Usa ka Buluhaton nga Gipaluyohan sa Diyos

¹ Taliwala sa mga alagad sa Diyos karon, dili daghan ang nakabaton ug taas nga edukasyon, bahandi, o pagkainila niining presenteng sistema sa mga butang. Tungod niana, isalikway sa ubang mga tawo ang atong ministeryo ingong walay kapuslanan. (Isa. 53:3) Bisan pa niana, ang edukasyonal nga buluhaton sa Bibliya nga atong ginahimo nakahatag ug kahupayan ug paglaom sa milyonmilyong katawhan sa tibuok kalibotan. Sa unsang paagi nakab-ot sa ordinaryong mga tawo ang maong talagsaong mga resulta? Pinaagi lamang sa pagpaluyo sa Diyos. (Mat. 28:​19, 20; Buh. 1:8) “Gipili sa Diyos ang mahuyang nga mga butang sa kalibotan,” miingon si apostol Pablo, “aron iyang mapakaulawan ang kusganong mga butang.”​—1 Cor. 1:26-29.

² Ang kadaghanan sa mga apostoles ug mga Kristohanon sa unang siglo maoy “dili edukado ug ordinaryo.” (Buh. 4:13) Bisan pa niana, sila maisogong nagtuman sa gisugo kanila nga iwali ang maayong balita, ug gipanalanginan ni Jehova ang ilang mga paningkamot. Bisan pa sa mga babag ug pagsupak, ‘ang pulong ni Jehova padayong mikaylap ug nagmadaogon sa gamhanang paagi.’ Walay nakapahunong sa maong buluhaton tungod kay gipaluyohan kini sa Diyos. (Buh. 5:​38, 39; 19:20) Tinuod usab kini sa modernong mga panahon. Bisan ang kusganong pagsupak sa gamhanang mga magmamando wala makapugong sa maayong balita nga mahimong madaogon ug makaylapon.​—Isa. 54:17.

³ Iya sa Diyos ang Tanang Pagdayeg: Ang ato bang pinaborang kahimtang ingong mga ministro sa Diyos naghatag kanatog katarongan sa pagpasigarbo sa atong kaugalingon? Wala gayod. Nagpunting sa Kristohanong ministeryo, si Pablo misulat: “Nabatonan namo kini nga bahandi diha sa mga sudlanan nga kulonon, aron ang gahom nga labaw sa kasarangan maiya sa Diyos ug dili gikan sa among kaugalingon.” (2 Cor. 4:7) Giila ni Pablo nga natuman niya ang iyang ministeryo tungod lang sa kusog nga gihatag sa Diyos.​—Efe. 6:​19, 20; Filip. 4:13.

⁴ Angay usab natong ilhon nga tungod lang kay atong ‘nabatonan ang tabang nga gikan sa Diyos’ nga milampos ang buluhatong pagwali. (Buh. 26:22) Pinaagi sa maong tibuok-kalibotang pagmantala, gigamit kita ni Jehova sa gamhanang paagi aron uyogon ang kanasoran​—usa ka ilhanan nga ang mahukmanong kalaglagan hapit nang moabot. (Hag. 2:7) Pagkadako sa atong pribilehiyo nga mahimong “isigkamagbubuhat sa Diyos” diha sa dakong espirituwal nga pagpangani!​—1 Cor. 3:6-9.