Pagtuon sa Librong Simbaha ang Diyos

Ang Simbaha ang Bugtong Matuod nga Diyos gidisenyo nga tun-an uban sa mga bag-ohan inigkahuman nilag tuon sa librong Kahibalo. Ang atong pagtuon niining publikasyona diha sa Pagtuon sa Libro sa Kongregasyon magsangkap kanato sa paggamit niining libroha diha sa ministeryo ug motabang kanato sa pagpalalom sa atong gugma ug pagpabili kang Jehova ug sa iyang organisasyon. Sa unsang paagi kita makabenepisyo sa bug-os gikan sa atong pagtuon sa librong Simbaha ang Diyos?

Pagdumala sa Pagtuon: Sanglit ato mang tun-an ang tibuok kapitulo matag semana, ang mga magtatan-aw sa pagtuon kinahanglang magbahinbahin sa panahon sa maalamong paagi. Dili tingali nila gustong dugayon ang paghisgot sa nag-unang mga parapo aron mas daghang panahon ang magugol sa mas hinungdanong bahin sa tun-anan, nga kasagarang makita sa hinapos nga bahin sa kapitulo. Ang mubong paghisgot sa kahon sa repaso sa kataposan sa matag pagtuon motabang niadtong nanambong sa paghinumdom sa pangunang mga punto.

Ang matuhopong mga pangutana alang sa pagpamalandong ug panaghisgot makita sa halos katunga sa mga kapitulo sa librong Simbaha ang Diyos. Ang usa ka pananglitan makaplagan sa mga panid 48-9. Dili na kinahanglang basahon ang maong mga pangutana uban sa mga parapo. Sa dihang tagdon kana uban sa grupo, kinahanglang ipabasa sa magtatan-aw ang gisitar nga mga teksto ug hisgotan kana segun sa itugot sa panahon.

Abanteng Pagpangandam: Ang pagpangandam pag-ayo sa pagtuon naglangkit ug labaw pa kay sa pagbadlis sa mga tubag. Ang mainampoong pagpamalandong sa gisitar nga mga teksto magpaarang kanato sa pag-andam dili lang sa atong mga komento kondili, labawng hinungdanon, sa atong kasingkasing. (Esd. 7:10) Kitang tanan makaamot sa pagdinasigay pinaagi sa atong kasarangang pagkomento.​—Roma 1:​11, 12.

Ang atong pagtuon sa librong Simbaha ang Diyos motabang kanato nga masuod kang Jehova ug magsangkap kanato sa pagtabang sa matinud-anog-kasingkasing nga mga tawo sa pagduyog kanato sa pagsimba kaniya. (Sal. 95:6; Sant. 4:8) Hinaot nga kitang tanan makapahimulos pag-ayo gikan niining maayong espirituwal nga tagana.