Pagpanukod ug mga Kingdom Hall—Usa ka Hinungdanong Bahin sa Sagradong Pag-alagad
1. Unsay nahimo na sa pagpanukod ug mga Kingdom Hall, apan unsa pay kinahanglang buhaton?
1 Sulod sa miaging tulo ka tuig ug tunga, 150 na ka Kingdom Hall ang natukod sa teritoryo sa sangang buhatan sa Pilipinas. Sinsero namong gipasalamatan ang paghago sa mga Kingdom Hall Construction Group ug sa tanan nga mitabang kanila. Bisag pag nahimo na ang dako kaayong buluhaton, daghan pang Kingdom Hall ang pagatukoron. Sa unsang paagi kitang tanan makasuportar niining hinungdanong bahin sa atong sagradong pag-alagad kang Jehova?—Pin. 7:15.
2. Sa unsang paagi direktang makasuportar kita sa pagpanukod ug mga Kingdom Hall?
2 Magmaandam sa Pagboluntaryo: Kon ikaw bawtismadong magmamantala, gidapit ka namo sa pagpakigbahin sa buluhaton uban sa usa ka Kingdom Hall Construction Group pinaagi sa pagpil-ap ug Application for Kingdom Hall Construction Volunteer Program (A-25). Kining pormaha anaa sa inyong kongregasyon o mahimong pangayoon gikan sa sangang buhatan pinaagi sa mga ansiyano. Kon maaprobahan, ikaw dapiton sa pagtrabaho uban sa usa ka proyekto sa Kingdom Hall sulod sa tulo hangtod sa unom ka bulan. Ang laing paagi sa pagpakigbahin bisan pag dili mopil-ap ug aplikasyon maoy pinaagi sa pagboluntaryo ug usa o duha ka adlaw o bisan usa ka semana sa bisan unsang nagapadayong proyekto sa Kingdom Hall diha sa inyong sirkito o sa duol nga sirkito. Ang tanang moboluntaryo kinahanglang andam nga mga trabahante ug adunay espiritu sa kooperasyon. (Sal. 133:1) Bisan pag wala kay mga kahanas sa pagpanukod, dako gihapon kag ikatabang sa kalamposan sa usa ka proyekto sa konstruksiyon. Mahimong makadawat ka usab ug pagbansay bahin sa pagpanukod ug busa magamit ka sa umaabot.
3. Sa unsang ubang mga paagi ikapakita nato ang atong pagsuportar niining maong kahikayan?
3 Kon dili ka makaboluntaryo, ikapakita nimo ang imong pagsuportar pinaagi sa pagdasig sa uban nga makaarang sa pagpakigbahin sa maong kahikayan. Makatabang ka sa pagbuhat sa mga asaynment diha sa kongregasyon niadtong nagtrabaho sa usa ka proyekto sa konstruksiyon. Pinaagi sa abanteng pagplano, ang mga ansiyano makapaneguro nga ang kongregasyon maatiman sa dihang ang pipila nagatrabaho sa usa ka gitukod nga Kingdom Hall. Sa walay duhaduha, si Jehova malipay sa dihang kita nagtambayayongay alang sa kauswagan sa intereses sa Gingharian.—Heb. 13:16.
4. Sa unsang paagi makapalig-on kita niadtong nagtukod ug mga Kingdom Hall?
4 Magmapositibo: Ang pagtukod ug mga dapit sa pagsimba nagkinahanglag daghang panahon ug kahago. Nan, masabtan nga kadtong gidapit sa pagtabang sa mga proyekto sa pagpanukod usahay wala sa ilang kaugalingong mga kongregasyon. Hinaot nga dali kitang modayeg ug modasig sa mga boluntaryo sa pagpanukod, nga naghimog mga sakripisyo sa paghimo niining “hinungdanong atimanonon.”—Buh. 6:3; Roma 14:19.
5. Sa unsang paagi mahimong timbang ang mga boluntaryo sa konstruksiyon?
5 Magmatimbang: Ang pagsangyaw bahin sa Gingharian sa Diyos mao ang atong pangunang teokratikanhong buluhaton. (Mar. 13:10) Uban niini sa hunahuna, ang Kingdom Hall Construction Desk ug ang Regional Kingdom Hall Offices naningkamot sa pag-eskedyul sa mga proyekto aron ang mga boluntaryo makahimo sa pagpakig-ambit nga regular sa pagsangyaw sa kanataran. Sa susama, ang mga boluntaryo sa konstruksiyon naningkamot nga mahimong timbang sa pag-atiman sa ilang espirituwal nga mga responsabilidad.
6. Unsay mahimo sa dihang ang tanan sa kongregasyon nagtambayayongay sa pagbuhat aron mapauswag ang matuod nga pagsimba?
6 Gibatbat ni apostol Pablo ang mga membro sa kongregasyon ingong nagtambayayongay sa pagbuhat ‘aron motubo ang lawas alang sa pagpalig-on sa kaugalingon niini diha sa gugma.’ (Efe. 4:16) Ang atong gugma kang Jehova ug sa matuod nga pagsimba nagtukmod kanato sa pagtambayayongay aron ang maayong balita ikasangyaw ug masuportahan ang pagpanukod ug mga Kingdom Hall.