Nagauswag ang Matuod nga Pagsimba sa Sidlakang Uropa
1 Ang unang-siglong mga Kristohanon maoy masibotong mga magwawali sa Gingharian. Sila nagmaya sa dihang ang mga kongregasyon ‘nag-uswag sa gidaghanon adlaw-adlaw.’ (Buh. 16:5) Ang ilang maisogong pagsangyaw nagdala sa matuod nga pagsimba ngadto sa Asia, Aprika, ug Uropa, nga miresulta sa dagayang pagpangani sa mga magtutuo.
2 Niining panahon sa kataposan, ang matuod nga pagsimba nagpadayon sa pag-uswag, ilabina sa mga nasod sa Sidlakang Uropa. Sa mga nasod diin kita nailalom sa mga pagdili sa kagamhanan hangtod sa sayong katuigang 1990, ato na karong nasinati ang talagsaong mga pag-uswag. Ang 1999 Yearbook nagbutyag nga duha sa maong mga nasod, Rusya ug Ukraine, ang matag usa nagtaho ug kapin sa 100,000 ka magmamantala nga miambit sa publikong ministeryo. Sa 15 ka teritoryo sa kanhing Unyong Sobyet, sukad sa 1991 kapin sa 220,000 ka tawo ang nagpahinungod sa ilang kaugalingon kang Jehova ug nagpabawtismo! Kining kusog nga pagtubo nagpahinabong gikinahanglan ang pagtukod ug daghang bag-ong mga Kingdom Hall ug mga Assembly Hall maingon man sa pagpadako sa ubay-ubayng mga pasilidad sa sanga.
3 Usa ka pahat sa Kingdom Hall Fund sa Sosyedad gigamit na karon sa pagtaganag mga pahulam ngadto sa mga kongregasyon diha sa kayutaan diin adunay dinalian kaayong panginahanglan alang sa dugang mga Kingdom Hall apan adunay limitadong kahinguhaan ug grabeng mga suliran sa ekonomiya. Tali sa Marso 1996 ug Oktubre 1998, ang Sosyedad nag-aprobar sa 359 ka hangyo sa Kingdom Hall nga pahulam gikan sa sangang mga buhatan nga nagdumalag 11 ka nasod sa Sidlakang Uropa. Ang mga amot nga salapi gigamit sa pagpalit ug yuta ug mga materyales alang sa pagtukod ug bag-ong mga Kingdom Hall ug sa pagtabang sa mga kongregasyon sa pagpaanindot sa naglungtad nang mga pasilidad. Ang mga hulagway nga gipakita dinhi maghatag kanatog ideya kon sa unsang paagi ang mga kontribusyon sa Kingdom Hall Fund sa Sosyedad sa Tinipong Bansa ug sa ubang mga nasod nakabenepisyo sa atong mga igsoon sa Sidlakang Uropa.
4 Sulod sa 1998, ang Bulgaria nakasinatig 12-porsiyentong pag-uswag, ug ang mga igsoon nahinam sa dihang ang ilang unang Kingdom Hall gipahinungdan sa Abril nianang tuiga. Ang Croatia nakapahimulos ug 4-porsiyentong pag-uswag, ug sa pagkakaron ang mga igsoon didto nagatukod ug dugang mga Kingdom Hall, sa pagpauswag sa matuod nga pagsimba. Sa Hungaria mga 80 ka Kingdom Hall ang gigamit sa 144 ka kongregasyon. Kini nagpasabot nga sa 235 ka kongregasyon sa maong nasod, 61 porsiyento ang adunay ilang kaugalingong dapit sa pagsimba. Sa Macedonia ang programa sa pagpanukod ug Kingdom Hall nakakompleto ug duha ka bag-ong mga tigomanan, ug daghan pa ang kamulong gitukod. Sa ting-init sa 1999, usa ka dobleng Kingdom Hall ang nahuman sa kaulohang siyudad sa Skopje. Kini nga tigomanan adunay kapasidad nga magamit sa labing menos unom ka kongregasyon.
5 Sa miaging tuig sa Rusya, dihay aberids nga kapin sa 260 ka tawo ang nabawtismohan matag semana! Sa pagsunod sa panig-ingnan sa ubang mga nasod, ang sanga sa Rusya nag-organisar na karon ug 12 ka Regional Building Committee palibot sa ilang halapad kaayong teritoryo, sa pagpaluyo sa umaabot nga mga proyekto sa pagpanukod ug Kingdom Hall. Sa amihanang bahin sa St. Petersburg, ang pagtukod nagkamulo nianang unang Assembly Hall sa nasod, nga makapalingkod ug 1,600. Ang pasilidad maglakip usab ug lima ka Kingdom Hall nga may 200 ka lingkoranan ang matag usa. Aron itagana ang espirituwal nga mga panginahanglan sa atong mga igsoon ug sa daghang interesado nga mga tawo sa Ukraine, 84 ka Kingdom Hall ang nakompleto na ug 80 ang kamulo pang gitukod.
6 Dili ba kini nga pag-uswag sa Sidlakang Uropa magpalipay sa atong mga kasingkasing? Walay sapayan kon asa kita magpuyo, ang pag-uswag sa matuod nga pagsimba magpahinumdom kanato nga ang Diyos walay pinalabi ug nga ang iyang pailob magkahulogan ug kaluwasan alang sa “dakong panon.” (Pin. 7:9; 2 Ped. 3:9) Pagkamaayo sa atong pribilehiyo nga makabaton ug gamayng bahin sa pag-amot ngadto sa espirituwal nga tingusbawan sa uban, bisan kadtong atua sa halayo nga kayutaan! Ang Proverbio 28:27 nagpasalig kanato nga “siya nga nagahatag sa kabos dili makulangan.” Ang atong pagkaandam nga motabang sa paghulip niining mga galastohan sa pagtukod moresulta sa “pag-angay-angay” sa materyal nga mga butang, nga magpaarang sa tanan nga makatagamtam sa kalipay nga nagsumikad sa paghatag ug sa kangaya nga moresulta tungod sa pagkakita sa matuod nga pagsimba nga mapauswag sa tibuok kalibotan.—2 Cor. 8:14, 15; Buh. 20:35.
[Hulagway sa panid 3]
Săcele, Romania
[Hulagway sa panid 3]
Maardu, Estonia
[Hulagway sa panid 3]
Sevnica, Slovenia
[Hulagway sa panid 3]
Tiszavasvári, Hungaria
[Mga hulagway sa panid 4]
Jūrmala, Latvia
[Mga hulagway sa panid 4]
Tallinn, Estonia
[Hulagway sa panid 4, 5]
Taurage, Lithuania
[Hulagway sa panid 4, 5]
Belgrade, Yugoslavia
[Mga hulagway sa panid 5]
Prievidza, Slovakia
[Hulagway sa panid 5]
Mátészalka, Hungaria
[Mga hulagway sa panid 6]
Ruma, Yugoslavia
[Hulagway sa panid 6]
Vranov nad Topl’ou, Slovakia
[Mga hulagway sa panid 6]
Tornakalns, Latvia