Ipadayag ang Ngalan sa Diyos
1. Unsay epekto sa pagkakat-on sa personal nga ngalan sa Diyos nganha sa mga tawo?
1 Sa unsang paagi ikaw misanong sa dihang imong nakat-onan ang ngalan sa Diyos sa unang higayon? Ang sanong sa kadaghanan maoy susama nianang iya sa babaye kinsa miingon: “Sa akong unang pagkakita sa ngalan sa Diyos diha sa Bibliya, mihilak ako. Natandog kaayo ako sa pagkahibalo nga puwede diay akong mahibalo ug mogamit sa personal nga ngalan sa Diyos.” Alang kaniya, ang pagkakat-on sa ngalan sa Diyos maoy usa ka hinungdanong lakang sa pagkaila kang Jehova ingong persona ug sa pag-ugmad ug malungtarong relasyon uban kaniya.
2. Nganong dinalian alang kanato ang pagtudlo sa uban bahin kang Jehova?
2 Nganong Ipadayag man Kini? Ang ngalan sa Diyos nalangkit sa iyang mga hiyas, katuyoan, ug mga buhat. Nalangkit usab kini sa kaluwasan. “Ang matag usa nga magatawag sa ngalan ni Jehova maluwas,” misulat si apostol Pablo. Apan “unsaon nila pagtawag kaniya,” nangatarongan si Pablo, gawas kon makakat-on una ang mga tawo bahin kang Jehova ug motuo kaniya? Busa, dinalian alang sa mga Kristohanon nga ipadayag ngadto sa uban ang ngalan sa Diyos ug ang tanan nga gihawasan niini. (Roma 10:13, 14) Hinunoa, adunay mas dakong rason kon nganong kinahanglang ipadayag ang ngalan sa Diyos.
3. Unsay atong pangunang rason sa pagsangyaw?
3 Sa katuigan sa 1920, nasabtan sa katawhan sa Diyos sumala sa Kasulatan ang unibersohanong isyu nga naglangkit sa pagbayaw sa pagkasoberano sa Diyos ug sa pagbalaan sa iyang ngalan. Sa dili pa laglagon ni Jehova ang daotan aron mawagtang ang kaulawan nga gihan-ok diha sa iyang ngalan, ang kamatuoran bahin kaniya kinahanglang ‘ipahibalo sa tibuok yuta.’ (Isa. 12:4, 5; Ezeq. 38:23) Busa, ang atong pangunang katarongan sa pagsangyaw mao ang pagdayeg kang Jehova diha sa publiko ug sa pagbalaan sa iyang ngalan atubangan sa tanang katawhan. (Heb. 13:15) Ang gugma sa Diyos ug sa silingan magtukmod kanato nga bug-os makig-ambit niining buluhaton nga gihatag sa Diyos.
4. Sa unsang paagi nailhan ang mga Saksi ni Jehova uban sa ngalan sa Diyos?
4 “Usa ka Katawhan Alang sa Iyang Ngalan”: Sa 1931 gisagop nato ang ngalang mga Saksi ni Jehova. (Isa. 43:10) Sukad niadto, ang katawhan sa Diyos nagpaila sa balaang ngalan ngadto sa gidak-on nga ang librong Mga Magmamantala, panid 124, nag-ingon: “Sa daghang nasod, ang bisan kinsa nga mogamit sa dayag sa ngalang Jehova mailhan dayon nga usa sa mga Saksi ni Jehova.” Nailhan ka ba nianang paagiha? Ang pagkamapasalamaton tungod sa kaayo ni Jehova angayng magtukmod kanato sa ‘pagdayeg sa iyang ngalan,’ nga magsulti bahin kaniya sa matag haom nga kahigayonan.—Sal. 20:7; 145:1, 2, 7.
5. Sa unsang paagi ang atong panggawi nalangkit sa pagdala sa ngalan sa Diyos?
5 Ingong “usa ka katawhan alang sa iyang ngalan,” kinahanglan natong ituboy ang iyang mga sukdanan. (Buh. 15:14; 2 Tim. 2:19) Kasagaran, ang unang mamatikdan sa mga tawo bahin sa mga Saksi ni Jehova mao ang ilang maayong panggawi. (1 Ped. 2:12) Dili gayod nato gustong mapasipalahan ang iyang ngalan pinaagi sa pagtamay sa diyosnong mga prinsipyo o pinaagi sa pagbutang sa iyang pagsimba nga ikaduhang bahin diha sa atong kinabuhi. (Lev. 22:31, 32; Mal. 1:6-8, 12-14) Hinunoa, hinaot ang atong paagi sa pagkinabuhi magpakita nga atong gipakamahal ang pribilehiyo sa pagdala sa ngalan sa Diyos.
6. Unsang pribilehiyo ang atong matagamtam karon ug hangtod sa kahangtoran?
6 Karong adlawa, atong nakita ang katumanan sa giingon ni Jehova: “Sukad sa pagsubang sa adlaw bisan ngadto sa pagsalop niini ang akong ngalan mahimong dako taliwala sa kanasoran.” (Mal. 1:11) Magpadayon kita sa pagpadayag sa kamatuoran bahin kang Jehova ug “[dayegon] . . . ang iyang balaang ngalan hangtod sa panahong walay tino, bisan hangtod sa kahangtoran.”—Sal. 145:21.