Kon sa Unsang Paagi Mapadayon ang Pagkamasiboton
1 Ang pagkamainiton ni Apolos diha sa ministeryo makapahinumdom kanato sa mga isigka-Kristohanon karon nga masiboton kaayo diha sa buluhatong pagsangyaw. (Buhat 18:24-28) Hinuon, kitang tanan gitambagan: “Ayaw paglangaylangay sa inyong buluhaton. Magmainiton sa espiritu.” (Roma 12:11) Unsay makatabang kanato aron atong mabatonan ug mapadayon ang pagkamasiboton alang sa Kristohanong ministeryo?
2 Sugnoran sa Kahibalo: Human magpakita si Jesus ngadto sa duha sa iyang mga tinun-an ug “gibadbad niya kanila ang mga butang maylabot sa iyang kaugalingon diha sa tibuok nga Kasulatan,” sila miingon: “Dili ba ang atong mga kasingkasing nagdilaab man samtang nakigsulti siya kanato sa dalan?” (Lucas 24:27, 32) Sa samang paagi, dili ba ang atong mga kasingkasing magadilaab sa kaukyab sa dihang mabatonan nato ang mas dakong pagsabot sa Pulong sa Diyos? Oo, ang pagtuo sugnoran sa kahibalo. Ang Roma 10:17 nagpatin-aw: “Ang pagtuo mosunod sa butang nga nadungog.” Sa dihang ang atong mga kasingkasing mahupong sa pagsalig sa mga saad ni Jehova, dili gayod kita makahunong sa pagsulti bahin sa mga butang nga atong nahibaloan!—Sal. 145:7; Buh. 4:20.
3 Dili kita bug-os makasalig sa kahibalo nga atong naangkon pinaagi sa nangagi nga pagtuon aron magpadayong lig-on ang atong gugma alang sa Diyos ug kusog nga magadilaab ang atong kasibot alang sa iyang buluhaton. Kinahanglan natong padayon nga pauswagon ang atong pagsabot sa kamatuoran ug palalomon ang atong gugma kang Jehova. Kay kon dili, ang atong pag-alagad kaniya inanay nga mahimong rutina na lamang. (Pin. 2:4) Ang Pulong sa Diyos nagaawhag kanato nga ‘padayong molambo sa tukmang kahibalo sa Diyos.’—Col. 1:9, 10.
4 Atong mga Batasan sa Pagtuon: Busa, maayong susihon nato ang atong mga batasan sa pagtuon. Pananglitan, makabadlis tingali kita sa mga tubag diha sa artikulong tun-anan sa Bantayanang Torre ug makahatag ug tukmang mga komento. Apan ato bang ginatan-aw ang gisitar nga mga teksto ug gipamalandong kon sa unsang paagi ang impormasyon mapadapat sa atong kinabuhi? Sa senemanang pagbasa sa Bibliya, naningkamot ba kita sa paghimog dugang nga panukiduki kon itugot sa atong mga kahimtang ug pamalandongon ang mga pagtulon-an nga anaa niana? (Sal. 77:11, 12; Prov. 2:1-5) Pagkamapuslanon ang pagpamalandong ug paghatag ug bug-os nga pagtagad sa Pulong sa Diyos! (1 Tim. 4:15, 16) Ang maong seryosong pagtuon makapalig-on ug makapadasig kanato aron mahimong “masiboton sa maayong mga buhat.”—Tito 2:14.