Magkinabuhi sa Timbang, Yano nga Kinabuhi

“Pagbantay kamo pag-ayo nga ang inyong paglakaw dili ingon sa buangbuang kondili ingon nga maalamong mga tawo . . . tungod kay ang mga adlaw daotan.”​—EFESO 5:15, 16.

1, 2. Unsa ang matuod nga hagit karong adlawa, ug mahimong ikatandi kini sa unsa?

USA ka hagit ang pagpili sa mga butang pagaunahon, sa pag-atiman sa mga responsabilidad, ug sa paggugol sa panahon ug enerhiya sa hinungdanong mga bahin sa kinabuhi diha sa makataronganong paagi. Usa usab ka hagit ang paglikay sa mga paghingapin ug sa paghupot ug mental ug emosyonal nga kalig-on.​—Efeso 5:17; 1 Timoteo 4:8; 1 Pedro 1:13.

² Kining hagita ikatandi nianang atubangon sa usa ka tigpasundayag kinsa mosulay sa paglakaw sa nipis ug habog nga alambre. Ang pagkawala sa panimbang makadaot niya. Sa susama, ang pagkawala sa espirituwal nga panimbang makadaot nato. Ang tawo nga nagalakaw sa habog nga alambre sa pagkamatuod dili magpabug-at sa iyang kaugalingon sa daghang butang. Siya nagdala lamag importanteng mga butang. Busa, aron maampingan ang atong espirituwal nga panimbang, kinahanglan magkinabuhi kita sa yano, walay-kabug-at nga kinabuhi.​—Hebreohanon 12:1, 2.

3. Unsay atong kinahanglang buhaton aron magkinabuhi sa yano nga kinabuhi?

³ Kon kita ginaawhag sa pagkinabuhi sa yano nga kinabuhi, kinahanglan kita magmapuliki lamang sa mga butang gikinahanglan aron mahuptan ang igoigo nga panginabuhi. Lahi sa butang nga angay pangitaon sa iyang mga disipulo​—ang Gingharian sa Diyos ug ang Iyang pagkamatarong​—si Jesu-Kristo naghisgot sa “mga butang nga maikagong gipangita sa mga nasod.” (Mateo 6:32, 33) Busa gitambagan kita ni Jesus sa paglikay sa pagtigom ug daghan niining mga butanga. Ngano? Tungod kay sila makapakomplikar sa atong kinabuhi ug makapahisalaag kanato. (Lucas 12:16-21; 18:25) Maayo kini nga tambag, adunahan o kabos man kita, edukado o dili.

Kon Nganong Hinungdanon Kaayo Karong Adlawa

4. Nganong ang pagkinabuhi sa timbang, yano nga kinabuhi hinungdanon kaayo karon?

⁴ Ang pagkinabuhi sa timbang, yano nga kinabuhi ilabinang hinungdanon karong adlawa tungod kay si Satanas ug ang iyang mga demonyo gitambog sa yuta ug naninguha nga kita mabug-atan ug sa pagkuha sa atong pagtagad gikan sa pag-alagad sa Diyos. (Pinadayag 12:7-12, 17) Busa, wala pa sukad nga nahimong labi pang aplikado ang sugo sa Bibliya: “Pagbantay kamo pag-ayo nga ang inyong paglakaw dili ingon sa buangbuang kondili ingon nga maalamong mga tawo . . . tungod kay ang mga adlaw daotan.” (Efeso 5:15, 16) Oo, kita nagkinabuhi sa daotang kalibotan ni Satanas, dili sa bag-ong kalibotan sa Diyos. Busa, dili kita makaarang nga mahimong mapinasagdanon.​—2 Corinto 4:4; 2 Pedro 3:7, 13.

5. Sa unsang paagi ang mga alagad sa Diyos sa karaang mga panahon naghatag kanatog maayong pananglitan?

⁵ Ang mga alagad sa Diyos nga nabuhi niining gimandoan sa Yawa nga kalibotan sa karaang mga panahon naghatag kanatog maayong pananglitan. Ilang “gipahayag sa katilingban nga sila mga dumuloong ug temporaryong mga molupyo dinhi sa yuta.” Busa, ilang gipangita ang “usa ka labi pa ka maayong dapit, nga sa ato pa, usa nga langitnon.” (Hebreohanon 11:13-16) Ang ilang pagkamaunongon maoy sa langitnong Gingharian sa Diyos, sama usab kanato. Tungod niini nga katarongan, si apostol Pedro nagtawag sa mga Kristohanon nga “mga dumuloong ug temporaryong mga molupyo.” (1 Pedro 2:11; Filipos 3:20) Sa pagkamatuod, si Jesus miingon nga ang iyang matuod nga mga sumusunod “dili bahin sa kalibotan.” Kini nagkahulogan, sumala sa gipamulong ni apostol Pablo, nga ang mga Kristohanon kinahanglan dili ‘magpahimulos sa kalibotan sa bug-os.’​—Juan 17:16; 1 Corinto 7:31.

6. (a) Unsa ang angay natong hinumdoman, ug sa unsa nga ikatandi nato ang atong kahimtang? (b) Unsang pasidaang pananglitan ang angay patalinghogan natong tanan?

⁶ Busa kita kanunay kinahanglang mahinumdom nga kining kalibotana nga gipanag-iya ni Satanas peligroso kaayo nga teritoryo nga pagakinabuhian. Ang sayop nga lakang magkahulogang katalagman. (1 Juan 5:19; 1 Pedro 5:8) Ang atong kahimtang mahimong ikatandi sa kahimtang sa usa ka tawo nga naglakaw diha sa lugar nga dunay daghang mina sa bomba. Mikutlog usa ka pasidaang pananglitan alang sa mga Kristohanon, naghisgot si apostol Pablo bahin sa mga Israelinhon nga hapit nang mosulod sa Yutang Saad. Daghan ang nawad-an sa ilang espirituwal nga panimbang, nalangkit sa imoralidad, ug gipatay sa Diyos. “Busa,” si Pablo misulat, “siya nga nagadahom nga maayo na niyang pagkabarog magbantay basig [mawad-an sa iyang espirituwal nga panimbang ug] mapukan siya.”​—1 Corinto 10:12.

Kon Nganong Usa Kini ka Panalipod

7. Unsang pag-usisa sa kaugalingon ang maalamon natong buhaton?

⁷ Ang pagkinabuhi sa timbang, yano nga kinabuhi mopanalipod nimo tungod kay kini mohatag nimog dugang panahon ug kusog alang sa espirituwal nga mga butang. Busa maalamong pangutan-a ang imong kaugalingon: Gipayano ba nako ang akong kinabuhi, o gikomplikar ko ba kini? Unsang mga butanga ang nauna sa akong kinabuhi? Ang pipila moingon nga diyutay ra silag panahon sa pagtuon sa Bibliya o sa pakigbahin sa pag-alagad sa kanataran. Apan unsa ang katarongan? Tingali, ang ilang kapakyasan sa pagkinabuhi sa timbang, yano nga kinabuhi. Nganong dili itandi ang gidaghanon sa panahon nga imong gigugol sa kalingawan, sama sa pagtan-aw sa telebisyon, uban sa panahon nga imong gigugol sa usa ka bahin sa Kristohanong kalihokan o sa lain? Ang paggamit ba nimo sa imong panahon timbang? Ang pagpayano sa imong kinabuhi mohatag kanimog panahon sa labi pa ka importanteng mga butang, nga nag-apil sa pakigbahin sa mas dako pang sukod sa importante-sa-tanan nga espirituwal nga pagpangani.​—Filipos 1:9, 10; Mateo 9:37.

8. Sa unsang paagi masunod sa usa ang tambag ni Jesus sa pagpangita pag-una sa Gingharian, ug unsay nagailustrar sa bili sa kusog nga dagan?

⁸ Sa pagkamatuod, ang imong espirituwal nga kalihokan maoy sukdanan kon ikaw nagakinabuhi ba sa timbang, yano nga kinabuhi. Ang mga Kristohanon kinsa nagapatalinghog sa tambag ni Jesus sa pagpangita pag-una sa gingharian sa Diyos nagapadayon nga may igong kadasig sa pagtuon sa Bibliya, sa pagtambong sa miting, ug sa pag-alagad sa kanataran. Ang pag-uswag maoy usa ka panalipod batok sa pagkahulog. Ikatandi kini sa pagsakay sa bisikleta. Kadtong nakasulay sa pagbalanse sa bisikleta nga halos naghunong na makaapresyar sa bili sa kusog nga dagan. Sa susama, basta ikaw nagapadayon nga may igong kadasig sa rotinang espirituwal nga kalihokan, ikaw mapanalipdan batok sa pagkawala sa imong panimbang ug pagkahulog.​—Filipos 3:16.

9. (a) Unsa ang maayong pahinumdom kanatong tanan? (b) Kon magplanog usa ka proyekto, unsang mga pangutana ang atong ibangon sa atong kaugalingon?

⁹ Bisan pa, kinahanglan nga magbantay, ang paghinumdom nga ang paghaw-as sa atong kaugalingon sa mga kabug-at mohatag dugang panahon sa pagtuon, sa pagpangandam sa miting, ug sa pagtabang sa uban. “Sa dihang matintal ako sa pagpalit ug mga butang nga wala nako kinahanglana, o modawat ug trabaho nga wala ko kinahanglana,” miingon ang usa ka Kristohanong negosyante, “Gipugngan ko ang akong kaugalingon uban sa pahinumdom sa paghimo niini nga yano. Kinahanglan pig-otan ko ang akong kaugalingon.” Dili ba maayong pahinumdom kana alang kanatong tanan? Sa dihang duna kay planohong usa ka proyekto, tingali magtukod ug dugang lawak sa imong balay o lain nga butang, nganong dili pangutan-on ang imong kaugalingon: Makaamot ba kini sa akong espirituwalidad ug sa akong pamilya o makababag ba hinoon kini? Gikinahanglan ba gayod nako ang tanang mga butang nga maikagong gipangita sa mga tawo sa kalibotan, o makatigayon ba ako nga wala niini?

10. Sa unsang paagi ang mga hunahuna sa “pisikal nga tawo” lahi sa “espirituwal nga tawo”?

¹⁰ Apan, tingalig may motutol: ‘Kini bang pagsakripisyo sa kaugalingon tinuod nga gikinahanglan? Kinahanglan ba nga magkinabuhi kita sa timbang, yano nga kinabuhi?’ Buweno, si Pablo mihisgot bahin sa “mga butang sa tawo” ug sa “mga butang sa Diyos” ug miingon: “Ang pisikal nga tawo wala magadawat sa mga butang sa espiritu sa Diyos, kay sila kabuangan ngadto kaniya; ug siya dili arang makasabot niini, tungod kay kini ginatugkad sa espirituwal nga paagi. Apan, ang tawo nga espirituwal nagatugkad gayod sa tanang mga butang.” (1 Corinto 2:11, 14, 15) Masayon ra nga ikaw mahimo nga “pisikal nga tawo” pinaagi sa pagpangita ug pagbaton sa dili-importanteng mga butang sa materyal nga kinaiyahan. Sa maong kaso, ang pagsakripisyo sa kaugalingon maoy paghingapin nga tan-awon, dili gani makataronganon. Apan mao kana ang panlantaw sa usa ka “pisikal nga tawo,” dili sa panlantaw sa usa ka “espirituwal nga tawo.”

11. Unsa unta ang dili-timbang nga dalan alang kang Noe, ug sa unsang paagi kita magkinabuhi sa timbang nga kinabuhi karong adlawa?

¹¹ Ang espirituwal nga tawo maoy usa nga nagalantaw sa mga butang pinaagi sa mga mata sa pagtuo. Siya makakita sa mga butang gikan sa punto de vista sa Diyos. Palandonga si Noe. Siya ba timbang kon, human nakahibalo sa katuyoan sa Diyos sa paglaglag sa kalibotan pinaagi sa baha, iyang gigugol ang iyang panahon sa pagtukod ug mas dako ug mas matahom nga balay ug sa pagbaton ug dugang materyal nga mga kabtangan? Siyempre dili gayod! Ang arka mao ang iyang matuod nga kasegurohan. Alang kang Noe, ang pagkinabuhi sa timbang, yano nga kinabuhi nag-apil sa paggugol sa bug-os nga pagtagad sa pagtukod sa arka ug sa pagkahimong “usa ka magwawali sa pagkamatarong,” bisan pa sa pagbiaybiay sa walay-pagtuo ‘pisikal nga mga tawo.’ (2 Pedro 2:5; Mateo 24: 37-39) Sa susama, sanglit kita nalamdagan man mahitungod sa pagkaduol sa kataposan sa kalibotan, ang bugtong timbang nga dalan sa kinabuhi alang kanato mao ang pagsentro sa atong pagtagad sa pagbuhat sa kabubut-on sa Diyos ug sa pagmantala sa maayong balita, bisan pa nga kini nagalangkit nianang gilantaw sa kadaghanan nga pagsakripisyo sa gitawag nga normal nga paagi sa kinabuhi.​—1 Juan 2:17.

Gitudloan Kita ni Jesus Kon Unsaon

12. (a) Unsay gipamulong ni Jesus nga angay natong hunongon sa pagbuhat, ug unsa hinoon ang angay natong buhaton? (b) Nganong gikinahanglan kining kausaban sa katuyoan?

¹² Diha sa iyang Wali sa Bukid, si Jesus mihatag ug maayong tambag mahitungod sa timbang, yano nga kinabuhi. Siya miingon: “Hunong na kamo pagtigom ug mga bahandi alang kaninyo dinhi sa yuta, diin ang tangkob ug ang taya nagakutkot, ug diin ang mga kawatan nagapanakasaka ug nagapangawat.” Si Jesus migamit sa pulong “hunong” tungod kay ang mga tawo sa kasagaran mopadayon sa “pagtigom” ug materyal nga mga butang alang sa ilang kaugalingon. Apan ang usa ka tawo kinsa nahimong disipulo ni Jesus dili na makahimo niini. Ang iyang kinabuhi kinahanglan dunay lahi nga katuyoan, sumala sa gipakita ni Jesus sa iyang gisunod nga sugo: “Hinunoa, pagtigom kamog mga bahandi alang kaninyo didto sa langit, diin walay tangkob ni taya nga magakutkot, ug diin walay mga kawatan nga magapanakasaka ug magapangawat.” Mihatag sa katarongan kon nganong kining kausaban sa katuyoan ang gikinahanglan, si Jesus miingon: “Kay hain gani ang imong bahandi, atua usab didto ang imong kasingkasing.”​—Mateo 6:19-21.

13. Kon magtigom kag mga bahandi sa langit, kinahanglan kombinsido ka sa unsa?

¹³ Ang imong bahandi mao kanang imong giisip nga tinuod hinungdanon. Ang materyal ba nga mga kabtangan mao ang imong bahandi? O ang pagbalaan ba sa ngalan ni Jehova nga Diyos ug sa iyang gisaad nga ganti? Aron makagugol sa imong kinabuhi sa pagtigom ug mga bahandi sa langit inay nianang sa yuta, ikaw kinahanglan kombinsido gayod sa pagkatinuod sa Gingharian. Ang bag-ong kalibotan kinahanglang matuod gayod kanimo nga ikaw makakita niana sa imong mga mata sa hunahuna ug makakita sa imong kaugalingon didto nga nagapaningkamot alang sa katumanan sa mga katuyoan ni Jehova sa yuta. Sama kang Moises, kinahanglan ikaw ‘makakita sa Usa nga dili-makita’ ug lig-ong nagatuo nga ‘siya magabalos ra niadtong kinasingkasing nga nagapangita kaniya.’​—Hebreohanon 11:6, 27.

14. Unsa unyay mga resulta kon ang atong mga kasingkasing matinguhaon sa materyal nga mga butang?

¹⁴ Apan komosta kon ang imong kasingkasing, nga nag-apil sa imong mga pangibog ug mga pagbati, matinguhaon sa materyal nga mga bahandi? Ang Bibliya nag-ingon: “Ang paghigugma sa salapi mao ang gamot sa tanang makadaot nga mga butang, ug tungod sa maong mga pangibog may mga tawo nga nanghisalaag gikan sa pagtuo ug ilang gipalagbaslagbasan ang ilang kaugalingon sa daghang kasakitan.” Ang pagpangita sa materyal nga mga butang nga mapalit sa salapi sa yano dili makahatag matuod ug malungtarong katagbawan. (1 Timoteo 6:10; Ecclesiastes 5:10) Apan labing seryoso sa tanan, ang paghigugma sa salapi ug sa materyal nga mga butang makadaot sa imong relasyon sa Diyos, kinsa nagalaom nga kita moalagad kaniya uban sa “bug-os nga kasingkasing.”​—1 Cronicas 28:9.

15. (a) Unsang sambingay ang gihatag ni Jesus mahitungod sa mata? (b) Sa pisikal ug sa espirituwal nga diwa, sa unsang paagi ang tawo makabaton ug yanong mata? (c) Kon yano ang atong mata, sa unsang paagi ang atong espirituwal nga panan-aw mahisama nianang sa tulo ka apostoles ni Jesus?

¹⁵ Aron kita matabangan nga makalikay sa lit-ag sa materyalismo, si Jesus mihatag ug duha ka sambingay. Una, siya miingon: “Ang mata mao ang suga sa lawas. Busa, kon ang imong mata yano, ang tibuok mong lawas mohayag; apan kon daotan ang imong mata, ang tibuok mong lawas mongitngit.” (Mateo 6:22, 23) Sa pisikal nga diwa, ang “yano” nga mata maoy usa ka mata nga nakapokus, nagapasa ug matin-aw nga mga larawan ngadto sa hunahuna. Ang wala mapokus nga mata mopasag magubot ug hanap nga mga larawan. Sa susama, ang espirituwal nga mata nga “yano,” o nakapokus, nagapasa ug matin-aw nga larawan sa Gingharian sa Diyos, dili usa ka hanap, wala mapokus nga hulagway nga mopahimo sa bag-ong kalibotan nga daw usa ka sugilanong engkantohanon o sugilambong. Kon ang imong espirituwal nga mata nakapokus, ang gisaad sa Diyos nga bag-ong kalibotan matuod kanimo nga sama ka matuod sa Gingharian ngadto sa tulo ka apostoles kinsa nakapribilehiyo sa pagkakitag-una diha sa milagrosong panan-awon sa pag-usab sa dagway ni Jesus.​—Mateo 16:28–​17:9; Juan 1:14; 2 Pedro

1:16-19.

16. Diha sa ikaduhang sambingay, sa unsang paagi gipakita ni Jesus ang panginahanglan sa pagbaton ug inusarang katuyoan?

¹⁶ Si Jesus mihatag ug ikaduhang sambingay. “Walay bisan kinsa ang makaalagad ug duha ka agalon,” siya miingon, “kay mahitabo man nga dumtan niya ang usa ug higugmaon niya ang ikaduha, o dapigan niya ang usa ug tamayon niya ang ikaduha.” Nakapatin-aw sa punto, iyang gipasiugda na usab ang panginahanglan sa pagpakita sa pagkausa ray katuyoan, nga nagaingon: “Dili kamo makaalagad sa Diyos ug sa mga Bahandi.” (Mateo 6:24) Kana sa yano dili magsilbi. Busa si Jesus mipadayon: “Busa ingnon ko kamo: Ayaw na kamo pagkabalaka bahin sa inyong mga kinabuhi kon unsay inyong kan-on o unsay inyong imnon, o bahin sa inyong mga lawas kon unsay inyong ibisti. . . . Kay kining tanang mga butanga ang maikagong gipangita sa mga nasod. Ug ang inyong langitnong Amahan nasayod nga kamo nagakinahanglan niining tanan.”​—Mateo

6:25-32.

17. (a) Unsang punto ang gihimo ni Jesus pinaagi sa iyang pahimangno mahitungod sa materyal nga mga butang? (b) Unsa ang gipasiugda dinhi ni Jesus, ug unsay nalangkit sa pagkinabuhi sa timbang, yano nga kinabuhi?

¹⁷ Wala magpasabot si Jesus nga isalig sa iyang mga sumusunod ang pagtagana sa materyal nga mga kinahanglan sa tsansa o nga sila magtinapolan ug modumili sa pagtrabaho aron sa pagtagana alang sa ilang kaugalingon ug sa ilang mga pamilya. (1 Timoteo 5:8) Dili, apan ang punto mao nga kining materyal nga mga butang nga maikagong gipangita sa mga nasod dili ang unahon. Hinunoa, sumala sa gitambag ni Jesus: “Nan, ipadayon ninyo ang pagpangita pag-una sa gingharian ug sa iyang pagkamatarong, ug kining tanang ubang butang igadugang ra kaninyo.” (Mateo 6:33) Busa naghisgot si Jesus dinhi bahin sa mga tumong sa kinabuhi ug nagpasiugda sa kakawangan sa pagpangitag materyal nga mga bahandi. Ang pagkinabuhi sa timbang, yano nga kinabuhi nag-apil sa pagsentro sa atong mga mata nga inusara sa mga intereses sa Gingharian, himoon ang tanang butang nga ikaduha.

Pananglitan ni Jesus ug sa Uban

18. Sa unsang paagi naghatag si Jesus ug tukmang pananglitan alang kanato?

¹⁸ Sa dihang nagdasig sa mga Kristohanon sa “pagwakli sa tanang kabug-at ug ang sala [kakulang o pagkawalay pagtuo] nga nagapiit paglikos kanato,” si Pablo miawhag: “Dalaganon ta nga malahutayon ang lumba nga gibutang sa atong atubangan, samtang kita nagatutok pag-ayo sa Pangulong Ahente ug Maghihingpit sa atong pagtuo, si Jesus.” (Hebreohanon 12:1, 2) Si Jesus bug-os nga debotado sa mga intereses sa Gingharian nga sa ingon ang iyang kahimtang maoy sama sa iyang gibatbat: “Ang mga milo dunay kalubloban ug ang mga langgam sa kalangitan dunay kabatogan, apan ang Anak sa tawo walay dapit nga kapahulayan sa iyang ulo.” (Mateo 8:20) Sa samang higayon, si Jesus dili mahigpit ug kinabuhi. Ang Kasulatan nagpakita nga gikalipayan niya ang maayong pagkaon ug sapot, apan ang iyang pangunang tumong sa kinabuhi mao ang pagtuman sa iyang ministeryo. Busa si Jesus nagkinabuhi sa usa ka timbang, yano nga kinabuhi.​—Lucas 5:29; Juan 19:23, 24.

19, 20. (a) Unsang pananglitan ang gihatag ni Pablo mahitungod sa materyal nga mga butang? (b) Unsang mga pagtulon-an ang nakat-onan sa kadaghanan karong adlawa, ug unsay ilang gibati mahitungod sa ilang dalan sa kinabuhi?

¹⁹ Gipahimutang usab ni apostol Pablo ang butang hinungdanon kaniya sa angay nga dapit. Siya misaysay: “Wala nako isipa ang akong kalag nga bililhon alang kanako, basta lamang matuman ko ang akong kurso ug ang ministeryo nga akong nadawat gikan sa Ginoong Jesus, aron sa pagpanghimatuod sa maayong balita.” (Buhat 20:24) Oo, ang pagtuman sa labing-hinungdanong ministeryo, si Pablo kontento na sa igoigo lang nga mga panginahanglan apan nalipay sa pagtagamtam sa panalagsang kadagaya. Siya misulat: “Sa bisan unsa ug sa tanang mga kahimtang nasinati ko ang tinago kon unsaon sa pagkabusog ug sa pagkagutom, sa kadagaya ug sa kawalad-on.”​—Filipos 4:12.

²⁰ Sa literal tinagpulo ka libong mga tawo ang nakakat-on sa samang pagtulon-an karong adlawa. Daghan kanila maoy bug-os panahong mga ministro sa mga Saksi ni Jehova, apil ang mga misyonero, mga payunir, nagapanawng mga magtatan-aw, ug kadtong nagaalagad sa internasyonal nga hedkuwarter sa organisasyon ug sa mga sangang buhatan. Human sa mga tuig sa bug-os panahong pag-alagad ang kadaghanan mipahayag: “Kon balikon ko pagbuhat kini, dili ko mobuhat ug lahi nga butang.”

Mga Panalangin nga Imong Matagamtam

21, 22. (a) Unsang mga ganti ang tagamtamon bisan karon kon kita magkinabuhi sa timbang, yano nga kinabuhi? (b) Unsang umaabot nga mga panalangin ang imong matagamtam?

²¹ Samtang ang pagsubay ug timbang, yano nga kinabuhi naglangkit ug pagsakripisyo, ang mga panalangin ug mga kalipay dili-ikatandi. Sa ingon ikaw makabaton ug dugang panahon sa pagpauswag sa mga intereses sa Gingharian ug mas dakong higayon sa pagkaplag mga interesado ug sa pagtudlo kanila mahitungod sa mga katuyoan sa Diyos. Ang matuod nga katagbawan ug pagkakontento imong maangkon, apil ang kalinaw sa hunahuna ug ang pasalig nga ikaw nakapahimuot kang Jehova nga Diyos. Mao kana ang ganti nga imong matagamtam bisan karon.​—Filipos 4:6, 7.

²² Apan ang umaabot nga mga panalangin mas dako pa, nga mopahinabo sa bisan unsang mga pagsakripisyo karon nga imong pagahimoon nga wala ra sa kumingking kon itandi. Ang mga panalangin ni Jehova nag-apil sa “kinabuhi nga walay kataposan.” Oo, kana mahimong imong panalangin​—kinabuhing dayon sa kalipay diha sa matarong bag-ong kalibotan ni Jehova. Magkinabuhi sa timbang, yano nga kinabuhi, dili gayod tugotan ang mga butang niining kalibotana nga makawala sa imong panimbang. Hinumdomi nga hatagan ka sa Diyos sa mga pangandoy sa imong kasingkasing.​—Salmo 21:3, 4; 37:4; 133:3.

Mga Pangutana sa Pagsobli

◻ Unsang mga pananglitan ug mga ilustrasyon ang imong namatikdan nga makatabang kanimo sa pagkinabuhi sa timbang, yano nga kinabuhi?

◻ Sa unsang paagi ang pagkinabuhi sa timbang, yano nga kinabuhi makapanalipod kanato?

◻ Kon ang atong espirituwal nga mata yano, unsay kahulogan niini kanato?

◻ Sa unsang paagi gitudloan kita ni Jesus sa pagkinabuhi ug yano nga kinabuhi?

◻ Unsa ang mga panalangin sa pagkinabuhig timbang, yano nga kinabuhi?