Sundoga ang Pagkamaayo ni Jehova
1 Human matagamtam ang maanindot nga pagsalop sa adlaw o usa ka lamian nga pagkaon, dili ba kita matukmod sa pagpasalamat kang Jehova, ang Tinubdan sa tanang pagkamaayo? Ang iyang pagkamaayo magtukmod kanato nga gustong mosundog kaniya. (Sal. 119:66, 68; Efe. 5:1) Sa unsang paagi atong ikapasundayag ang hiyas sa pagkamaayo?
2 Ngadto sa mga Di-Magtutuo: Ang usa ka paagi nga atong masundog ang pagkamaayo ni Jehova maoy pinaagi sa pagpakitag sinserong kahingawa niadtong dili nato kabanay sa pagtuo. (Gal. 6:10) Ang pagpakitag pagkamaayo diha sa praktikal nga mga paagi mahimong adunay maayong epekto kon unsaon nila paglantaw ang mga Saksi ni Jehova ug ang mensahe nga atong gidala.
3 Pananglitan, samtang naghulat diha sa usa ka klinika sa doktor, usa ka batan-ong payunir nga igsoong lalaki milingkod tupad sa tigulang nga babaye nga morag mas masakiton kay sa kadaghanan sa ubang presente. Sa dihang turno na niya sa pagpakonsulta sa doktor, gipauna niya ang maong babaye inay kaniya. Sa ulahi, nahibalag niya pag-usab ang maong babaye, niadtong higayona didto sa tiyanggihan, ug nalipay kaayo ang maong babaye sa pagkakita kaniya. Bisan pag dili siya madinawaton sa maayong balita kaniadto, siya miingon nga iya na karong nailhan ang mga Saksi ni Jehova nga nahigugma gayod sa ilang mga silingan. Usa ka regular nga pagtuon sa Bibliya ang nasugdan uban kaniya.
4 Ngadto sa Atong mga Igsoon: Kita makasundog usab sa pagkamaayo ni Jehova sa dihang tabangan nato ang atong mga isigkamagtutuo. Sa mga panahon sa katalagman, kita apil sa unang moabot aron sa pagtabang sa atong mga igsoon. Ipakita nato ang samang espiritu sa dihang tabangan nato kadtong nanginahanglag transportasyon paingon sa mga tigom, duawon ang mga maluyahon, ug pasangkaron ang atong gugma alang niadtong dili kaayo nato kaila diha sa kongregasyon.—2 Cor. 6:11-13; Heb. 13:16.
5 Ang laing paagi nga si Jehova nagpakitag pagkamaayo maoy pinaagi sa iyang ‘pagkaandam mopasaylo.’ (Sal. 86:5) Agig pagsundog kaniya, ikapasundayag nato ang atong gugma sa pagkamaayo pinaagi sa pagpasaylo sa uban. (Efe. 4:32) Motabang kini aron ang atong panag-ubanay uban sa mga isigkamagtutuo mahimong ‘maayo ug makalilipay.’—Sal. 133:1-3.
6 Hinaot ang dagayang pagkamaayo ni Jehova magtukmod kanato sa pagdayeg kaniya ug magmalipayon. Ug hinaot magtukmod kini kanato sa pagpaningkamot sa pagsundog sa iyang pagkamaayo diha sa tanan natong himoon.—Sal. 145:7; Jer. 31:12.