​—Bob.

DAGHANG batan-on ang nagaantos ug susamang kasakit sa hunahuna. Dili sama sa ilang mga katalirongan nga dayag interesado kaayo sa kaatbang nga sekso, ilang nakaplagan nga maibog sila sa mga membro sa ilang kaugalingong sekso. Alang sa daghan, usa kini ka makapaguol nga kaamgohan.

Usa ka babaye misugilon bahin sa iyang anak nga babaye: “Misugod pagkadaot ang iyang panglawas, dili makakaon o makatulog, ug nagluya ug nahimong sapoton. Misulay pa gani siya pagtubok.” Ang dakong hinungdan niining suliran? “Duna siyay mga pagbati sa usa ka Lesbiyan.” Alang sa pipila mahimong dili sayon nga pukgoon ang maong mga kiling. “Sa dihang wala pa ako magtin-edyer,” tug-an sa usa ka batan-ong lalaki nga atong tawgon ug Mark, “Misugod ako ug binayot kauban sa akong mga higala. Gipadayon nako kini hangtod sa pagkatin-edyer hangtod misugod ako ug tuon sa Bibliya uban sa mga Saksi ni Jehova. Apan usahay duna gihapon akoy daotang mga pagbati nga nagpahipi sa akong kahiladman.”

Unsay nagpahinabo sa usa ka batan-on nga maibog sa iyang kasekso? Ug unsay angay buhaton sa usa ka batan-on kon siya nasamok sa maong mga pagbati?

Kinaiyanhon o Gimatutong Kiling?

Karon popular na ang moingon nga ang mga homoseksuwal natawo sa maong paagi ug nga ang seksuwal nga kiling dili na mausab. Pananglitan, ang magasing Time tin-aw nga mipahayag: “Usa ka bag-ong pagtuon nagasugyot nga dunay kalainan sa gambalay tali sa mga utok sa homoseksuwal ug sa heteroseksuwal nga mga lalaki.” Ugaling, kining maong pagtuon gihimo diha sa mga utok sa mga lalaki nga namatay sa AIDS. Tataw nga kini wala magpamatuod sa punto!

Ang laing teoriya naglangkit sa mga hormone. Ang mga siyentipiko nagpahayag nga ang mga ilaga sa laboratoryo nga hinikawan sa mga hormone sa laki nagpasundayag ug “binabaye” nga panggawi sa pakigsanay. Mihukom sila nga ang mga homoseksuwal mahimong susamang mga biktima sa biyolohikanhong aksidente​—ang pagkaladlad sa daghan o diyutay kaayong hormone sa lalaki una pa mahimugso. Apan, daghang siyentipiko ang nagtuo nga ang dili-naandang panggawi taliwala sa mga ilaga maoy labaw lag diyutay sa kinaiyanhong lihok​—dili gayod ‘homoseksuwalidad.’ Gawas pa, ang mga tawo dili mga ilaga. Ang The Harvard Medical School Mental Health Letter nangatarongan: “Wala gayoy kalagmitan nga ang una-pagkahimugso nga mga hormone makaimpluwensiya . . . sa tawhanong seksuwalidad sa samang direktang paagi nga ilang giorganisar ang mga kinaiyanhong lihok nga nalangkit sa panggawi sa mga ilaga sa pagsanay.”

Daghang atensiyon usab ang gihatag sa mga pagtuon sa genetiko. Taliwala sa mga homoseksuwal nga mga lalaki ug mga babaye nga dunay samag-nawong nga kaluha, mga katunga sa ilang mga kaluha maoy homoseksuwal usab. Sanglit ang monozygotic [samag-nawong] nga mga kaluha maoy mga kopya sa genetiko, daw makataronganon nga maghinapos nga ang usa ka misteryosong gene ang mipahinabo sa kalainan. Ugaling, timan-i nga katunga sa mga kaluha nga igsoon maoy dili homoseksuwal. Kon kining maong kinaiya sa pagkatinuod naprograma sa genetiko, dili ba ang tanang mga kaluha makabaton niana? Tinuod, ang mga gene ug mga hormone mahimong modula sa usa ka papel. Bisan pa, ang Scientific American nagtaho ug mga diskobre sa pipila nga ang ebidensiya “kusganong nagasugyot nga ang palibot nakaamot ug dako sa seksuwal nga kiling.”

Mga Hinungdan sa Palibot

Konsideraha ang palibot sa karaang Gresya. Dinasig sa erotikong mga estorya bahin sa pipila sa ilang tinumotumong mga diyosdiyos, sa mga sinulat sa mga pilosopo sama kang Plato, ug sa kultura sa gymnasium diin ang mga batan-on magdula nga hubo, nauso ang homoseksuwalidad taliwala sa hamili Gregog-sinultihang kalibotan. Sumala sa librong Love in Ancient Greece, “sa Creta giisip nga makauulaw ang usa ka batang lalaki nga matawo sa alta-sosyedad nga pamilya nga walay [lalaki] nga hinigugma.” Walay misteryosong gene o hormone ang nagpahinabo sa maong kadunotan. Mikaylap kini tungod kay gitugot sa kultura sa Grego, oo, gidasig kana! Kini nag-ilustrar ug maayo kon unsa ka kusganon ang papel nga gidula sa palibot.

Walay duhaduha ang pagdagsang sa propaganda nga uyon-sa-homoseksuwalidad dakog nahimo sa pagpakaylap nianang panglantawa karong adlawa. Gihisgotan ang homoseksuwalidad ug makadaghan diha sa TV, sa mga pelikula, musika, ug mga magasin. Ang cable telebisyon nagpasayon alang sa pipila ka batan-on nga makakita ug hinobrang pornograpiya. Ang androgynous (bisan haing sekso) nga mga estilo sa pamiste ug pangareglar nahimong estaylis. Ang pipila ka eksperto mibati usab nga ang batok-lalaki nga propaganda nga gipasiugda sa pipila ka makibabaye nakatabang sa pagsulbong sa lesbiyanismo. Hayan ang mga batan-on maladlad usab sa daotang impluwensiya pinaagi sa pagpakig-uban sa mga kaeskuyla nga dayag nagpaluyo sa homoseksuwal nga estilo sa kinabuhi.​—1 Corinto 15:33.

Amahan ug Anak nga Lalaki

Usahay, ang dili-maayong palibot sa pamilya daw nagdula usab ug dakong papel, ilabina taliwala sa mga lalaki.a Ang usa ka amahan nagahimog hinungdanong kontribusyon sa emosyonal nga pagtubo sa usa ka bata. (Efeso 6:4) Ang librong Paghimo sa Imong Pamilyahanong Kinabuhi nga Malipayon nagaingon: “Ang impluwensiya sa lakin-ong mga hiyas sa amahan makahatag ug hinungdanong kontribusyon sa pagkaugmad sa usa ka milipang-sa-bug-os, timbang nga personalidad.”b Ang usa ka batang lalaki nanginahanglan usab ug pagdawat, gugma, ug pag-uyon gikan sa iyang amahan. (Itandi ang Lucas 3:22.) Unsay mahitabo sa dihang ang amahan mapakyas sa paghatag sa iyang anak sa gikinahanglang atensiyon? Emosyonal nga sakit. Ang magsusulat sa mental nga kahimsog nga si Joseph Nicolosi nangangkon nga ang homoseksuwalidad sa lalaki maoy “halos kanunay resulta sa mga suliran sa relasyon diha sa pamilya, ilabina tali sa amahan ug anak nga lalaki.”

Hayan ang usa ka inahan sa wala tuyoa nagpasamot sa kahimtang pinaagi sa pagpakamenos sa iyang bana o pinaagi sa hinobrang pagdominar sa iyang anak nga lalaki. Usa ka pagtuon sa bayen-on nga mga lalaki mihimo niining obserbasyona: “Ang pipila sa mga ginikanan nangandoy ug anak babaye inay lalaki ug sa dili dayag nagdasig sa ilang batang anak nga lalaki sa pagbiste ingong usa ka babaye o pabistehan siya nianang paagiha.”

Dili kini pag-ingon nga ang natuis seksuwal nga mga pagbati dihadiha mapasangil sa mga ginikanan. Daghang lalaki nga midako nga dunay hinobra ka dominanteng mga inahan ug mapasagdanon, kanunay wala, o abusadong mga amahan sa gihapon nakaugmad ug lakin-ong mga personalidad. Dugang pa, dili tanang dunay homoseksuwal nga mga kiling naggikan sa mga pamilyang dunay dili maayong relasyon. Hinunoa, mipakita nga ang pipila ka lalaki nadaot sa espisipiko kaayong paagi. “Ingong sangpotanan sa iyang sayo nga pagkasabot sa pagkasinalikway sa amahan . . . ,” angkon ni Dr. Nicolosi, “ang homoseksuwal nagpas-an sa pagbati sa kahuyangan ug kawalay-katakos kon bahin niadtong mga kinaiyahan nga nalangkit sa pagkalalaki, nga mao, ang gahom, pagkamabut-anon, ug kusog. Siya madani sa kusog sa lalaki nga tinukmod sa wala-maamgohing paningkamot ngadto sa iyang kaugalingong pagkalalaki.”

Usa ka batan-ong Kristohanong lalaki nga ginganlag si Peter misulat: “Ang akong amahan usa ka alkoholiko ug sa regular nagdagmal sa akong inahan ug, usahay, kanamong kabataan. Sa dihang 12 anyos na ako, milayas siya. Gibati gayod nako ang pagkawalay-amahan. Kanunay akong mangandoy alang sa usa nga makapuno sa kahaw-ang nga akong gibati matag adlaw. Sa dihang sa kataposan nakaugmad ako ug panaghigala uban sa usa ka buotang Kristohanong lalaki kinsa gituhoan nako nga makapuno sa maong panginahanglan, misugod ako pag-eksperyensiya ug seksuwal nga mga pagbati alang kaniya.”

Makaiikag, ubay-ubayng gidaghanon sa mga homoseksuwal maoy mga biktima sa pagpanghilabot sa bata pa.c Ang maong pagpanghilabot makapatunghag dumalayong pisikal ug emosyonal nga kadaot. Alang sa pipila hayan kini magmugna sa gitawag sa usa ka magsusulat nga “tinuis seksuwal nga pagkatawo.” Dayag kini nga nahitabo sa karaang Sodoma, diin ang batan-ong mga lalaki mipadayag sa hinobrang gana alang sa tinuis nga pakigrelasyon. (Genesis 19:4, 5) Tataw, sila maoy produkto sa pagpanghimulos sa mga hamtong.

Ang Moral nga Isyu

Hayan dili gayod mapatin-aw ug eksakto sa mga siyentipiko kon unsa ka dako sa papel nga gidula sa kinaiyahan ug pagmatuto diha sa samag-sekso nga pagkaibog. Apan usa ka butang ang tin-aw: Ang tanang tawo nahimugsong dunay kiling nga mopadaog sa sayop nga panghunahuna ug mga kiling.​—Roma 3:23.

Ang usa ka batan-on nga gustong makapahimuot sa Diyos kinahanglan gayod nga magpahiuyon sa Iyang moral nga mga sukdanan ug isalikway ang imoral nga panggawi, bisan tuod ang paghimo sa ingon mahimong hilabihang lisora. Tinuod, ang pipila ka indibiduwal tingali makiling gayod sa homoseksuwalidad, ingon nga ang pipila ka indibiduwal maoy, sumala sa Bibliya, “makiling nga magmapungtanon.” (Tito 1:7) Apan ang Bibliya sa gihapon nagsaway sa mga pagpakita ug dili-makataronganong kasuko. (Efeso 4:31) Sa susama, ang usa ka Kristohanon dili magpakamatarong sa imoral nga panggawi pinaagi sa pag-ingon nga siya ‘natawo nianang paagiha.’ Ang mga tighilabot sa bata mogamit sa samang paluoyluoy nga pagpakamatarong sa dihang sila moingon nga ang ilang kaulag sa mga bata maoy “dala sa pagkatawo.” Apan duna bay makalimod nga ang ilang seksuwal nga gana maoy tinuis? Mao usab ang kaulag alang sa usa nga samag sekso.

Ang mga batan-on nga nakadiskobre sa ilang kaugalingon nga naibog sa samang sekso kinahanglan gayod nga dili magpadaog sa ilang mga pagbati. Nan, ngano nga ang Bibliya pintok kaayong nagsaway sa homoseksuwalidad? Ang mao bang estilo-sa-kinabuhi tinuod nga daotan ug tinuis? Kon mao, unsay mahimo sa usa ka batan-on aron malikayan kana? Kining mga pangutanaha pagahisgotan sa umaabot nga isyu sa Pagmata!

[Mga footnote]