Hupting Yano ang Imong Mata
1. Unsay kahulogan sa paghupot ug yanong mata, ug nganong hinungdanon kini?
1 Sa iyang Wali sa Bukid, gihisgotan ni Jesus ang dakong impluwensiya nga ikahatag sa mahulagwayon o espirituwal nga mata diha sa tibuok natong pagkinabuhi. Siya miingon: “Nan, kon yano ang imong mata, ang imong tibuok lawas mahimong hayag; apan kon daotan ang imong mata, ang imong tibuok lawas mahimong ngitngit.” (Mat. 6:22, 23) Ang yanong mata mao kanang nasentro sa usa lamang ka katuyoan—ang pagbuhat sa kabubut-on sa Diyos—wala mabalda sa wala-kinahanglanang kabalaka tungod sa materyal nga mga butang. (Mat. 6:19-21, 24-33) Unsay makatabang kanato sa paghupot ug yanong mata?
2. Unsang panglantaw bahin sa materyal nga mga butang ang gidasig sa Pulong sa Diyos?
2 Pag-ugmad sa Pagkakontento: Ang pagtaganag igo alang sa mga panginahanglan sa panimalay sa usa maoy Kasulatanhong obligasyon. (1 Tim. 5:8) Apan wala kini magkinahanglan nga kita mohimog way-pagkatapos nga pagpangagpas alang sa kinamaayohan ug kinabag-ohang mga butang. (Prov. 27:20; 30:8, 9) Hinunoa, ang Kasulatan nag-awhag kanato nga magmakontento sa “makaon ug ikabesti,” ang mga kinahanglanon sa kinabuhi. (1 Tim. 6:8; Heb. 13:5, 6) Ang pagsunod niining tambaga makatabang kanato sa paghupot sa atong mata diha sa hustong pagpunting.
3. Unsay makatabang kanato aron malikayan ang mga kabug-at nga gipahamtang sa kaugalingon?
3 Maalamon nga atong likayan ang pagpabug-at sa atong kaugalingon pinaagi sa wala-kinahanglanang utang ug mga kabtangan o mga pangagpas nga nagkinahanglag daghang panahon ug pagtagad. (1 Tim. 6:9, 10) Sa unsang paagi atong mahimo kini? Sa dihang mamalandong kon unsay himoon, mainampoong timbangtimbanga ang maong butang ug matinud-anong susiha kon makadaot ba kini sa espirituwal nga mga kalihokan. Magmadeterminado sa pag-una sa espirituwal nga mga butang sa imong kinabuhi.—Filip. 1:10; 4:6, 7.
4. Nganong angay kitang mangitag mga paagi sa pagpayano sa atong estilo sa pagkinabuhi?
4 Himoang Yano ang Imong Estilo sa Pagkinabuhi: Ang laing tabang aron masuklan ang pangdani sa materyalismo mao ang pagpangitag mga paagi sa pagpayano sa imong estilo sa pagkinabuhi. Usa ka igsoong lalaki nga nakadiskobre nga ang iyang pamilya milampos nga walay sobrang materyal nga mga butang miingon: “Daghan na akog mahimo karon diha sa kongregasyon sa pag-alagad sa akong mga igsoon. Kombinsido ako nga panalanginan ni Jehova ang tanan niyang mga alagad nga nag-una sa matuod nga pagsimba inay sa personal nga mga interes.” Buot ba nimong matagamtam ang mas dagkong mga panalangin pinaagi sa pagpayano sa imong estilo sa pagkinabuhi?
5. Nganong gikinahanglan ang makanunayong paningkamot aron mahuptang yano ang atong mata?
5 Gikinahanglan ang makanunayong paningkamot aron masuklan ang impluwensiya ni Satanas, iyang materyalistikong kalibotan, ug ang ato mismong pagkadi-hingpit. Imbes tugotan ang atong mga mata nga maglatagaw, isentro nato kini sa pagbuhat sa kabubut-on sa Diyos ug sa atong bililhong paglaom nga kinabuhing walay kataposan.—Prov. 4:25; 2 Cor. 4:18.