Pagpanukod ug Kingdom Hall sa Pilipinas

¹ Kon atong lantawon ang tibuok kalibotang nataran, pagkamakapadasig ang paglantaw sa dakong pag-uswag nga nasinati sa yutan-ong organisasyon ni Jehova! Sa miaging tuig ang total nga 3,288 ka kongregasyon ang nadugang sa tibuok kalibotan. Uban niining tanang pag-uswag, dili ikatingala nga adunay panginahanglan sa dugang mga Kingdom Hall ug pagpatahom sa mga naglungtad na.

² Daghang igsoong lalaki ug babaye nagapasundayag ug talagsaong kasibot ug pagpaluyo sa organisasyon ni Jehova pinaagig pagboluntaryo sa ilang panahon ug mga kahinguhaan diha sa pagtukod ug Kingdom Hall. Matag tuig, duolag 50 ka bag-ong mga Kingdom Hall ang natukod dinhi sa Pilipinas ug daghang uban pa ang gipatahom. Ang mga Komite sa Pagpanukod sa Kongregasyon gisaligan sa pagdumala niining mga proyektoha, ug ang ilang mga paghago gipabilhan. Ang bug-os nga kahikayan sa pagtukod ug Kingdom Hall malampos pinaagi sa Kristohanong espiritu sa paghatag ug pagsakripisyo sa kaugalingon​—ang kaatbang sa espiritu nga kasagaran kaayong gipakita sa kalibotan.​—2 Tim. 3:2, 4.

³ Hupting Yano ang Disenyo sa Kingbom Hall: Kinahanglang hatagan ug kanunayng pagtagad ang pagtukod nga makasaranganon uban ang yano ug praktikal nga disenyo. Sanglit daghan ang nagaboluntaryo sa ilang paghago diha sa mga proyekto sa Kingdom Hall, ang mga trabahante hayan mobating gipahimuslan sa dihang hangyoon sa pagtukod o pagmontar ug hago-kaayong mga dayandayan. Ang Kingdom Hall Loans Department sa sangang buhatan makataganag hinungdanong giya sa pagtabang sa paghimog timbang nga mga desisyon maylabot sa disenyo sa Kingdom Hall.

⁴ Samtang ang pipila ka kongregasyon nakahimo sa pagtukod pinaagig pondo sa salapi nga gipatungha sa lokal nga paagi, mga 1,000 ka ubang kongregasyon sa miaging napulo ka tuig ang nakakaplag nga kinahanglang moduol sa Sosyedad alang sa pahulam gikan sa Kingdom Hall Fund. Kon ang inyong kongregasyon nagahunahuna sa pagpatahom sa inyong Kingdom Hall ug nagakinahanglag pinansiyal nga tabang, mahimong kontakon ninyo ang Sosyedad. Sa dili pa mohangyog pahulam gikan sa Sosyedad, ang mga ansiyano maghimog lokal nga surbi aron matino (1) kon pila ang iamot sa pagsugod aron makatabang sa pagpalit sa yuta ug sa galastohan sa konstruksiyon, (2) kon pila ang mahulam sa lokal nga paagi niadtong nasakop sa nalangkit nga kongregasyon (mga kongregasyon), ug (3) kon pila ang iamot sa binulan aron mahulipan ang mga galastohan sa pagpadagan sa kongregasyon ug sa pagbayad sa bisan unsang pahulam nga madawat gikan sa Sosyedad. Kinahanglang walay mga ngalan ang makita diha sa mga papel nga itunol sa dihang himoon kini nga surbi. Importante nga itagana sa tanan ang tukmang mga numero, nga magmarealistiko sa pag-isip sa ilang kaugalingong amot ug mga gidahom nga pahulam, sanglit gamiton sa mga ansiyano kining mga numeroha sa paghimog mabug-at nga mga desisyon alang sa kongregasyon. Ang among kasinatian mao nga maayong sulayan kon unsay mahimo sa lokal pinaagig pagtigom ug Kingdom Hall Building Fund sulod sa ubay-ubayng mga bulan una pa mohangyog bisan unsang pahulam gikan sa Sosyedad.​—Luc. 4:28-30.

⁵ Pagbanabana sa Kantibab ug mga Pamaagi sa Pagkuwenta: Una pa sugdan ang proyekto sa konstruksiyon sa Kingdom Hall, ang galastohan sa konstruksiyon kinahanglang banabanaon pag-ayo sa dili pa ang ultimang hangyo sa pahulam ipadala. Magpugong kini sa pagpapas-an sa mga magmamantala sa mas bug-at nga eskedyul sa pagbayad kay sa gikinahanglan. Usab, magbilin kinig salapi diha sa Kingdom Hall Fund sa Sosyedad aron mabatonan sa ubang mga kongregasyon nga may dinaliang panginahanglan sa mas maarang-arang nga Kingdom Hall. (Filip. 4:5) Samtang ang wala damhang galastohan makapahimo sa presyo nga mosobra sa badyet, ang rasonable tukmang mga pagbanabana mahimong himoon uban ang maayong pagplano ug pag-analisar.

⁶ Ang proyekto sa pagtukod ug Kingdom Hall nagalangkit sa paggastog dakong kantidad sa salapi pinaagi sa kongregasyon. Kinahanglang tinoon sa mga ansiyano nga ang salapi madumala sa responsableng paagi. Ang tukmang mga rekord sa mga kuwenta kinahanglang imentinar, ug ang tin-awng mga taho kinahanglang ihatag sa nalangkit nga kongregasyon (mga kongregasyon) sa matag bulan. Ang nagadumalang magtatan-aw kinahanglang magtino nga ang salapi sa pagtukod ug ang tanang nalangkit nga mga kuwenta maawdit sa matag tulo ka bulan duyog sa regular nga mga kuwenta sa kongregasyon. Bisan pa niana, sulod sa yugto sa konstruksiyon sa dihang daghang bayranan ang ginabayran, kinahanglanon ang pagsusi sa mga kuwenta sa matag bulan. Ang kongregasyon kinahanglang mohatag ug kinatibuk-ang pag-uyon sa proyekto human nga napasabot na pag-ayo sa mga detalye ug sa gibanabanang mga kantidad. Human niana, ang pag-uyon sa tanang pagbayad kinahanglang ihatag sa tukmang paagi una pa ang bisan unsang salapi ibayad. Inigkatapos sa proyekto, kinahanglang adunay tin-awng pagkuwenta sa tanang nagastong salapi.

⁷ Mga Boluntaryo Nagasuportar ug Maayong Buluhaton: Ang Sosyedad mapasalamaton ngadto sa daghang boluntaryo nga nagatabang sa pagtukod ug Kingdom Hall. Makapahimuot gayod ang pagkakita sa tinagpulo ka libong boluntaryo nga nagatanyag sa ilang kaugalingon diha sa tanang bahin sa pagtukod ug Kingdom Hall. Ang kalamposan niini nga programa naposible tungod sa maong mahinangpon, mahinatagon, ug matinabangong espiritu sa bahin sa boluntaryong mga trabahante, nga nagsakripisyo sa panahon nga hayan magamit pag-ayo sa laing paagi uban sa ilang mga kongregasyon ug mga pamilya. (Sal. 110:3; Col. 3:23) Kining mahigugmaong pagsanong magpahimo kanilang takos sa atong komendasyon, apresasyon, ug bug-os nga pagpaluyo.​—Roma 12:10; Heb. 13:1.

⁸ Sa dihang ang usa ka Kingdom Hall ginatukod, ang mga magmamantala sa duol nga mga kongregasyon mahimong dapiton sa pagduyog sa proyekto. Mahimo kini pinaagi sa Komite sa Pagpanukod sa Kongregasyon nga magsulat ngadto sa nagadumalang mga magtatan-aw sa sikbit nga mga kongregasyon ug magpahibalo kanila sa ilang panginahanglan sa tabang. Ang tanan kanilang anaa sa kahimtang sa pagboluntaryo magabuhat ug bililhong pag-alagad.

⁹ Paghupot sa Galastohan sa Konstruksiyon nga Kasarangan: Ang mga Komite sa Pagpanukod sa Kongregasyon kinahanglang mangitag paborableng mga presyo pinaagig pagtanditandi sa pagpamalit ug pag-indig-indig sa presyo. Niining paagiha, mahimo ang pagtino kon kinsa sa mga tigsuplay ang gamiton ug kon unsang mga materyal ang paliton gayod. Aron maseguro nga ang salapi magamit sa daginot nga paagi kutob sa maarangan, ang Komite sa Pagpanukod sa Kongregasyon kinahanglang mag-aprobar sa tanang galastohan gikan sa pondo sa pagtukod.

¹⁰ Ang Tanan Makatabang: Kitang tanan adunay kahigayonan sa pag-amot sa pinansiyal nga paagi alang sa Kingdom Hall Fund sa Sosyedad segun sa itugot sa atong mga kahimtang. Sukad nga ang Kingdom Hall Fund sa Sosyedad natukod, linibo ka kongregasyon ang natabangan sa pagpakabaton ug mga Kingdom Hall. Daghang kongregasyon ang wala unta makabaton sa maong haruhay nga mga dapit tigomanan kon dili pa sa gugma sa panag-igsoonay nga nabutyag diha sa inyong mahinatagong pagpaluyo sa Kingdom Hall Fund sa Sosyedad. Kini nga pondo ginapahulam aron sa pagtabang sa pagtukod ug bag-ong mga Kingdom Hall. Samtang ang mga salapi makugihong ginabayad, kini nga pondo pahulaman ngadto sa ubang mga kongregasyon nga adunay panginahanglan.

¹¹ Mga Ekspresyon sa Apresasyon: Sa dihang natapos na ang ilang bag-ong Kingdom Hall, usa ka kongregasyon miingon niini diha sa usa ka sulat nga gipadala ngadto sa Sosyedad: “Kami nagsulat kaninyo aron pasalamatan kamo sa inyong mahigugmaong tabang sa pagtukod sa among bag-ong Kingdom Hall. Ang among tinukod karon bug-os nang natapos ug napahinungod ngadto kang Jehova, ug ang kongregasyon mapasalamaton pag-ayo sa maong matahom nga tinukod alang sa pagsimba kang Jehova. Ang among kongregasyon kanunayng nagsuportar nga malipayon sa Kingdom Hall Fund sa Sosyedad ug sa lokal nga mga proyekto sa pagpanukod ug magapadayon sa pagbuhat sa ingon, sa pagkaamgo sa dakong panginahanglan sa uban pang mga kongregasyon aron makabenepisyo gikan niining mahinatagon ug bililhong tagana.”

¹² Ang laing kongregasyon mipahayag ug apresasyon sa mahigugmaong tabang nga ilang nabatonan, nga nagaingon: “Buot namong ipahayag kaninyo ang among halawom nga mga pasalamat sa tabang sa Kingdom Hall Fund sa Sosyedad. Kon wala kana ang pagtukod sa [among] tigomanan mas lisod unta kaayo ug nalangan sa dugayng panahon. Ang kaalam ni Jehova tino gayod nga dayag niini nga kahikayan.”

¹³ Ang Buluhaton sa Unahan: Kitang tanan adunay katarongan nga magmalipayon samtang atong atubangon ang panginahanglan sa pagtagana ug dugang ug mas maarang-arang nga mga Kingdom Hall. Kita angayng magbaton ug espiritu sa pagkamatinabangon​—nga magkahiusa sa pagbuhat ug magpaluyo sa bug-os niining kinahanglanong kalihokan. (Sal. 133:1) Pagkamalipayon nato nga nakabaton ug mga lalaki nga gitudlo sa organisasyon ni Jehova aron manguna sa espirituwal nga mga butang ug sa pagpanukod sa gikinahanglang mga pasilidad! Si Pablo nangamuyo sa mga taga-Filipos, nga nagaingon: “Himoang bug-os ang akong kangaya sa pagkaagi nga kamo managsama ug kaisipan ug may samang gugma.” (Filip. 2:2) Sa pagkatinuod, nabatonan ta ang tanang rason sa pagkalipay, samtang kita gisaligan sa maayong balita sa natukod nga Gingharian nga “igawali sa tibuok gipuy-ang yuta ingong usa ka pagsaksi ngadto sa tanang kanasoran” una pa moabot ang kataposan. (Mat. 24:14) Ang atong pagbarog nga malig-on diha sa kiliran sa maong Gingharian ug maunongong magabuhat sa intereses niini magpalipay sa kasingkasing ni Jehova. “Magmaalamon, anak ko, ug lipaya ang akong kasingkasing, aron matubag ko siya nga nagatamay kanako.” (Prov. 27:11) Pagkatalagsaong pribilehiyo ang maatoa diha sa duyog nga pagbuhat ug pagpakig-ambit nga malipayon uban kang Jesu-Kristo diha sa buluhaton ni Jehova!