Ang Pagdayeg Magapalagsik
1 “Di ba nagbinuotan man ko karong adlawa?” mibakho ang batang babaye sa panahon sa tingkatulog. Nahingangha ang inahan sa maong pangutana. Bisan pag nakamatikod sa paningkamot sa batang babaye nga magbinuotan nianang adlawa, ang inahan wala gayod makasulti bisag usa ka pulong sa pagdayeg. Ang mga luha sa batang babaye angayng magpahinumdom nga kitang tanan—mga batag tigulang—nagkinahanglan ug pagdayeg. Gipalagsik ba nato kadtong anaa sa atong palibot pinaagi sa pagpahayag ug apresasyon sa maayong butang nga ilang nahimo?—Prov. 25:11.
2 Adunay daghang maayong mga katarongan nga atong dayegon ang atong mga isigka-Kristohanon. Ang mga ansiyano, ministeryal nga mga alagad, ug mga payunir naningkamot pag-ayo sa pagtuman sa ilang mga responsabilidad. (1 Tim. 4:10; 5:17) Ang mahinadlokon-sa-Diyos nga mga ginikanan naghimo kutob sa ilang maarangan sa pagmatuto sa ilang mga anak diha sa mga dalan ni Jehova. (Efe. 6:4) Ang Kristohanong mga batan-on nakigbisog gayod sa pagsukol sa “espiritu sa kalibotan.” (1 Cor. 2:12; Efe. 2:1-3) Ang uban matinumanong nag-alagad kang Jehova bisan sa katigulangon, mga suliran sa panglawas, o ubang mga pagsulay. (2 Cor. 12:7) Silang tanan takos nga dayegon. Ato bang gipasalamatan ang ilang dalayegon nga mga paningkamot?
3 Personal ug Espesipiko: Malipay gayod kitang tanan sa pagkabati ug pagdayeg gikan sa plataporma. Apan, ang pagdayeg mas makapalagsik pa gayod kon kini personal nga itumong kanato. Pananglitan, diha sa kapitulo 16 sa iyang sulat ngadto sa mga taga-Roma, si Pablo mihimog espesipikong mga kapahayagan sa pagdayeg mahitungod kang Febe, Prisca ug Aquila, Trifena ug Trifosa, ug Persida, ug sa uban pa. (Roma 16:1-4, 12) Pagkamakapalagsik gayod sa iyang mga pulong ngadto sa maong matinumanong mga igsoon! Ang maong pagdayeg nagpasalig sa atong mga igsoong lalaki ug babaye nga sila gikinahanglan ug magpasuod pa gayod kanato. Nakahatag ka na bag espesipikong personal nga pagdayeg di pa dugay?—Efe. 4:29.
4 Kinasingkasing: Aron mahimong tinuod nga makapalagsik, ang pagdayeg kinahanglang sinsero. Mailhan sa mga tawo kon kita nagsulti ba nga kinasingkasing o “nagaulog-ulog” lamang. (Prov. 28:23) Samtang atong bansayon ang atong kaugalingon sa pagtan-aw ug maayong mga hiyas diha sa uban, ang atong kasingkasing matukmod sa pagdayeg. Hinaot magmadagayaon kita sa paghatag ug tinuod nga pagdayeg, sa pagkasayod nga “ang usa ka pulong sa hustong panahon Oh pagkamaayo!”—Prov. 15:23.