Mga Magmamantala sa Gingharian Nagtaho
Ang mga Karnero ni Jesus Nagapatalinghog sa Iyang Tingog
SAMTANG ang pagwali nga buluhaton nagakaylap sa tanang bahin sa yuta, si Jehova pinaagi sa iyang mga manulonda nagatultol sa iyang mga alagad ngadto sa samag-karnero nga mga tawo. Sila nagapatalinghog sa tingog ni Jesus ug nakakat-on sa pag-alagad kaniya nga nagapanlantaw sa kinabuhing dayon. Si Jesus nagsulti sa Juan 10:27, 28: “Ang akong karnero nagapatalinghog sa akong tingog, ug ako nakaila kanila, ug sila nagasunod kanako. Ug hatagan ko sila ug kinabuhing dayon.” Matikdi kon sa unsang paagi ang mga matinud-anon ug kasingkasing sa Madagascar nagpatalinghog sa tingog ni Jesus.
Usa sa mga Saksi ni Jehova naghatag ug mga kopya sa mga librong Ikaw Mabuhing Walay Kataposan sa Paraiso sa Yuta ug Ang Imong Pagkabatan-on—Pagpahimulos sa Labing Maayo Niini sa usa ka doktor nga mianha sa pagheling sa iyang masakiton nga amahan.
Ang doktor usa ka Protestante ug supak gayod sa mga Saksi apan iyang gibasa ang libro ug gisusi ang mga kasulatan diha sa iyang kaugalingong Bibliya. Ang iyang asawa, usa ka Katoliko ug usab usa ka doktor, nagbasa sa Pagkabatan-on nga libro sa makadaghan kay matud niya morag gisulat kana sa linain alang kaniya. Ang pagpatin-aw sa Sosyedad nga pinasikad sa Bibliya labot sa kahinungdanon sa 1914 nakadani kanilang duha. Ang bana nakigkontak sa Saksi nga naghatag kaniya sa mga libro. Ang Saksi naghatag kaniya sa Life—How Did It Get Here? By Evolution or by Creation? ug nakigsabot sa pagbisita kaniya ug sa iyang asawa sa pagtubag sa ilang mga pangutana. Sa dihang gibisitahan niya sila, gisugdan niya ang usa ka regular nga pagtuon sa Bibliya sa magtiayon ug ilang tulo ka mga anak. Tulin kaayo ang pag-uswag sa pagsabot sa Bibliya.
Pagkatapos sa unang pagtuon, ang tibuok pamilya misugod sa pagtambong sa mga tigom sa Kingdom Hall ug wala madugay human niadto nagpalista diha sa Tunghaan sa Teokratikanhong Ministeryo. Ang pamatasan sa mga bata nagmaayo kaayo. Gumikan sa ilang pagtuon sa Bibliya, ilang nakat-onan nga ang pagsaulog sa adlawng natawhan ug ubang mga relihiyosong pangilin dili Kristohanon; busa, mihunong sila sa pagbantay niana. Ang bana midumili sa paghatag sa iyang dugo sa usa ka paryente, bisan tuod ang ulohan wala pa mahisgoti diha sa pagtuon sa Bibliya. Sa wala madugay ang iyang uniporme sa karate dili na makit-an diha sa iyang aparador; iya kanang gipadala sa sastre aron himoong mga sinina sa iyang mga bata. Gisunog niya ang tanan niyang mga magasin ug mga libro bahin sa horoskopyo. Mga tulo ka bulan lamang gikan sa ilang pagsugod sa pagtuon sa Bibliya ang bana ug iyang asawa parehong miluwat gikan sa iya-iyang mga simbahan ug nagpahayag sa ilang tinguha sa pag-ambit diha sa pagwali nga buluhaton. Sila sa pagkakaron bawtismado na.
◻ Usa ka babaye sa Thailand nagpangita sa kamatuoran. Bisan tuod usa ka Buddhista, siya wala gayod magseryoso sa iyang relihiyon tungod kay siya nakakita sa tumang kasalingkapaw ug kahakog. Gawas pa, may kadaiyang mga kustombre nga iyang napalgan nga makapalagot. Napura na siya nianang tanan.
Unya, usa ka silingan nagsugyot nga sulayan niya ang mga Kristiyano ug nagdala kaniya sa usa ka simbahan sa Pentecostal. Ugaling, panahon sa serbisyo ang babaye gusto gayod nga mobiya ug mopauli tungod sa kalangas, sanglit ang tanang presente nag-ampo uban sa kusog nga tingog. Kadto ang kataposang higayon nga siya nagtambong sa maong simbahan.
Sa ulahi, iyang gisulayan ang Romano Katoliko nga simbahan. Bisan pa niana, human makatambong sa makadaghan, siya usab nakaamgo sa kasalingkapaw ug kahakog, maingon usab sa maluhong estilo-sa-panginabuhi sa pari. Napikal siya ug mihunong sa pag-adto didto. Ang pari nagmausisaon kon nganong siya mibiya. Pagkatapos niya masayri ang katarongan, siya nag-ingon sa matiawtiawong paagi: “Kon gusto nimong moapil sa tinuod estriktong katawhan, pag-adto sa mga Saksi ni Jehova.” Siya nangutana: “Diin man sila?” Ang pari mitubag: “Duol sila sa buhatan sa abiyo sa tubig.” Sa sunod adlaw iyang gipangita sila sa walay kalamposan. Bisan pag nahigawad siya kanunay naghunahuna mahitungod sa mga Saksi ni Jehova.
Usa ka adlaw iyang nadunggan ang usa sa iyang mga silingan nga mayubitong miingon sa lain: “Sa dili madugay mahimo kang usa sa mga Saksi ni Jehova!” Pagkadungog niana, ang babaye midalidali pagduol sa maong silingan ug nangutana: “May mga Saksi ba ni Jehova dinhi?” “Oo,” ang tubag. “Ang pila moanhi sa kasilinganan nga nagasangyaw sa balay-balay. Mailhan nimo sila tungod sa ilang hinlo ug maayong pamiste.” Sa ingon midagan siya sa pagpangita kanila. Sa sinugdan wala niya sila makita, apan sa dihang naglakaw balik sa iyang balay, iyang namatikdan ang duha ka maayo ug pamiste nga mga babaye nga nakig-estorya sa laing tawo. Miduol siya ug nangutana kanila kon sila ba mga Saksi ni Jehova. Sa dihang sila miingon nga sila mao, siya mihangyo: “Palihog pag-adto kamo sa akong balay. Buot kong makig-estorya kaninyo.”
Usa ka pagtuon sa Bibliya ang nasugdan, ug bisan pa sa pagsupak ug pagbiaybiay gikan sa mga sakop sa pamilya, kining bayhana nagsugod sa pagtambong sa mga tigom ug sa pagpamatuod sa iyang mga paryente.
Si Jesus sa pagkatinuod nakaila sa iyang karnero ug nagatigom kanila ngadto sa iyang organisasyon alang sa pagkalabang-buhi sa iyang bag-ong kalibotan sa pagkamatarong.