Ang Buluhaton nga Magapalagsik
1 Ang mensahe sa Bibliya magapalagsik sa tanang modawat ug mopadapat niini sa ilang kinabuhi. (Sal. 19:7, 8) Makatabang kini kanila nga mahigawas gikan sa bakak nga mga pagtulon-an ug sa makadaot nga mga binuhatan ug nagtanyag kini ug usa ka kasaligang paglaom alang sa umaabot. Apan, kadtong modawat sa maayong balita dili kay mao ray makabenepisyo. Kadtong mopaambit sa makapalagsik nga mga kamatuoran sa Bibliya sa uban mapalagsik usab.—Prov. 11:25.
2 Napalagsik Pinaagi sa Ministeryo: Si Jesus nag-ingon nga kadtong modawat sa yugo sa Kristohanong pagkatinun-an, nga naglakip sa buluhatong pagsangyaw ug paghimog mga tinun-an, “makakaplag ug kahayahay alang sa [ilang] mga kalag.” (Mat. 11:29) Siya mismo nakakaplag nga makapalagsik ang pagsangyaw sa uban. Kadto sama ug pagkaon alang kaniya. (Juan 4:34) Sa dihang gipadala niya ang 70 ka tinun-an aron sa pagsangyaw, nalipay sila samtang nakita nila ang pagpaluyo ni Jehova sa ilang mga paningkamot.—Luc. 10:17.
3 Daghang Kristohanon karong adlawa ang napalagsik usab pinaagi sa ilang pagpakig-ambit diha sa buluhatong pagsangyaw. Usa ka sister miingon: “Ang ministeryo makapalagsik tungod kay naghatag kini ug direksiyon ug katuyoan sa akong kinabuhi. Ang personal nga mga problema ug ang mga kapit-os sa adlaw-adlaw dili na kaayo bug-at sa dihang makig-ambit ako sa pag-alagad.” Laing masibotong ministro nag-ingon: “Ang ministeryo . . . naghimo kang Jehova nga tinuod alang kanako sa adlaw-adlaw ug naghatag kanako ug kalinaw ug usa ka sukod sa pangsulod nga kalipay nga dili makab-ot sa bisan unsang laing paagi.” Pagkadakong pribilehiyo ang atong nabatonan nga mahimong “mga isigkamagbubuhat sa Diyos”!—1 Cor. 3:9.
4 Malulot ang Yugo ni Kristo: Samtang giawhag ang mga Kristohanon nga ‘manlimbasog nga kusganon,’ si Jesus wala mangayo ug labaw kay sa atong maarangang ihatag. (Luc. 13:24) Sa pagkatinuod, siya mahigugmaong nagdapit kanato nga ‘isangon ang iyang yugo uban kaniya.’ (Mat. 11:29) Kadtong kinahanglang makigbisog sa malisod nga mga kahimtang makasalig nga ang ilang tibuok-kalag nga pag-alagad, bisan pag limitado, gikahimut-an gayod sa Diyos.—Mar. 14:6-8; Col. 3:23.
5 Pagkamakapalagsik ang pag-alagad sa usa ka Diyos kinsa nagpabili gayod kon unsay atong mahimo tungod ug alang sa iyang ngalan! (Heb. 6:10) Hinaot magpadayon kita sa pagpaningkamot sa paghatag kaniya sa atong kinamaayohan.