Hupti Kanunay ang Pangisip sa Pagkadinalian!
1 Si Jesus nahibalo nga limitado ang iyang panahon dinhi sa yuta sa pagtuman sa buluhaton sa iyang Amahan. (Juan 9:4) Busa, gibuhat niya ang iyang ministeryo nga may pangisip sa pagkadinalian, ug gibansay niya ang iyang mga tinun-an sa paghimo usab niana. (Luc. 4:42-44; 8:1; 10:2-4) Ang materyal nga kaharuhay maoy segundaryo lamang kaniya. (Mat. 8:20) Tungod niana, iyang nalampos ang buluhaton nga gipabuhat kaniya ni Jehova.—Juan 17:4.
2 Limitadong Panahon: Ang panahon sa pagwali sa maayong balita sa “tibuok gipuy-ang yuta” limitado usab. (Mat. 24:14) Ang tagna sa Bibliya nagbutyag nga kita nagkinabuhi sa hinapos nga bahin sa panahon sa kataposan. Sa di madugay “[kadtong] wala makaila sa Diyos ug [kadtong] wala magsunod sa maayong balita bahin sa atong Ginoong Jesus . . . makaagom sa hudisyal nga silot sa walay kataposang kalaglagan.” (2 Tes. 1:6-9) Ang maong paghukom kalit gayod nga modangat. (Luc. 21:34, 35; 1 Tes. 5:2, 3) Kinahanglang maamgohan sa mga tawo ang ilang peligrosong kahimtang. Maoy atong responsabilidad ang pagtabang kanila sa pagpangita sa pabor ni Jehova mentras aduna pay panahon.—Sof. 2:2, 3.
3 Paghimo sa Tanan Natong Maarangan: Kay nakaamgo nga “ang panahong nabilin mubo na,” giuna sa mga alagad sa Diyos ang buluhatong pagwali. (1 Cor. 7:29-31; Mat. 6:33) Gitalikdan sa uban ang ekonomikanhong mga kahigayonan o uban pang personal nga mga pangagpas aron madugangan ang ilang pagpakig-ambit diha sa ministeryo. (Mar. 10:29, 30) Ang uban “kanunayng puliki diha sa buluhaton sa Ginoo” bisan pag nag-antos sa mga pagsulay. (1 Cor. 15:58) Daghan ang padayong nagmantala sa maayong balita sulod na sa mga dekada nga walay hunong. (Heb. 10:23) Gipabilhan gayod ni Jehova ang tanan sa maong mga sakripisyo agig pagpaluyo sa intereses sa Gingharian.—Heb. 6:10.
4 Ang pagsentro sa atong mga kinabuhi diha sa pagsimba kang Jehova, nga naglakip sa buluhatong pagwali, motabang kanato sa paghunahuna kanunay nga haduol na ang adlaw ni Jehova. Kini manalipod kanato nga malinga sa kalibotan ni Satanas ug magpalig-on sa atong determinasyon nga mahuptan kanunay ang balaang panggawi. (2 Ped. 3:11-14) Sa pagkatinuod, ang pagtuman sa atong ministeryo nga may pangisip sa pagkadinalian makaluwas sa atong kaugalingon ug niadtong mamati kanato.—1 Tim. 4:16.