Mga Batan-on nga Nagasidlak Ingong mga Magbabanwag
1. Sa unsang paagi gipadayag sa Bibliya nga ang mga Kristohanon mailhang lahi, ug sa unsang paagi kanang mga pulonga mapadapat sa Kristohanong mga batan-on karon?
1 Giingnan ni Jesus ang iyang mga tinun-an: “Kamo ang kahayag sa kalibotan.” (Mat. 5:14, 16) Sama sa usa ka siyudad nga nahimutang sa tuktok sa usa ka bungtod, nga nagsidlak tungod sa kahayag sa adlaw, sila mailhang lahi. Karong adlawa, daghang batan-ong mga Kristohanon “nagasidlak ingong mga magbabanwag sa kalibotan” tungod sa ilang matul-id nga panggawi ug madasigong pagsangyaw.—Filip. 2:15; Mal. 3:18.
2. Unsay pipila ka paagi nga makasangyaw ka ngadto sa mga magtutudlo ug mga klasmet?
2 Diha sa Eskuylahan: Sa unsang paagi makasangyaw ka diha sa eskuylahan? Gipahimuslan sa pipila ka batan-on ang mga panaghisgot diha sa klase bahin sa mga ulohang sama sa droga, ebolusyon, ug terorismo—sa paghisgot lang ug pipila. Gigamit sa usa ka sister ang giasayn nga mubong-sinulat bahin sa terorismo aron makasangyaw bahin sa Gingharian sa Diyos ingong matuod nga paglaom sa katawhan. Nakadayeg ang magtutudlo sa maayong-pagkahan-ay nga taho, ug nagbukas kadto sa dalan sa dugang pagpamatuod.
3. Sa unsang paagi nagasidlak ka ingong magbabanwag diha sa eskuylahan pinaagi sa imong panggawi?
3 Ang laing paagi sa pagsidlak ingong magbabanwag maoy pinaagi sa imong panggawi ug kasarangang pamesti ug panghindik. (1 Cor. 4:9; 1 Tim. 2:9) Sa dihang makita sa mga estudyante ug mga magtutudlo nga ang imong panggawi lahi, ang pipila basin madani sa kamatuoran ingong resulta sa imong maayong panggawi ug mohatag kanimog kahigayonan sa pagpaambit sa mga kamatuoran sa Bibliya. (1 Ped. 2:12; 3:1, 2) Ang pagpasundayag ug diyosnong panggawi tingali dili sayon, apan si Jehova dagayang magapanalangin kanimo. (1 Ped. 3:16, 17; 4:14) Aron mapukaw ang interes sa maayong balita, mahimong mobasa kag literatura sa Bibliya panahon sa mga reses o ibilin kana diha sa dapit nga makita kana sa uban.
4. Unsay pipila ka kaayohan sa pagsangyaw diha sa eskuylahan?
4 Ang imong pagsidlak ingong magbabanwag diha sa eskuylahan makapalig-on sa imong pagtuo ug makatabang kanimo sa pag-ugmad ug nahiangayng garbo diha sa pag-alagad kang Jehova. (Jer. 9:24) Magsilbi usab kining panalipod. Matod sa usa ka sister, “Ang usa ka kaayohan sa pagsulti bahin sa akong mga tinuohan mao nga ang mga estudyante dili mosulay sa pagpugos kanako sa pagbuhat ug mga butang nga dili uyon sa giingon sa Bibliya.”
5. (a) Sa unsang paagi gipalapad sa pipila ka batan-on ang ilang ministeryo? (b) Unsay imong espirituwal nga mga tumong?
5 Gipalapad nga Pag-alagad: Ang laing paagi diin daghang batan-on nagasidlak ingong mga magbabanwag maoy pinaagi sa pagpalapad sa ilang ministeryo. Sa pagkatapos sa hayskul, usa ka brader nadasig sa pag-alagad sa dapit diin may dakong panginahanglan alang sa mga magmamantala sa Gingharian. Siya maoy bahin sa usa ka gamayng kongregasyon nga usa rag ansiyano. “Nalingaw kaayo ako sa akong pagkinabuhi dinhi,” misulat siya sa usa ka higala. “Ang ministeryo makapadasig kaayo! Kami makaestorya ug mga 20 minutos sa matag balay tungod kay ang mga tawo gustong makabati sa tanan nga imong isulti kanila.” Midugang siya: “Nanghinaot gayod ako nga ang tanang batan-on magbuhat ug susamang butang ug mobati sama sa akong gibati. Walay butang nga mas maayo kay sa pag-alagad kang Jehova uban sa tanan natong nabatonan.”
6. Nganong inyong gipasigarbo ang mga batan-on sa inyong kongregasyon?
6 Mapasigarbohon kaayo kami kaninyong mga batan-on nga nagasidlak ingong mga magbabanwag sa kalibotan! (1 Tes. 2:20) Samtang kamo nag-alagad kang Jehova uban sa bug-os ninyong kasingkasing, kalag, hunahuna, ug kusog, inyong anihon ang “usa ka gatos ka pilo karon niining yugtoa sa panahon . . . ug sa umaabot nga sistema sa mga butang sa kinabuhing walay kataposan.”—Mar. 10:29, 30; 12:30.