Gipiyalan ug Usa ka Bahandi
1 Gipabilhan gayod ni apostol Pablo ang iyang hinatag-Diyos nga buluhatong pagsangyaw ug iya kining gitawag nga usa ka “bahandi.” (2 Cor. 4:7) Iyang giantos ang mga kalisdanan ug paglutos sa pagtuman nianang buluhatona. Makugihon niyang gisangyawan ang tanan nga iyang makaplagan. Siya mihimog daghang malisod ug peligroso nga mga panaw sa yuta man o sa dagat. Sa unsang paagi kita makasundog kang Pablo ug makapasundayag nga atong gimahal ang atong ministeryo? (Roma 11:13) Unsay nagpahimo sa atong ministeryo nga usa ka bililhon kaayong bahandi?
2 Usa ka Mas Maayong Bahandi: Ang yutan-ong mga bahandi subsob nga dinuyogan ug kasakit ug makahatag lamang ug limitado o temporaryong mga kaayohan. Sa laing bahin, ang atong ministeryo makahatag ug dumalayong mga kaayohan kanato ug sa uban. (1 Tim. 4:16) Kini motabang sa sinserong mga tawo sa pagkahibalo bahin kang Jehova, sa paghimog gikinahanglang mga kausaban sa ilang mga kinabuhi, ug sa pagbaton ug tinuod nga paglaom nga kinabuhing walay kataposan. (Roma 10:13-15) Pinaagi sa pagpabili pag-ayo sa atong ministeryo, kita makabaton ug mapuslanong katuyoan sa kinabuhi, usa ka dumalayong pagbati sa kalamposan, ug usa ka makapadasig nga paglaom alang sa umaabot.—1 Cor. 15:58.
3 Ipasundayag nga Imong Gipabilhan ang Imong Bahandi: Ang atong pagpabili sa usa ka butang subsob nga ikapasundayag pinaagi sa atong pagkaandam mosakripisyo alang niana. Dako gayod ang atong pribilehiyo nga magamit ang atong panahon ug kusog sa pagdayeg kang Jehova! (Efe. 5:16, 17) Ang atong paagi sa paggamit sa atong panahon kinahanglang magpakita nga mas gipabilhan nato ang espirituwal nga mga butang kay sa materyal nga mga pangagpas. Sanglit bililhon man kaayo ang mensahe nga atong ipaambit, kita buot mosangyaw nga madasigon ug magmaalisto sa pagsulti sa maayong balita sa tanang kahigayonan.
4 Ang bililhon kaayong mga bahandi kasagarang wala tagoi kondili gidispley aron makita sa uban. Kon atong giisip ang atong ministeryo ingong usa ka bahandi, kini angayng mahimong pangunang bahin sa atong kinabuhi. (Mat. 5:14-16) Kay nahupngan ang kasingkasing sa pagkamapasalamaton, hinaot atong sundogon kanunay si apostol Pablo ug pahimuslan ang tanang kahigayonan sa pagpakita nga kita tinuod nga nagpabili sa atong ministeryo, nga nag-isip niini nga usa ka bahandi.