Mga Magmamantala sa Gingharian Nagtaho

Maayong mga Buhat nga Magahimaya Kang Jehova

SA IYANG Wali sa Bukid, si Jesus miingon ngadto sa iyang mga tinun-an: “Palamdaga ang inyong kahayag atubangan sa mga tawo, aron ilang makita ang maayo ninyong mga buhat ug mohatag ug himaya sa inyong Amahan nga anaa sa mga langit.” (Mateo 5:16) Sa samang paagi, ang matuod nga mga Kristohanon karong adlawa naghimo ug ‘maayong mga buhat’ nga magahimaya kang Jehova.

Unsa ba ang maong maayong mga buhat? Naglakip kini sa pagwali sa maayong balita, apan ang atong sulundang panggawi mahinungdanon usab nga bahin. Kasagaran ang atong maayong panggawi ang magadani sa sinugdan sa mga tawo nganha sa Kristohanong kongregasyon. Ang mosunod nga mga kasinatian naghulagway kon giunsa sa mga Saksi ni Jehova sa Martinique ‘pagpalamdag sa ilang kahayag atubangan sa mga tawo.’

Samtang naghimo sa balay-balay nga buluhatong pagsangyaw, usa sa mga Saksi ni Jehova miduaw sa usa ka babayeng Katoliko. Sulod sa 25 ka tuig kining bayhana nagpuyopuyo uban sa usa ka lalaki nga walay pagpakasal. Nasayod siya sa mga pagtulon-an sa mga Saksi ni Jehova, sanglit siya, mga pito ka tuig nga miagi, nakadawat sa librong Ikaw Mabuhing Walay Kataposan sa Paraiso sa Yuta.a Giingnan sa babaye ang Saksi: “Adunay daghan kaayong relihiyon. Ambut kon kinsay tuohan taliwala niining tanang kalibog.” Gipatin-aw sa Saksi nga ang kamatuoran makaplagan lamang sa Bibliya ug aron makaplagan kini, kinahanglang tun-an niya pag-ayo ang Kasulatan ug mag-ampo sa Diyos alang sa iyang espiritu ug pagtultol.

Gipatik sa Watchtower Bible and Tract Society of New York, Inc.

Sa taas nga panahon, bisan pag interesado nga motuon ug Bibliya, ang babaye mibalibad sa ubay-ubay nga pagdapit aron motambong sa Kristohanong mga tigom sa Kingdom Hall sa mga Saksi ni Jehova. Ngano? Labihan siya ka maulawon. Hinunoa, human makadawat ug imbitasyon alang sa Memoryal sa kamatayon ni Kristo, nabuntog niya ang iyang kamaulawon ug mitambong.

Ang labing nakapadani kaniya mahitungod sa tigom mao ang mahigugmaong palibot sa Kingdom Hall. Wala pa siya sukad makasinatig ingon ka tiunay nga pakighigala sa iyang simbahan! Human niadtong tigoma siya misugod pagtambong sa tanang tigom nga gidumala sa lokal nga mga Saksi, ug sa wala madugay iyang gipakaslan ang lalaking iyang gipuyopuyo. Usa na siya karon ka bawtismadong membro sa kongregasyon.

Ang maayong mga buhat sa laing Saksi nagpatunghag maayong mga resulta. Siya nagbaton ug sinaligan nga katungdanan sa usa ka opisina. Human nga mapatrabaho ang usa ka lalaking taga-isla sa Réunion, ang pipila sa mga trabahante misugod pagbugalbugal kaniya tungod sa iyang pagkaputot. Siya nahimong kataw-anan. Sa kasukwahi, ang Saksi sa kanunay maluloton ug matinahoron ngadto sa lalaki. Sa wala madugay siya nangutana kon nganong lahi siya kaayo.

Gisaysay sa Saksi nga ang iyang matinahorong panggawi mao ang resulta sa mga prinsipyo sa Bibliya nga iyang nakat-onan gikan sa mga Saksi ni Jehova. Iyang gipakita usab kaniya kon unsay giingon sa Kasulatan mahitungod sa mga katuyoan sa Diyos ug sa paglaom sa usa ka bag-ong kalibotan. Ang lalaki midawat ug usa ka pagtuon sa Bibliya, misugod pagtambong sa Kristohanong mga tigom, ug nagpakasal sa babaye nga iyang gipuyopuyo.

Sa ngadtongadto siya mibalik sa Réunion. Sa nangagi, siya nakasinatig mga suliran batok sa iyang mga paryente, ilabina batok sa pamilya sa iyang asawa. Apan karon sila nakadayeg pag-ayo sa iyang maayong Kristohanong panggawi. Ang lalaki nabawtismohan ug sa pagkakaron usa na ka ministeryal nga alagad. Ang ubay-ubayng membro sa pamilya, lakip ang iyang asawa ug duha ka anak babaye, nag-alagad usab diha sa Kristohanong kongregasyon ingong mga magmamantala sa maayong balita sa Gingharian sa Diyos.

[Footnote]