Usa ka Tunghaan Kansang mga Graduwado Nakahatag ug Benepisyo sa mga Tawo sa Tibuok Yuta

DIHA sa kapin sa 98,000 ka kongregasyon sa mga Saksi ni Jehova sa kapin sa 200 ka kayutaan, ang mga tawo nga lainlaig kahimtang sa kinabuhi ginatudloan sa Diyos. Ang pangunang teksbok mao ang Bibliya, ug ang tumong niini nga edukasyon mao ang pagtabang sa mga indibiduwal nga mouswag sa espirituwal pinaagi sa pagkakat-on kon unsay kabubut-on sa Diyos ug kon unsaon pagkinabuhi uyon niana. Kadtong midawat niini nga edukasyon nakabenepisyog dako. Ang ilang nakat-onan, ilang gipaambit usab sa uban, nga nahiuyon sa sugo ni Jesu-Kristo nga maghimog mga tinun-an.—Mateo 28:19, 20.

Gawas pa sa nagpadayon nga programa sa pagpanudlo diha sa ilang mga kongregasyon, ang mga Saksi ni Jehova nag-establisar ug daghang linain nga mga tunghaan. Ang usa niini mao ang Tunghaan sa Ministeryal nga Pagbansay. Kini gisugdan niadtong Oktubre 1987 sa Pittsburgh, Pennsylvania, T.B.A. Ang unang klase gilangkoban sa 24 ka nagsultig-Iningles nga mga estudyante. Sukad niadto ang maong mga klase gihimo na sa 21 ka pinulongan diha sa 43 ka kayutaan. Sa pagkakaron, nalista niini ang tagsaanong mga ansiyano ug ministeryal nga mga alagad gikan sa kapin sa 90 ka nasod. Sa pagkatapos sa walo-ka-semana nga klase, ang mga graduwado iasayn nga mag-alagad diin adunay panginahanglan, sa ilang nasod o kaha sa laing nasod. Pagkatapos sa 2005, kapin na sa 22,000 ka Kristohanong mga ministro ang nakatapos sa maong klase. Ang ilang mapainubsanong paghago aron sa pagpalambo sa mga intereses sa Gingharian ug sa paghatag ug kaayohan sa uban dagayang gipanalanginan.—Proverbio 10:22; 1 Pedro 5:5.

Nangandam Aron Makatambong

Aron makatambong sa Tunghaan sa Ministeryal nga Pagbansay, kadaghanan sa mga estudyante kinahanglang mohangyo nga mobakasyon gikan sa ilang partaym o bug-os-panahong sekular nga trabaho. Usahay, problema kini. Sa Hawaii, duha ka Kristohanong lalaki nga gidapit sa pagtambong sa eskuylahan ang mihangyo nga mobakasyon sa ilang trabaho ingong mga maestro. Masaligon kang Jehova, ilang gisumiter ang ilang hangyo, nga nagpatin-aw kon nganong gusto nilang motambong ug kon sa unsang paagi sila makabenepisyo. Silang duha gitugotan nga mobakasyon.

Sa daghang kahimtang, ang mga Saksi nga mihangyong mobakasyon sa ilang trabaho giingnan nga taktakon sila sa ilang trabaho. Ilang gipili nga mabansay sa organisasyon ni Jehova, bisan pag mawad-an silag trabaho. Ang pipila kanila sa ulahi nakadawat ug mga sulat gikan sa ilang mga amo nga nag-awhag kanila sa pagbalik ug trabaho inigkahuman nilag tambong sa tunghaan. Ang maong determinasyon sa pagtambong sa tunghaan mahimong hubiton sa mubo: Isumiter ang imong hangyo, pag-ampo nga tabangan ka ni Jehova, ug isalig kaniya ang tanan.—Salmo 37:5.

“Tinudloan ni Jehova”

Ang walo-ka-semanang klase naglakip ug detalyadong pagtuon sa Bibliya. Ang mga estudyante makakat-on kon sa unsang paagi giorganisar ang katawhan ni Jehova aron sa pagbuhat sa kabubut-on sa Diyos ug sa unsang paagi magamit nila ang Bibliya sa mas epektibong paagi diha sa ilang ministeryo sa kanataran, sa mga tigom sa kongregasyon, ug sa mga asembliya.

Ang usa ka mapasalamatong graduwado misulat niini ngadto sa usa ka estudyante nga wala pa makatambong: “Tuohi ko, kini ang kinamaayohang edukasyon nga imong mabatonan. Ang teksto nga naghisgot bahin sa pagkahimong ‘tinudloan ni Jehova’ mahimong mas makahuloganon. Ang tibuok kasinatian makaumol ug makalunsay sa kasingkasing ug personalidad aron mas mahiuyon kini sa ehemplo ni Kristo Jesus. Kini ang kinanindotang kasinatian sa tibuok nimong kinabuhi.”—Isaias 54:13.

Mga Ebanghelisador, Magbalantay, ug mga Magtutudlo

Ang mga graduwado sa Tunghaan sa Ministeryal nga Pagbansay nag-alagad karon sa 117 ka kayutaan. Naglakip kini sa mga isla sa Atlantiko, Caribbeano, ug Pasipiko maingon man sa kadaghanang nasod diin adunay mga sangang buhatan sa mga Saksi ni Jehova. Ang mga sanga nagtaho nga ang maayong pagbansay nga nadawat sa mga estudyante mabanaag diha sa ilang pag-ebanghelyo, pagbantay sa panon, ug pagpanudlo. Ang ilang pagbansay nagsangkap kanila nga mahimong mas epektibo sa paggamit sa Bibliya diha sa ministeryo sa kanataran. (2 Timoteo 2:15) Sa dihang magtubag sa mga pangutana sa mga tagbalay, sila subsob nga mogamit sa librong Nangatarongan Pinasukad sa Kasulatana ug nagbansay sa ubang mga magmamantala sa Gingharian sa pagbuhat usab niana. Ang kasibot sa mga graduwado makatakod, ug ang ilang mga kalihokan nagpalig-on sa mga kongregasyon.

Ang mga ansiyano sa kongregasyon nakapribilehiyo sa ‘pagbantay sa panon,’ nga nagtabang kanila sa pag-atiman sa espirituwal nga mga panginahanglan sa uban. (1 Pedro 5:2, 3) Ang usa ka ansiyano miingon bahin sa maong kahikayan: “Kami nagpasalamat nga ang sanga nagpadala ug maayong-pagkabansay nga mga igsoong lalaki aron sa pagtabang kanamo sa pag-abaga sa responsibilidad sa pagbantay sa panon sa Diyos.” Usa ka sanga sa Halayong Sidlakan misultig susama niana: “Ang mga graduwado mabination kaayo. Sila naghago ug ilang naangkon ang pagtahod sa kongregasyon. Ang ilang pagkamapainubsanon, kainit, ug pagkaandam nakita sa tanan ug gipabilhan pag-ayo. Sila kinabubut-ong nagsakripisyo sa ilang kaugalingon ug malipayng mobalhin ngadto sa mga kongregasyon nga nagkinahanglag mga magbalantay.” (Filipos 2:4) Ang maong mga lalaki nagpalig-on sa ilang mga isigkamagtutuo ug takos sa komendasyon.—1 Corinto 16:18.

Lakip sa ubang mga butang, ang mga instruktor sa Tunghaan sa Ministeryal nga Pagbansay nagtabang sa mga estudyante sa pagpauswag sa ilang mga katakos ingong mga mamumulong. Pinaagi sa pagpadapat sa mga sugyot ug tambag nga ilang nadawat, daghan sa mga graduwado ang dali rang mahatagag bahin sa mga programa sa sirkitong asembliya ug distritong kombensiyon. Usa ka magtatan-aw sa sirkito ang miingon nga ang mga graduwado naghatag ug “ekselenteng mga pakigpulong ug nagpadapat sa impormasyon pinaagi sa paggamit ug maayong pangatarongan.”—1 Timoteo 4:13.

Ang kalidad sa pagpanudlo diha sa mga tigom sa kongregasyon napauswag ug dako diha sa usa ka nasod sa Aprika sa dihang gipahigayon didto ang Tunghaan sa Ministeryal nga Pagbansay ug ang mga graduwado giasayn sa kanataran. Ang mga ansiyano nga gipadala gikan sa tunghaan nagtabang diha sa pag-ebanghelyo, pagbantay sa panon, ug pagpanudlo, sa ingon nagpalig-on sa mga kongregasyon sa espirituwal.—Efeso 4:8, 11, 12.

Napauswag nga Pagdumala sa Kongregasyon

Diha sa daghang dapit, adunay panginahanglan alang sa dugang mga ansiyano ug ministeryal nga mga alagad. Ang ubang mga kongregasyon wala gayod untay mga ansiyano kon wala pay gipadala kanila nga graduwado sa Tunghaan sa Ministeryal nga Pagbansay. Busa daghang graduwado ang gitudlo nga mag-alagad diin gikinahanglan ang mga ansiyano.

Daghang sanga ang nagtaho nga kining maong mga lalaki “nahibalo pag-ayo sa organisasyonal nga mga kahikayan,” “seryosong nag-atiman sa ilang mga responsibilidad,” “nagtabang sa uban sa pagsabot ug pagtahod sa organisasyon ni Jehova,” ug “nakatampo sa kainit ug espirituwalidad sa ilang mga kongregasyon.” Tungod kini kay ang mga graduwado sa tunghaan nagsunod sa gisulat diha sa Pulong sa Diyos ug wala magsalig sa ilang kaugalingong pagsabot o mahimong maalamon sa ilang kaugalingong mga mata. (Proverbio 3:5-7) Ang maong mga lalaki nahimong espirituwal nga mga panalangin sa mga kongregasyon diin sila giasayn.

Nag-alagad Diha sa Hilit nga mga Teritoryo

Ang pipila ka graduwado nga natudlo ingong mga espesyal payunir nagtabang sa aysoleted nga mga grupo aron mahimong mga kongregasyon. Nagpahayag ug apresasyon sa ilang tabang, usa ka ansiyano sa hilit nga dapit sa Guatemala miingon: “Sulod sa 20 ka tuig nabalaka ako kon sa unsang paagi atimanon kining dako kaayong teritoryo. Subsob akong nag-ampo bahin niana. Ang mga igsoon gikan sa Tunghaan sa Ministeryal nga Pagbansay nabansay pag-ayo sa pagpakigpulong maingon man sa organisasyonal nga mga butang, ug ako mapasalamaton nga ang among dapit gihatagan na karon ug mahigugmaong pagtagad.”

Ang mga graduwado nakakat-on nga mahimong epektibo diha sa mga teritoryo diin kinahanglan silang mobiyahe ug layo agi sa kabukiran aron makaabot sa nagkatag nga gagmayng mga balangay. Didto dali ra silang makatukod ug makaorganisar ug aysoleted nga mga grupo, bisan sa dihang ang uban wala makahimo niana. Pananglitan, ang usa ka ansiyano sa Niger mihangyo nga padad-an silag mga graduwado tungod kay iyang gibati nga makahimo silag ekselenteng trabaho sa dapit nga iyang gipuy-an. Ilabina sa hilit nga mga dapit, mahimong mas dali para sa mga dili-minyong mga lalaki nga mag-alagad ingong mga espesyal payunir ug magtatan-aw sa sirkito. Sama kang apostol Pablo, kinahanglang sagubangon nila ang ‘mga kapeligrohan sa mga suba ug mga tulisan sa dalan, mga kapeligrohan sa kamingawan,’ ug personal nga kalisdanan maingon man sa kabalaka alang sa mga kongregasyon nga ilang gialagaran.—2 Corinto 11:26-28.

Nakahatag ug Benepisyo sa mga Batan-on

Ang Kasulatan nag-awhag sa mga batan-on sa paghinumdom sa ilang Maglalalang. (Ecclesiastes 12:1) Ang masibotong mga graduwado sa Tunghaan sa Ministeryal nga Pagbansay maoy maayong mga panig-ingnan sa Kristohanong mga batan-on. Sa dihang may duha ka graduwado nga mitabang sa usa ka kongregasyon sa Tinipong Bansa, nadoble ang gidaghanon sa oras nga nagugol sa mga igsoon diha sa pagsangyaw. Dugang pa, miuswag ang gidaghanon sa mga payunir, o bug-os-panahong mga magmamantala sa Gingharian, gikan sa 2 ngadto sa 11. Kasagaran kining mahitabo diha sa daghang kongregasyon.

Ang mga graduwado nagdasig usab sa bata-bata pang mga lalaki nga himoong tumong ang pagtambong sa Tunghaan sa Ministeryal nga Pagbansay. Nakadasig kini sa pipila nga wala pa mag-alagad ingong ministeryal nga mga alagad sa pagkab-ot sa maong pribilehiyo. Ang sanga sa Netherlands nagtawag sa mga graduwado sa Tunghaan sa Ministeryal nga Pagbansay ingong “buhing mga panig-ingnan alang sa bata-bata pang mga lalaki nga namalandong kon unsay ilang tumong sa kinabuhi.”

Nag-alagad Diha sa mga Kongregasyon nga Langyawg Pinulongan

Diha sa daghang kayutaan, nakabuwelo na ang mga paningkamot sa pagsangyaw sa maayong balita ngadto sa mga tawo diha sa ilang lumad nga pinulongan. Ang mga graduwado sa Tunghaan sa Ministeryal nga Pagbansay subsob nga nagtuon ug ubang mga pinulongan ug nag-alagad sa mga teritoryo diin adunay daghang langyaw nga nanglalin. Pananglitan, sa Belgium adunay panginahanglan alang sa dugang mga magwawali sa Gingharian diha sa Albaniano, Persianhon, ug Ruso nga mga teritoryo.

Ang mga kongregasyon nga langyaw ug pinulongan ug ang mga grupo sa Alemanya, Britanya, Italya, Mexico, Tinipong Bansa, ug uban pang kayutaan nakabenepisyo nag dako gikan sa nagapanawng mga magtatan-aw, mga ansiyano, ug ministeryal nga mga alagad nga graduwado sa Tunghaan sa Ministeryal nga Pagbansay. Ang sanga sa Korea nagtaho nga “kapin sa 200 ka graduwado ang nanguna sa pagtabang sa mga kongregasyon ug mga grupo nga langyawg pinulongan.”

Nag-alagad nga Mapainubsanon sa Ubang mga Kapasidad

Gawas pa sa pag-alagad diha sa mga grupo ug mga kongregasyon nga langyawg pinulongan, ang mga graduwado sa Tunghaan sa Ministeryal nga Pagbansay nag-alagad ingong mga ansiyano, ministeryal nga mga alagad, ug nagapanawng mga magtatan-aw. Ang uban giasayn sa ubang kayutaan, tingali diha sa Departamento sa Pag-alagad sa usa ka sanga nga dako ang panginahanglan. Kadtong hanas sa pagpanukod mahimong moapil sa programa sa pagpanukod ug Kingdom Hall.

Ang tibuok-kalibotang pag-uswag sa gidaghanon sa mga kongregasyon ug mga sirkito nagpasabot nga mas daghang nagapanawng mga magtatan-aw ang kanunayng gikinahanglan. Sa pagtabang nga matagan-an kining maong panginahanglan, ang piniling mga graduwado sa Tunghaan sa Ministeryal nga Pagbansay bansayon sulod sa napulo ka semana diha sa buluhaton isip nagapanawng magtatan-aw ug human niana mag-alagad ingong kapuli o regular nga mga magtatan-aw sa sirkito. Mga 1,300 ka graduwado ang nag-alagad karon ingong nagapanawng mga magtatan-aw diha sa 97 ka nasod. Sa usa ka nasod sa Aprika, 55 porsiyento sa nagapanawng mga magtatan-aw maoy mga graduwado sa Tunghaan sa Ministeryal nga Pagbansay. Sa laing nasod sa Aprika, ang gidaghanon maoy 70 porsiyento.

Sa Australia, Canada, Halayong Sidlakan, Tinipong Bansa, ug Uropa, gatosan ka graduwado sa maong tunghaan ang gipadala sa laing mga nasod nga adunay espesipikong mga panginahanglan. Niining paagiha, ang mga benepisyo gikan sa tunghaan nakaabot sa tibuok kalibotan.

Pinaagi sa iyang Anak, si Jesu-Kristo, si Jehova nagpatungha ug mga ebanghelisador, magbalantay, magtutudlo, ug uban pa nga magpalambo sa mga intereses sa Gingharian niining kataposang mga adlaw. Aduna bay kalaoman nga mouswag pa ang gidaghanon sa katawhan sa Diyos? Siyempre! Busa adunay nagkadakong panginahanglan alang sa dedikadong mga lalaki nga mangab-ot ug mas dakong responsibilidad. (Isaias 60:22; 1 Timoteo 3:1, 13) Pinaagi sa Tunghaan sa Ministeryal nga Pagbansay ang mga ansiyano ug ministeryal nga mga alagad may kahigayonan nga masangkapan aron mapasangkad pa ang ilang ministeryo, nga makahatag ug dakong benepisyo sa ilang kaugalingon ug sa uban pa sa tibuok kalibotan.

[Footnote]

[Mga hulagway sa panid 10]

Ang Tunghaan sa Ministeryal nga Pagbansay nagpalambo sa intereses sa Gingharian sa tibuok kalibotan

[Mga hulagway sa panid 13]

Nagtinguha ka ba nga magpalista sa Tunghaan sa Ministeryal nga Pagbansay ug makahatag ug benepisyo sa uban?