Nag-uswag ang Programa sa Pagpanukod ug Kingdom Hall
1 Sa 1983 didto sa “Kingdom Unity” nga Distritong mga Kombensiyon sa Tinipong Bansa, gipahibalo nga usa ka linaing pondo ang tukoron aron sa pagpaluyo sa pagpanukod ug sa pagbag-o sa mga Kingdom Hall sa tibuok Tinipong Bansa ug sa Canada. Wala nato damha niadto kon unsay motungha nga mga panalangin gikan sa maong gamay nga mga pagsugod. Atong sugod nga natagamtam nga bug-os pa ang haom gayong giingon sa Salmo 92:4: “Kay gilipay mo ako, Oh Jehova, tungod sa imong buhat; tungod sa mga buhat sa imong mga kamot magahugyaw ako sa kalipay.”
2 Dako karon ang atong kalipay kon unsay napalampos. Karong panahona ang gipadali nga programa sa pagpanukod ug Kingdom Hall sa tibuok kalibotan ginahimo na. Sa pipila ka paagi, kitang tanan adunay pribilehiyo nga makig-ambit niini nga kalihokan. Gihimo nato kana pinaagi sa paghatag ug dako o gamay nga mga amot nga salapi aron sa pagtabang sa galastohan sa pagtukod ug mas daghang dapit sa pagsimba sa tibuok kalibotan. Daghang igsoon usab ang boluntaryong nagpagamit sa ilang kahimanan maingon man sa ilang panahon, katakos, ug mga kahanas maylabot sa maong mga proyekto. Ang kalamposan sa katibuk-ang kahikayan maoy tungod sa paggiya, pagpaluyo, ug dagaya nga panalangin ni Jehova diha sa atong nahiusang mga paningkamot.—Sal. 127:1.
3 Daghang sangang buhatan ang misunod sa sumbanan nga unang gimugna alang sa mga kongregasyon sa Tinipong Bansa. Diha sa mga Kingdom Hall sa daghang nasod, adunay kahon diin ang mga magmamantala maghulog sa ilang mga amot alang sa Kingdom Hall Fund. Diha sa edisyon sa Atong Ministeryo sa Gingharian alang sa Tinipong Bansa sa Marso 1997 usa ka pagpasibo ang gipahibalo bahin niining programaha. Kini nag-ingon: “Sukad nga natukod ang Society Kingdom Hall Fund sa 1983, ang mga igsoon dagayang nag-amot, busa nagpaarang nga mahimo ang mga pagpahulam alang sa pagpanukod ug Kingdom Hall. Aduna nay mga 2,700 ka kongregasyon niining nasora ang nakabenepisyo gikan niini nga kahikayan. Daghang kongregasyon ang dili makahimo sa bisan unsa mang paagi sa pagtukod ug bag-ong mga Kingdom Hall o pag-ayo niadtong kinahanglang ayohon. Aduna karoy dinaliang panginahanglan sa paggamit sa pipila niining inamot nga mga pondo aron pahulamon ang mga kongregasyon diha mga nasod nga naglisod sa ekonomiya. Ang inyong mapinadayonong pagpaluyo niining kahikayana gipasalamatan pag-ayo sa Sosyedad ug niadtong mga kongregasyon nga nakabenepisyo gikan sa inyong mga amot.”
4 Ang maong pahibalo nagsilbing imbitasyon sa pagpakig-ambit sa gipadali nga programa sa pagpanukod ug Kingdom Hall. Ang Kingdom Hall Fund ipakaylap aron maapil ang mga panginahanglan sa atong mga igsoon sa ubang mga nasod. Ang nagsunod nga artikulo diha sa Agosto 1997 nga gula sa Atong Ministeryo sa Gingharian sa edisyon sa Tinipong Bansa nag-ingon: “Adunay nagpadayong panginahanglan alang sa pagpanukod ug Kingdom Hall sa tibuok kalibotan. Sulod lang sa miaging tuig sa pag-alagad, 3,288 ka bag-ong mga kongregasyon ang natukod. Daghan sa maong mga kongregasyon maoy didto sa Aprika, Asia, Sentral ug Amerika del Sur, ug Sidlakang Uropa.”
5 Unsa na man ang nahimong mga resulta sukad niadtong panahona? Ang 2001 Yearbook nagtaho: “Uban niining kahikayana, diha sa 30 ka nasod, 453 ka Kingdom Hall ang nahuman sa pagkakaron, ug laing 727 ka tinukod ang ginatukod pa. Ang gihatagag pagtagad mao ang pag-ugmad ug sukdanang mga plano sa Kingdom Hall alang sa matag nasod nga maggamit sa lokal nga mga materyales ug mga paagi sa pagpanukod. Sa Kenya, gigamit ang kinubkob nga mga bato; sa Togo naandang gigamit ang tisa; sa Cameroon popular ang konkretong mga bloke nga palitadahan sa ulahi. Niining paagiha, ang lokal nga mga igsoon dali rang makabaton sa mga kahanas nga gikinahanglan sa pagtuman sa hinungdanong mga katungdanan sulod sa nasodnong programa.”
6 Ang pamatuod sa mga panalangin ni Jehova niining programaha makita didto sa dakong kontinente sa Aprika. Samtang imong tan-awon ang mga hulagway sa pipila ka Kingdom Hall nga natukod na, handurawa ang dakong epekto sa maong pagpanukod maylabot sa buluhaton sa mga Saksi ni Jehova! Matuod kini diha sa tulo ka nagkalainlaing mga bahin—ang panaghiusa sa atong tibuok-kalibotang panag-igsoonay, ang epekto diha sa lokal nga komunidad, ug ang pag-uswag sa mga nanambong diha sa mga tigom sa kongregasyon. Samtang gipasiugda niini nga pasukip ang mga Kingdom Hall nga gitukod sa Aprika, ang umaabot nga mga edisyon sa Atong Ministeryo sa Gingharian magsentro sa pagtagad kon sa unsang paagi ang programa sa pagpanukod ug Kingdom Hall nag-uswag diha sa ubang mga rehiyon sa kalibotan.
[Mga hulagway sa panid 3]
REPUBLIKA SA SENTRAL APRIKA
Bimbo, Bangui
Begoua, Bangui
[Mga hulagway sa panid 4]
Ukonga, Tanzania
[Hulagway sa panid 4]
Accra, Ghana
[Hulagway sa panid 4]
Salala, Liberia
[Hulagway sa panid 4]
Karoi, Zimbabwe
[Mga hulagway sa panid 4, 5]
Allada, Benin—daang Kingdom Hall
Allada, Benin—bag-ong Kingdom Hall
[Hulagway sa panid 5]
Kpeme, Togo
[Hulagway sa panid 5]
Sokodé, Togo
[Mga hulagway sa panid 4, 5]
Fidjrosse, Benin
[Hulagway sa panid 6]
Lyenga, Zambia—daang Kingdom Hall
[Hulagway sa panid 6]
Lyenga, Zambia—bag-ong Kingdom Hall
[Hulagway sa panid 6]
Kinshasa, Congo
[Hulagway sa panid 6]
Musambira, Rwanda