Internasyonal nga Pagpanukod ug Kingdom Hall sa Pipila ka Nasod sa Uropa
1 Sa di pa dugayng mga dekada, ang buluhaton sa mga Saksi ni Jehova diha sa ubay-ubayng mga nasod sa Uropa, lakip sa Sidlakang Uropa, gidili. Sa kadaghanang kahimtang, ang mga pagdili maoy grabe kaayo. Lisod himoon ang mga tigom nga dayag, ug ang paggamit ug mga Kingdom Hall halos imposible. Apan, sa di pa dugayng katuigan, ‘si Jehova nagbuhat ug usa ka dakong butang sa iyang gibuhat kanato. Kita nagmalipayon.’—Sal. 126:3.
2 Sugod sa 1983, ang malupigong pagkontrol sa mga Saksi ni Jehova misugod sa pagluag. Pagka-1989, ang Polandia ug Hungaria legal nga nag-ila sa mga Saksi ni Jehova. Sa 1991, ang mga Saksi ni Jehova legal nga girehistro sa Rusya. Sukad niadto, ang buluhaton miuswag sa Rusya ug diha sa kanhing mga republika sa Unyon Sobyet. Tali sa Marso 1996 ug Oktubre 1998, ang Nagamandong Lawas nag-aprobar sa 359 ka hangyo sa Kingdom Hall nga pahulam gikan sa mga sangang buhatan nga nagdumalag 11 ka nasod sa Uropa.
3 Samtang imong tan-awon ang mga hulagway niini nga pasukip, palandonga ang dako ug kahibulongang mga butang nga gihimo ni Jehova alang sa iyang katawhan. (Sal. 136:4) Malipay ka sa pagkahibalo nga ang mga amot sa mga igsoon sa tibuok kalibotan gigamit pag-ayo, nga nagbanaag sa giingon ni Jesus, nga narekord sa Juan 13:35: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.”
4 Lakip sa mga nasod sa Uropa nga nakabenepisyo gikan sa kahikayan sa pagtabang sa pagpanukod ug mga Kingdom Hall diha sa mga nasod nga limitado ang kahinguhaan mao ang Romania, diin 36 ka Kingdom Hall ang natukod na sukad sa Hulyo 2000. Pinaagi sa paggamit ug parehog sukdanan nga plano sa halos tanan nilang mga Kingdom Hall, ang Ukraine nakatukod ug 61 sa tuig 2001 ug dugang 76 sa 2002. Tungod sa tabang sa salapi nga giamot ngadto sa Kingdom Hall Fund, gatosan ka Kingdom Hall ang natukod sa Bulgaria, Croatia, Macedonia, Moldova, Rusya, ug Yugoslavia.
5 Ang pagtukod ug mga Kingdom diha sa pipila ka nasod dili sayon, ug dugang paningkamot ang kinahanglang himoon sa dili pa sugdan ang aktuwal nga pagtukod. Sagad ang pagpangandam alang sa pagtukod makahurot ug panahon. Gawas pa, ang bili sa pagtukod ug Kingdom Hall sa maong dapit sa Uropa mas dako kay sa daghang dapit sa Aprika o sa Amerika del Sur. Hinunoa, tungod sa dakong pag-uswag sa gidaghanon sa mga magsisimba ni Jehova, gatosan pa ka Kingdom Hall ang gikinahanglan diha sa mga nasod sa Uropa nga may limitadong kahinguhaan!
6 Pagkakahibulongan ang pagkakita sa maong kusog nga pag-uswag sa pagtukod niining maong mga Kingdom Hall! Usa ka maayo kaayong pamatuod ang nahatag sa mga silingan diin kini gitukod, sumala sa gipakita sa daghang kasinatian. Diha sa pipila ka dapit, nakadayeg ang lokal nga mga awtoridad sa kinabubut-ong espiritu nga gipakita sa pagtuman sa mga giya sa pagtukod.
7 Si Isaias haom nga mitagna bahin sa pag-uswag sa matuod nga pagsimba niining panahona. Pinaagi sa manalagna, ang Diyos nagtagna: “Ako, si Jehova, magpadali niini sa kaugalingong panahon niini.” (Isa. 60:22) Dayag nga ang miaging dekada napamatud-ang panahon ni Jehova alang sa pag-uswag sa Sidlakang Uropa. Hinaot nga si Jehova padayong magabubo sa iyang dagayang mga panalangin sa atong mga paningkamot sa pagpadali sa pagpanukod ug mga Kingdom Hall diha sa daghang nasod samtang paluyohan nato pag-ayo ang Kingdom Hall Fund! Tungod niini daghan pang Kingdom Hall ang matukod diha sa mga nasod nga limitado ang mga kahinguhaan. Makadugang kini sa pag-uswag sa putli nga pagsimba diha sa daghang dapit sa Uropa ug makahatag ug mas dakong pamatuod “hangtod sa kinatumyan sa yuta.”—Buh. 13:47.
[Mga hulagway sa panid 3]
Kingdom Hall Complex Moscow, Rusya
[Mga hulagway sa panid 4-6]
Bag-ong mga Kingdom Hall sa Sidlakang Uropa
Strumica, Macedonia
Daruvar, Croatia
Bitola, Macedonia
Sokal, Lviv District, Ukraine
Mladost, Bulgaria
Kurdzhipskoye, Maykop, Rusya
Bački Petrovac, Yugoslavia
Plovdiv, Bulgaria
Tlumach, Ivano-Frankivsk District, Ukraine
Rava-Ruska, Lviv District, Ukraine
Stara Pazova, Yugoslavia
Zenica, Bosnia ug Herzegovina
Sokal, Lviv District, Ukraine
Zhydachiv, Lviv District, Ukraine