Ministerial Training School—Usa ka Dakong Pultahan nga Nagatultol Ngadto sa Kalihokan
1 Pinaagi ni propetang Jeremias, si Jehova nagtagna: “Ako magbangon ibabaw [sa akong katawhan] ug mga magbalantay nga magabantay kanila; ug sila dili na mahadlok, ni sila malisang, ug walay mawala.” (Jer. 23:4) Ang maong buluhaton sa pagkamagbalantay ginapalampos karon taliwala sa katawhan sa tanang kanasoran. Ginahimo kini pinaagi sa tinagpulo ka libong ansiyano sa kongregasyon. Dugang pa, ang grupo sa mga batan-ong lalaki nga ingon ka daghan sa mga yamog mahinangpong nagtanyag sa ilang kaugalingon sa pag-alagad kang Jehova. (Sal. 110:3) Pagkadakong panalangin niining mapaubsanong mga igsoon diha sa mga kongregasyon sa katawhan sa Diyos! Samtang magpadayon ang buluhatong espirituwal nga pagpanigom, aduna pay panginahanglan sa kuwalipikadong mga lalaki nga andam sa pag-alagad sa ilang mga igsoon.
2 Ang maayong tagana sa pagbansay sa walay asawang mga ansiyano ug ministeryal nga mga alagad alang sa dugang nga mga kaakohan mao ang Ministerial Training School. Kapin sa 22,000 ka estudyante gikan sa 140 ka nasod ang nabansay na diha sa 999 ka klase nga gipahigayon sukad sa pagsugod sa tunghaan niadtong 1987. Sukad niadtong 1994, 40 ka klase ang gipahigayon sa Pilipinas, ug 1,037 ka estudyante ang migraduwar. Bisan tuod ang mga klase temporaryong gihunong aron mahimo ang Traveling Overseers School, dunay mga plano nga padayonon ang mga klase sa Pilipinas sa Enero, 2006. Alang niadtong migraduwar na, ang tunghaan napamatud-an gayod nga “usa ka dakong pultahan nga nagatultol ngadto sa kalihokan.”—1 Cor. 16:9.
3 Katuyoan sa Tunghaan: Ang tumong sa Ministerial Training School mao ang pagbansay ug pagsangkap sa kuwalipikadong mga lalaki alang sa mga kaakohan bisan diin nga adunay panginahanglan sa organisasyon. Gipausbaw sa tunghaan ang ilang mga katakos sa pagpanguna sa pag-ebanghelyo, pagpakig-ambit sa pag-atiman sa panon, ug pagtudlo diha sa kongregasyon. Human mograduwar, ang pipila ka estudyante gibansay ingong nagapanaw nga mga magtatan-aw sa Pilipinas, samtang ang uban giasayn sa ubang nasod ingong mga misyonaryo. Ang uban nakadawat ug mga asaynment sa pag-alagad diha sa ila mismong mga kongregasyon o sa mga dapit diin dunay mas dakong panginahanglan sulod sa teritoryo sa sanga.
4 Sulod sa walo ka semana nga kurso, ang mga estudyante maghimog dulot nga pagtuon sa Bibliya. Maampingon nilang tagdon ang daghan kaayong pagtulon-an sa Bibliya maingon man ang mga kaakohan sa pagkamagbalantay ug mga lagda sa pagdumala sa mga problema bahin sa Kristohanong pagkinabuhi. Makakat-on usab sila sa gitudlo sa Kasulatan bahin sa administratibo, hudisyal, ug organisasyonal nga mga butang. Makadawat silag linaing pagbansay sa pagsulti diha sa publiko ug hatagag personal nga tabang aron mapalambo ang ilang espirituwal nga pag-uswag.
5 Mga Kinahanglanon: Nga masabtan, ang mga kinahanglanon sa pagtambong sa tunghaan maoy taas. Ang mga aplikante kinahanglang nag-alagad na ingong mga ansiyano o ministeryal nga mga alagad sa labing menos duha ka sunodsunod nga tuig. Ang tanan kinahanglang walay asawa ug tali sa pangedaron nga 23 ug 50. Sa Pilipinas, ang mga aplikante kinahanglang makabasa, makasulat, ug makasulti ug Ingles, ug kinahanglan nga sila maayog panglawas, nga wala magkinahanglan ug linaing pag-atiman o diyeta. Maoy palabihon kadtong nag-alagad nga mga regular payunir.
6 Kadtong moboluntaryo kinahanglang andam ug makaarang sa pag-alagad bisan diin nga sila gikinahanglan. Nagkinahanglan kinig espiritu nga sama sa propetang si Isaias, nga madasigong nagtanyag sa iyang kaugalingon sa pagbuhat sa usa ka linaing buluhaton, nga nag-ingon: “Ania ako! Ipadala ako.” (Isa. 6:8) Nagmapaubsanon usab siya sa tibuok niyang kinabuhi. Kadtong moaplay sa Ministerial Training School kinahanglang palihokon sa gugma sa ilang mga igsoon ug sa tinguha sa pag-alagad kanila inay ang tinguha nga mahimong inila. Human makadawat sa maong maayong pagbansay, ang mga graduwado gidahom sa pagpadapat sa ilang makat-onan alang sa kaayohan sa uban.—Luc. 12:48.
7 Mga Kaayohan: Sulod sa walo ka semana sa dakong pagbansay, ang mga graduwado nahimong “inamoma sa mga pulong sa pagtuo ug sa maayong pagtulon-an.” (1 Tim. 4:6) Kini nagsangkap kanila sa pagtabang ug pagdasig sa uban diha sa ilang natudlo nga mga kongregasyon ug mga sirkito. Sa daghang dapit nga giasayn ang mga graduwado sa Ministerial Training School, miuswag ang kalihokan sa kanataran; ang pagpayunir nadasig, ilabina taliwala sa mga batan-on; ug nahatag ang dugang personal nga tabang ngadto sa daghang bag-ohan nga nakig-uban sa katawhan sa Diyos.
8 Ikaw ba usa ka ansiyano o ministeryal nga alagad nga walay asawa tali sa pangedarong 23 ug 50? Nganong dili maghunahuna sa pag-aplay sa Ministerial Training School sa inyong sunod nga sirkitong asembliya? Ikaw ba usa ka batan-ong igsoong lalaki nga namalandong bahin sa imong mga tumong sa umaabot diha sa pag-alagad kang Jehova? Nganong dili huptang yano ang imong kinabuhi ug walay mga kabaldahan aron ikaw makasulod niining “dakong pultahan nga nagatultol ngadto sa kalihokan”? Kini maghatag kanimog dakong kalipay ug katagbawan. Sa pagkatinuod, ang Ministerial Training School napamatud-ang usa gayod ka panalangin dili lamang sa mga graduwado sa tunghaan kondili ngadto sa mga kongregasyon sa katawhan sa Diyos sa tibuok kalibotan.
[Kahon sa panid 3]
Kon sa Unsang Paagi Sila Nakabatog Kaayohan Gikan sa Maong Pagbansay
“Ang pagbansay nagpalambo gayod sa akong ministeryo ug sa akong katakos sa pagbantay sa panon uban ang kaalam, nga nagagamit sa Kasulatan.”
“Ang tunghaan naghatag kanakog dakong pagsalig sa pagdumala sa nagkalainlaing kaakohan diha sa kongregasyon.”
“Gibag-o niini ang halos tanang bahin sa akong kinabuhi, lakip na ang akong pagbati bahin sa teokrasya ug sa organisasyon sa Diyos.”
“Ang pagbansay nga akong nadawat nakatabang kanako sa pag-ila sa panginahanglan aron ako maandam nga makaalagad diin adunay panginahanglan.”