“Nagasidlak Ingong mga Magbabanwag”

¹ Taliwala sa espirituwal ug moral nga kangiob niining presenteng sistema sa mga butang, mga unom ka milyong magsisimba sa matuod nga Diyos, si Jehova, ang “nagasidlak ingong mga magbabanwag” diha sa 234 ka nasod sa tibuok kalibotan. (Filip. 2:15) Tungod niini dali ra kitang mamatikdan. Sa unsang paagi atong ibanaag ang bililhong kahayag sa kamatuoran nga gikan kang Jehova?​—2 Cor. 3:18.

² Atong mga Panggawi: Dali rang mamatikdan sa mga tawo ang atong panggawi. (1 Ped. 2:12) Nakamatikod ang usa ka babaye nga ang usa ka Saksi nga kauban sa trabaho maoy maluloton ug matinabangon ug dili mamalikas o mokatawa sa law-ay nga mga pasiaw. Sa dihang buot pasuk-on sa uban ang Saksi pinaagi sa pagpamalikas sa iyang atubangan, nagpabilin siyang kalmado apan malig-on sa kon unsay husto. Unsay epekto niini ngadto sa maong babaye? Ang babaye miingon: “Nakadayeg kaayo ako sa iyang panggawi nga misugod ako sa pagsuknag mga pangutana bahin sa Bibliya. Misugod ako sa pagtuon sa Pulong sa Diyos ug nabawtismohan sa ulahi.” Siya midugang: “Ang iyang panggawi maoy nakadani kanako sa pagsusi sa mga pagtulon-an sa mga Saksi ni Jehova.”

³ Ang atong tinamdan maylabot sa awtoridad, ang atong panglantaw sa kalibotanong mga kagawian, ug ang atong maayong sinultihan nagpahinabo sa mga Saksi ni Jehova nga mamatikdan ingong katawhan nga nagkinabuhi subay sa hataas nga mga sukdanan sa Bibliya. Ang maong maayong mga buhat makahimaya kang Jehova ug makadani sa uban ngadto sa iyang pagsimba.

⁴ Atong Sinultihan: Siyempre, kadtong makakita sa atong maayong panggawi mahimong walay mahibaloan kon nganong kita lahi gawas kon isulti ta kanila ang atong mga pagtulon-an. Ang imo bang mga kauban sa trabaho o kaeskuyla nahibalo nga ikaw usa sa mga Saksi ni Jehova? Nangita ka bag mga kahigayonan nga makapamatuod sa dihang ikaw malangkit sa ordinaryong panaghisgot? Determinado ka ba sa ‘pagpalamdag sa imong kahayag atubangan sa mga tawo’ sa matag haom nga higayon?​—Mat. 5:14-16.

⁵ Ang pagtuman sa atong sugo ingong mga tigdala sa kahayag nagkinahanglag pagsakripisyo sa kaugalingon. Ang tibuok-kalag nga tinamdan mopalihok kanato sa pagpalabay sa dili kaayo hinungdanong mga butang aron dako ang mahimo kutob sa atong maarangan diha sa nagaluwas-ug-kinabuhing buluhaton sa pagsangyaw ug paghimog mga tinun-an.​—2 Cor. 12:15.

⁶ Pinaagi sa atong panggawi ug sinultihan, hinaot magpadayon kita sa pagsidlak ingong mga magbabanwag. Kon himoon nato kana, ang uban matukmod sa pagduyog kanato sa paghimaya kang Jehova.