Yano ba ang Imong Mata?
1. Unsay kahulogan sa pagbaton ug ‘yano nga mata’?
1 Ang atong mga lihok maapektohan kon unsay atong gitutokan. Pagkatukma sa mga pulong ni Jesus: “Nan, kon yano ang imong mata, ang imong tibuok lawas mahimong hayag”! (Mat. 6:22) Kon ang atong mata “yano” sa espirituwal nga diwa, kini gitutok sa usa lamang ka katuyoan—ang pagbuhat sa kabubut-on sa Diyos. Unahon nato ang Gingharian ug dili magpabalda sa wala kinahanglanang mga butang o mga kalihokan nga makababag sa ministeryo.
2. Unsay makadaot sa atong panghunahuna, apan unsay makatabang kanato?
2 Gikinahanglan ang Pagsusi sa Kaugalingon: Mahimong madaot ang atong panghunahuna tungod sa mga gianunsiyo nga kono atong gikinahanglan o sa mga butang nga nabatonan sa uban. Sa dili pa mohimog proyekto o mopalit ug butang nga nagkinahanglag dakong panahon, salapi, o kusog, maayo nga atong “kuwentahon ang gasto” pinaagi sa pagsukna sa atong kaugalingon, ‘Makapauswag o makababag ba kini sa akong pag-alagad kang Jehova?’ (Luc. 14:28; Filip. 1:9-11) Maalamon usab nga mamalandong matag karon ug unya kon unsaon pagpayano ang atong kinabuhi aron makagahin kitag mas dakong panahon sa ministeryo.—2 Cor. 13:5; Efe. 5:10.
3. Unsay atong makat-onan sa usa ka sister nga nagpayano sa iyang kinabuhi?
3 Sa dihang ang usa ka sister nagregular payunir, wala niya biyai ang iyang bug-os-panahong trabaho bisan pag masuportahan na unta siya pinaagig partaym nga trabaho. Ngadtongadto siya miingon: “Wala gayoy makaalagad sa duha ka agalon. Kinahanglan kong isakripisyo ang akong mga gusto aron makatagana ko sa akong mga panginahanglan. Nakaamgo ko nga ang materyal nga mga butang madaot ra ug hago lamang ang pagpaningkamot sa pagbaton niini.” Gipayano niya ang iyang kinabuhi, nangitag laing trabaho, ug nagpadayon sa pagpayunir.
4. Nganong hinungdanon kaayo nga huptang yano ang atong mata?
4 Tungod kay mubo na lang ang panahon, hinungdanon kaayo nga huptang yano ang atong mata. Matag adlaw nga moagi, kita mas duol nag usa ka adlaw sa kataposan niining kalibotana ug sa pagsugod sa bag-ong kalibotan sa Diyos. (1 Cor. 7:29, 31) Kon atong isentro ang atong pagtagad sa pagsangyaw, maluwas nato ang atong kaugalingon ug kadtong nagpatalinghog kanato.—1 Tim. 4:16.