Ipakita ang Personal nga Interes—Pinaagi sa Pagsuknag mga Pangutana ug Pagpatalinghog
1 Gusto sa kadaghanang tawo nga mopahayag sa ilang mga opinyon apan dili gustong sermonan o sukitsukiton. Busa, isip Kristohanong mga ministro, kita kinahanglang makakat-on sa arte sa pagpahinabo nga ipahayag sa mga tawo ang ilang mga opinyon pinaagig mga pangutana.—Prov. 20:5.
2 Ang atong mga pangutana angayng makapukaw kanila sa paghunahuna, dili mopabati kanila nga gipakaulawan. Sa dihang magsangyaw sa balaybalay, usa ka brader mangutana, “Sa imong hunahuna, modangat kaha ang panahon nga ang mga tawo magtagad sa usag usa uban sa kaligdong ug pagtahod?” Depende sa tubag, siya mopadayon sa pag-ingon, “Sa imong hunahuna, unsay gikinahanglan aron mahitabo kana?” o “Nganong kanay imong pagtuo?” Sa dihang magsangyaw sa di-pormal nga paagi ug diha sa publikong mga dapit, ang laing brader mangutana niadtong adunay mga anak, “Unsa ang labing nagustohan nimo isip usa ka ginikanan?” Unya siya mangutana, “Unsay labing gikabalak-an nimo?” Matikdi nga ang maong mga pangutana magpahinabo nga ipahayag sa mga tawo ang ilang mga opinyon nga dili mobating gipakaulawan. Sanglit nagkalainlain ang mga kahimtang, basin gikinahanglan natong ipasibo ang topiko ug paagi sa atong pagpangutana aron kana mohaom sa mga tawo sa atong teritoryo.
3 Pagpahinabo nga Ipahayag sa mga Tawo ang Ilang Opinyon: Kon ang mga tawo andam mosulti kanimo kon unsay ilang mga hunahuna, magpatalinghog nga mapailobon ug ayaw pagsakgaw. (Sant. 1:19) Pasalamati ang ilang mga komento. (Col. 4:6) Ikaw yanong makaingon: “Makaiikag kana. Salamat sa pagsulti kanako niana.” Kon mahimo, sinserong dayega sila. Sa malulotong paagi, pangutanag dugang aron masusi kon unsay ilang hunahuna ug kon nganong kanay ilang pagbati. Hisgoti ang usa ka ulohan nga kamo magkasinabot. Kon buot nimong dad-on ang ilang pagtagad sa usa ka teksto, ikaw makaingon, “Sa imong hunahuna, posible ba kining mahitabo?” Likayi ang pagkadogmatiko o pagkamalalison.—2 Tim. 2:24, 25.
4 Ang reaksiyon sa uban sa atong mga pangutana mahimong magdepende pag-ayo kon giunsa nato sa pagpatalinghog. Ang mga tawo makaila kon sinsero ba gayod kitang nagapatalinghog. Matod sa usa ka nagapanaw nga magtatan-aw, “Kon imong ipakita nga ikaw andam ug mapailobong magpatalinghog sa mga tawo, kini adunay katingalahang gahom sa pagdani ug maoy usa ka kahibulongang pagpahayag ug mainitong personal nga interes.” Ang pagpatalinghog sa uban makahatag kanilag dignidad, ug kana mahimong magtukmod kanila sa pagpatalinghog sa maayong balita nga gusto natong ipaambit kanila.—Roma 12:10.