Kanunayng Pagtambong sa Tigom​—Usa ka Unahonon

¹ Kinahanglang unahon sa Kristohanong mga pamilya ang kanunay nga pagtambong sa mga tigom sa kongregasyon. Apan ang mga kinahanglanon sa kinabuhi karon makahatag ug suliran. Ang mga buluhaton sa balay, sekular nga trabaho, o buluhaton sa eskuylahan misugod na ba sa pag-agaw sa panahon nga gigahin alang sa pagsimba kang Jehova? Ang paglantaw sa mga butang sumala sa panglantaw ni Jehova motabang kanato sa padayong pagtuman sa atong mga unahonon.​—1 Sam. 24:6; 26:11.

² Pinaagi sa pagpangahoy panahon sa Igpapahulay, usa ka lalaking Israelinhon tinuyong wala magtagad sa panglantaw ni Jehova. Siya tingali nangatarongan nga gihimo niya kadto para sa iyang pamilya o usa lamang kadto ka gamayng butang. Apan, pinaagi sa gipahamtang nga silot, gipakita ni Jehova nga ang paghimog ginagmayng mga kalihokan sulod sa gitakdang mga panahon alang sa pagsimba maoy seryosong butang.​—Num. 15:32-36.

³ Pagbuntog sa Suliran: Alang sa daghan kini maoy pagpakigbisog nga dili makabalda ang sekular nga trabaho sa pagtambong sa tigom. Nabuntog sa uban kining sulirana pinaagi sa pagpakigsulti sa ilang amo, pagpakig-ilis ug oras sa pagtrabaho sa ilang mga isigkatrabahante, pagpangitag mas haom nga trabaho, o pagpayano sa ilang estilo sa kinabuhi. Sa walay duhaduha, ang maong mga sakripisyo alang sa matuod nga pagsimba makapahimuot gayod sa Diyos.​—Heb. 13:16.

⁴ Ang mga buluhaton sa eskuylahan makahatag usab ug suliran. “Himoon nako ang pipila sa akong mga homwork sa eskuylahan sa dili pa motambong sa tigom ug ang nahibilin inig-uli na nako sa balay,” matod sa usa ka batan-on. Kon ang tanang giasayn nga homwork dili matapos sa mga gabiing panahon sa tigom, ang ubang mga ginikanan nakigsulti sa mga magtutudlo nga ang pagtambong sa Kristohanong mga tigom maoy unahonon alang sa ilang pamilya.

⁵ Ang kooperasyon ug maayong pagplano maoy mga yawi sa pagpalampos sa mga buluhaton sa panimalay aron makapangandam ang pamilya nga dili maulahi sa pagtambong sa mga tigom. (Prov. 20:18) Bisan ang gagmayng mga anak mahimong matudloan sa pag-ilis ug pagpangandam sa dili pa mobiya alang sa tigom sa gitakdang oras. Pinaagi sa ilang panig-ingnan, ikasilsil sa mga ginikanan nganha sa ilang mga anak ang kahinungdanon sa mga tigom.​—Prov. 20:7.

⁶ Samtang mograbe ang mga pagpit-os niining presenteng sistema sa mga butang, hinungdanon nga makanunayon kitang motambong sa mga tigom sa kongregasyon. Hinaot padayon natong lantawon ang mga butang sumala sa panglantaw ni Jehova ug himoon ang kanunayng pagtambong sa tigom nga usa ka unahonon.​—Heb. 10:​24, 25.