Pabilhi ang Inyong Pribilehiyo sa Pagsangyaw
1. Unsay pag-isip sa kadaghanan sa atong buluhatong pagsangyaw?
1 Daghang tawo sa kalibotan ni Satanas ang nag-isip sa atong buluhatong pagsangyaw ingong “kabuangan.” (1 Cor. 1:18-21) Kon dili magbantay, kining sayop nga panglantaw makapaluya kanato ug mawad-an kitag kadasig. (Prov. 24:10; Isa. 5:20) Nganong angay natong pabilhan ang atong pribilehiyo ingong mga Saksi ni Jehova?—Isa. 43:10.
2. Nganong ang ministeryo usa ka “balaang buluhaton”?
2 “Balaang Buluhaton”: Si apostol Pablo naghisgot nga ang ministeryo “balaang buluhaton.” (Roma 15:15, 16) Nganong ang ministeryo usa ka “balaang buluhaton”? Ang pagpakigbahin niini maghimo kanatong “mga isigkamagbubuhat” sa “Balaang Usa,” si Jehova, ug kini makaamot sa pagbalaan sa iyang ngalan. (1 Cor. 3:9; 1 Ped. 1:15) Giisip ni Jehova ang atong pagsangyaw ingong “halad sa pagdayeg,” busa ang ministeryo hinungdanong bahin sa atong pagsimba.—Heb. 13:15.
3. Nganong ang pagsangyaw sa maayong balita usa ka dakong pribilehiyo?
3 Ang pagsangyaw sa maayong balita usa ka dakong pribilehiyo nga gihatag lamang ngadto sa pipila. Malipay unta ang mga manulonda nga mohimo sa maong buluhaton ug seguradong epektibo kaayo sila niana. (1 Ped. 1:12) Apan, si Jehova nagpili sa dili hingpit nga mga tawo, “mga sudlanan nga kulonon,” alang niining talagsaong pribilehiyo!—2 Cor. 4:7.
4. Sa unsang paagi ikapakita nato nga atong gipabilhan ang ministeryo?
4 Prioridad: Kay gipabilhan gayod nato ang atong ministeryo, giisip nato kini ingong usa sa “mas hinungdanong mga butang” sa atong kinabuhi. (Filip. 1:10) Busa, mag-eskedyul kitag panahon kada semana alang niini. Ang usa ka musikero nga nagpabili sa iyang pribilehiyo sa pagtugtog diha sa bantog kaayong orkestra mangandam alang sa matag pasundayag ug maningkamot sa pagpauswag sa iyang kahanas. Sa susama, kita mangandam sa dili pa mosangyaw aron atong ‘magamit ang pulong sa kamatuoran sa hustong paagi,’ ug maningkamot sa pagpauswag sa atong “arte sa pagpanudlo.”—2 Tim. 2:15; 4:2.
5. Kinsay nagpabili sa atong ministeryo?
5 Ayawg tugoti nga ang panglantaw sa kadaghanan makapaluya kanimo. Hinumdomi, daghan pa sa atong teritoryo ang malipay sa atong mga pagduaw. Hinuon, ang pagpahimuot sa mga tawo dili mao ang atong gitinguha. Ang pagbati ni Jehova mao ang labawng hinungdanon, ug siya nagpabili gayod sa atong pagkamakugihon.—Isa. 52:7.