Mga Batan-on—Himoa ang Maayong Patukoranan Alang sa Umalabot
1. Nganong kinahanglang ugmaron sa Kristohanong mga batan-on ang lig-ong pagtuo?
1 Unsay labing hinungdanon sa imong hunahuna? Unsay imong nahunahunaan? Ang imo bang pangunang gikabalak-an nasentro sa presenteng mga butang, o gikabalak-an mo ba ang umaabot ug nasentro ang imong hunahuna sa kon unsay gisaad sa Diyos? (Mat. 6:24, 31-33; Luc. 8:14) Gikinahanglan ang lig-ong pagtuo aron molihok maylabot sa mga saad sa Diyos, ingon sa gibutyag gikan sa mga panig-ingnan ni Abraham ug Moises. (Heb. 11:8-10, 24-26) Sa unsang paagi imong maugmad ang maong pagtuo ug makahimog “usa ka maayong patukoranan alang sa umalabot”?—1 Tim. 6:19.
2. Unsay atong makat-onan gikan sa panig-ingnan ni Haring Josias?
2 Pangitaa si Jehova: Kon ikaw adunay rutina sa espirituwal nga kalihokan uban sa imong pamilya, dalayegon kana. Apan ayawg hunahunaa nga ang maong rutina awtomatikong magpatunghag lig-ong pagtuo. Aron makaplagan “ang mismong kahibalo sa Diyos,” kinahanglang personal nimong pangitaon si Jehova. (Prov. 2:3-5; 1 Cron. 28:9) Mao kanay gihimo sa batan-on nga Haring Josias. Bisan pag nagdako diha sa dili maayong espirituwal nga palibot, “siya misugod sa pagpangita sa Diyos ni David nga iyang katigulangan” sa dihang siya nag-edad ug 15 anyos.—2 Cron. 34:3.
3. Sa unsang paagi ang batan-ong mga Kristohanon karong adlawa makapangita kang Jehova?
3 Unsaon nimo pagpangita si Jehova? Pinaagi sa mainampingong pagsusi sa imong gituohan ug ‘pamatud-an sa imong kaugalingon’ nga kana mao gayod ang kamatuoran. (Roma 12:2) Pananglitan, mapatin-aw mo ba kon unsay giingon sa Bibliya bahin sa dugo o mapamatud-an mo ba nga ang Gingharian sa Diyos nagsugod na sa pagmando didto sa langit sa 1914? Ang pagbaton ug “tukmang kahibalo sa kamatuoran” maoy hinungdanong bahin sa paghimo ug maayong patukoranan alang sa umalabot.—1 Tim. 2:3, 4.
4. Sa unsang paagi ikapadayag sa di-bawtismadong mga magmamantala ang ilang pag-uswag?
4 Ang pagpangita ni Josias sa Diyos nagpatungha ug maayong mga resulta. Sa wala pa siya mag-edad ug 20, milihok siya nga maisogon aron wagtangon ang bakak nga pagsimba diha sa nasod. (2 Cron. 34:3-7) Sa samang paagi, ang imong espirituwal nga pag-uswag madayag pinaagi sa imong mga binuhatan. (1 Tim. 4:15) Kon ikaw usa ka di-bawtismadong magmamantala, paningkamoting mouswag ang kalidad sa imong ministeryo. Ayaw pagkakontento sa pagtanyag lamang ug literatura. Himoang tumong ang paggamit sa Bibliya, pagpangatarongan uban sa mga tawo, ug pag-ugmad sa interes nga imong makaplagan. (Roma 12:7) Kini motabang kanimo nga motubo sa espirituwal.
5. Unsang mga kahigayonan sa pagpalapad sa ilang ministeryo ang mabatonan sa bawtismadong mga Kristohanon?
5 Ihatag Kang Jehova ang Imong Kinamaayohan: Sa dihang imong pasimbolohan ang imong pagpahinungod kang Jehova pinaagi sa pagpabawtismo, ikaw mahimong ordinadong ministro sa Diyos. (2 Cor. 3:5, 6) Kini magbukas ug mga kahigayonan alang kanimo sa pag-alagad kang Jehova nga bug-os-panahon. Naglakip kini sa pagpayunir maingon man sa pag-alagad sa Bethel, misyonaryo, ug internasyonal nga pag-alagad. Ang lain pang mga paagi sa pagpalapad sa imong ministeryo mao ang pagkat-on ug laing pinulongan o pagbalhin sa dapit diin dunay mas dakong panginahanglan.
6. Sa unsang paagi kitang tanan makahimo ug usa ka maayong patukoranan alang sa umalabot?
6 Siyempre, dili tanan ang makaarang sa pagpakig-ambit niining mga pribilehiyoa sa pag-alagad, apan ang matag usa kanato makahatag kang Jehova sa iyang kinamaayohan. (Mat. 22:37) Bisan unsa pay imong mga kahimtang, himoa ang pag-alagad kang Jehova nga maoy panguna sa imong kinabuhi. (Sal. 16:5) Pinaagi sa pagbuhat niana, ikaw magatukod ug usa ka maayong patukoranan alang sa umalabot.