Pahimusli ang Pagtuon sa Pakigsuod Kang Jehova
1 Didto sa “Masibotong mga Magmamantala sa Gingharian” nga Distritong Kombensiyon, kita nalipay sa pagdawat sa librong Pakigsuod Kang Jehova. Daghan ang nagbasa gilayon sa maong libro. Walay duhaduha nga mas daghan pa ang natukmod sa paghimo niana tungod sa tinuig nga teksto sa 2003: “Duol sa Diyos, ug siya moduol kaninyo.”—Sant. 4:8.
2 Sa Marso atong sugdan paghisgot ang Pakigsuod Kang Jehova diha sa atong Pagtuon sa Libro sa Kongregasyon. Sa unsang paagi atong mapahimuslan ang labing maayo gikan sa atong pagtuon? Hinungdanon ang pagpangandam. Duha ka semana ang igahin alang sa matag kapitulo, nga pipila lang ka parapo ang gieskedyul nga tun-an matag semana. Kini magtugot ug igong panahon alang sa imong kinasingkasing nga mga komento nga gipasukad sa imong pagtuon ug pagpamalandong sa maong tun-anan. Dugang pa, mas diyutayng mga parapo ang pagatun-an sulod sa mga semana diin repasohon ang hinapos nga bahin sa usa ka kapitulo, aron dunay igong panahon nga magamit alang sa linaing bahin sa maong libro.
3 Sugod sa kapitulo 2, usa ka kahon nga nag-ulohang “Mga Pangutana nga Palandongon” makita duol sa kataposan sa matag kapitulo. Human mahisgoti ang kataposang parapo sa kapitulo, hisgotan sa magtatan-aw sa pagtuon sa libro ang maong kahon uban sa grupo. Dasigon niya ang mga membro sa grupo sa pagpahayag sa ilang mga hunahuna, nga magsaysay sa maayong mga resulta sa ilang pagpamalandong sa Kasulatan. (Prov. 20:5) Gawas pa sa mga pangutana nga gitagana diha sa kahon, siya usahay mosukna sama sa mosunod: “Unsay gisulti niining impormasyona kanimo bahin kang Jehova? Sa unsang paagi kini makaapektar sa imong kinabuhi? Sa unsang paagi imong magamit kini sa pagtabang sa uban?” Ang iyang tumong mao ang pagkuha sa kinasingkasing nga mga komento, dili ang pagpangutana sa grupo mahitungod sa ginagmayng mga detalye.
4 Ang Pakigsuod Kang Jehova lahi kay sa ubang mga tun-anan. Bisan tuod ang ubang mga publikasyon sa “matinumanon ug maalamong ulipon” naghimaya kang Jehova, ang bug-os nga katuyoan niining libroha mao ang paghisgot sa mga hiyas ni Jehova. (Mat. 24:45-47) Pagkaanindot nga kahigayonan ang naghulat kanato! Kita makapahimulos pag-ayo gikan sa matugkaron nga pagtuon sa personalidad ni Jehova. Hinaot kini nga pagtuon motabang kanato nga mas masuod sa atong langitnong Amahan, ug hinaot kita mahimong mas epektibo sa pagtabang sa uban nga mas masuod usab kaniya.