Pagtanyag ug Literatura sa Teritoryong Lainlain ug Pinulongan
1. Nganong daghang kongregasyon ang nanginahanglan ug literatura nga langyaw ug pinulongan?
1 Diha sa daghan dapit, ang kanataran nagsugod sa paglakip ug mga tawong gikan sa laing mga nasod. Daghan kanila ang mas daling makakat-on ug mas makasabot pag-ayo sa kamatuoran kon sila matudloan pinaagi sa ilang kaugalingong pinulongan. Unsang mga kahikayan ang mabatonan aron mahatagan ang mga interesado ug pinasukad-sa-Bibliyang mga publikasyon diha sa pinulongan nga ilang masabtan pag-ayo?
2. Unsang kooperasyon ang gikinahanglan sa dihang duha o kapin pang mga kongregasyon nga nagsultig lainlaing mga pinulongan ang magsangyaw sa usa lang ka teritoryo?
2 Kon Kanus-a Itanyag ang Literatura: Sa dihang may duha o kapin pang mga kongregasyon nga nagsultig lainlaing mga pinulongan ang magsangyaw sa usa lang ka teritoryo, ang mga lawas sa mga ansiyano nga nalangkit angayng makigkooperar uban sa mga magtatan-aw sa pag-alagad sa pagtukod ug gikauyonang kahikayan aron ang matag grupo sa pinulongan mahatagan ug bug-os nga pagpamatuod. Sa dihang mamalaybalay, ang mga magmamantala kasagaran dili motanyag ug literatura diha sa pinulongan sa ubang mga kongregasyon. Apan, sa dihang ang mga magmamantala magsangyaw nga di-pormal o anaa sa publikong mga dapit, sila mahimong motanyag ug literatura sa mga pinulongan sa maong komunidad.
3. Kanus-a mahimong mag-estak ang kongregasyon ug literatura nga langyaw ug pinulongan?
3 Kon Kanus-a Mag-estak ug Literatura: Unsay angayng himoon kon may dakodakong populasyon nga langyaw ug pinulongan diha sa usa ka lugar apan walay kongregasyon nga nagsulti sa maong partikular nga pinulongan? Ilalom sa maong mga kahimtang, ang mga kongregasyon mahimong mag-estak ug diyutayng gidaghanon sa pangunang mga literatura nga mabatonan sa maong pinulongan, sama sa mga tract, ang mga brosyur nga Gikinahanglan ug Higala sa Diyos, ug ang librong Kahibalo. Ang mga magmamantala mahimong magtanyag sa maong mga literatura sa dihang ilang mahibalag ang mga tawo nga makabasa sa maong pinulongan.
4. Sa unsang paagi mabatonan ang literatura diha sa pinulongan nga walay estak ang kongregasyon?
4 Kon Unsaon Pag-order ug Literatura: Kon ang kongregasyon wala mag-estak ug literatura sa pinulongan nga ginabasa sa interesadong tawo, sa unsang paagi mabatonan ang literatura sa maong pinulongan? Ang magmamantala angayng magpakisayod sa alagad sa literatura aron matino kon unsang mga publikasyon ang mabatonan sa maong pinulongan aron ang gikinahanglang mga basahon maorder sa sunod nga pedido sa literatura sa kongregasyon. Kon ang order maoy alang sa Arabe, Hapones, Ininsek, Kinatsila, o Koreano, mahimo tingali kanang ikahatag gikan sa among estak dinhi sa sangang buhatan sa Pilipinas. Apan alang sa ubang mga pinulongan, kinahanglan pa kaming mag-order gikan sa ubang mga sangang buhatan, nga dangtan tingali ug pipila ka bulan.
5. Unsay atong tumong sa paghimo sa Kristohanong mga publikasyon nga mabatonan?
5 Hinaot gamiton nato sa epektibong paagi ang Kristohanong mga publikasyon aron matabangan “ang tanang matang sa mga tawo,” bisan unsa pay ilang pinulongan, nga ‘makadangat sa tukmang kahibalo sa kamatuoran ug mamaluwas.’—1 Tim. 2:3, 4.