Espirituwal nga Pagkaon sa Hustong Panahon

1. Sa unsang paagi ang Ezequiel 36:29 natuman karong adlawa?

¹ “[Ako] magatawag sa mga lugas ug padagayaon kini, ug walay gutom nga akong ipadangat kaninyo,” nag-ingon ang Soberanong Ginoong Jehova. (Ezeq. 36:29) Ang maong matagnaong mga pulong mapadapat sa katawhan sa Diyos karon. Sa mahulagwayong pagkasulti, si Jehova dagayang nagpatubo sa mga lugas nga makasustento sa kinabuhi alang sa iyang katawhan. Ang tukma-sa-panahong espirituwal nga pagkaon nga gitagana pinaagi sa atong distritong mga kombensiyon tin-awng nag-ilustrar niining kamatuorana.

2. Sa unsang paagi gigamit ni Jehova ang distritong mga kombensiyon sa pagtagana ug espirituwal nga pagkaon sa hustong panahon?

² Sa kombensiyon nga gihimo didto sa Columbus, Ohio, sa 1931, gigiyahan ni Jehova ang iyang mga magsisimba sa pagsagop ug bag-ong ngalan​—Mga Saksi ni Jehova. (Isa. 43:10-12) Sa 1935 ang dakong panon sa Pinadayag 7:9-17 tukmang nailhan. Sa 1942, si Igsoong Knorr nagpahayag sa pakigpulong nga “Kalinaw​—Molungtad ba Kaha Kini?” Ang maong pakigpulong mihatag ug dugang kadasig sa tibuok-kalibotan nga buluhatong pagsangyaw ug mitultol ngadto sa pagkatukod sa Watchtower Bible School of Gilead. Bisan tuod ang pipila ka kombensiyon halandomon kaayo, ang matag kombensiyon maoy dagaya sa makapahimsog espirituwal nga pagkaon nga gihatag sa hustong panahon.​—Sal. 23:5; Mat. 24:45.

3. Unsay kinahanglan natong himoon aron makabenepisyo gikan sa espirituwal nga bangkete didto sa atong distritong kombensiyon?

3 Unsa ka Maayo ang Imong Paagi sa Pagkaon? Posibleng malibotan ug daghang pagkaon, apan kulang gihapon ug sustansiya kon kita dili maningkamot sa pagkaon. (Prov. 26:15) Tinuod usab kana sa espirituwal nga diwa. Didto sa pipila ka kombensiyon, namatikdan nga daghan ang naglakawlakaw nga wala kinahanglana o nakigtabi sa uban panahon sa programa. Bisan tuod ang makapalig-on nga panag-ubanay usa ka hinungdanong bahin sa kombensiyon, apan kini angayng himoon sa dili pa o human sa matag sesyon. (Eccl. 3:​1, 7) Kon kita wala maminaw pag-ayo diha sa atong mga lingkoranan, hayan masayloan nato ang hinungdanong punto. Ang mga magtatan-aw sa departamento sa kombensiyon ug ang mga igsoon nga dunay mga asaynment kinahanglan tingaling maghisgot usahay sa mga butang labot sa kombensiyon samtang nagpadayon pa ang sesyon. Gawas niana, sila angayng maghatag ug panig-ingnan pinaagi sa ilang pagpaminaw pag-ayo sa programa. Dili nato angayng sipyaton ang bisan unsang espirituwal nga pagkaon nga gitagana.​—1 Cor. 10:12; Filip. 2:12.

4. Sa unsang paagi atong ikapakita nga kita mapasalamaton sa dagayang tagana ni Jehova?

⁴ Pagkadako sa atong kalipay sa dagayang espirituwal nga mga kamatuoran nga gitagana ni Jehova, kon itandi sa walay-sustansiya nga bakak nga mga doktrina sa Kakristiyanohan! (Isa. 65:​13, 14) Ang usa ka paagi nga kita “magmapasalamaton” maoy pinaagi sa pag-isip sa kombensiyon ingong kahigayonan nga matudloan ni Jehova. (Col. 3:15) Ipunting ang imong pagtagad sa mensahe, dili sa mamumulong, ug isipa ang mensahe nga nagagikan sa atong “Dakong Instruktor.” (Isa. 30:​20, 21; 54:13) Paminaw pag-ayo. Isulat ang mugbong mga nota sa hinungdanong mga punto. Repasoha ang pangunang mga punto sa programa matag gabii. Ipadapat ang imong nakat-onan.

5. Unsay mga katarongan nga kita magmalipayon tungod sa distritong mga kombensiyon?

⁵ Ang matag kombensiyon sa dili pa moabot ang Armagedon, ginahimo man kini diha sa kampo sa mga kagiw, sa nasod nga nagusbat sa gubat, o diha sa mas malinawong kahimtang, maoy kadaogan batok kang Satanas! Ingong nahiusang kapunongan sa mga igsoon, atong gipabilhan ang atong mga kahigayonan nga magkatigom panahon sa distritong mga kombensiyon. (Ezeq. 36:38) Masaligon kita nga sa makausa pa si Jehova mahigugmaong magtagana kanato ug “pagkaon sa hustong panahon.”​—Luc. 12:42.

[Kahon sa panid 4]

Ipakita ang Pagpabili sa Lamesa ni Jehova

◼ Paminaw pag-ayo

◼ Isulat ang hinungdanong mga punto

◼ Repasoha ang pangunang mga punto sa programa matag gabii

◼ Ipadapat ang imong nakat-onan