“Magmainiton sa Espiritu”
1. Unsang tinamdan ang hinungdanon diha sa atong pagsangyaw?
1 Kinahanglan kitang magmasiboton sa atong Kristohanong pag-alagad. Kita gidasig nga “magmainiton sa espiritu” ug “magpaulipon kang Jehova.” (Roma 12:11) Apan daghang butang ang makawala sa atong kasibot sa pagsangyaw. Sa unsang paagi atong ‘masugniban sama sa kalayo’ ang atong kasibot ug kadasig sa pag-alagad sa Gingharian?—2 Tim. 1:6, 7.
2. Sa unsang paagi nalangkit ang personal nga pagtuon sa Bibliya sa kasibot sa pagsangyaw?
2 Personal nga Pagtuon sa Bibliya: Ang usa ka epektibong magsasangyaw sa Gingharian mao kadtong nahigugma sa balaod sa Diyos ug natandog pag-ayo sa mga kamatuoran nga mabasa sa Bibliya. (Sal. 119:97) Sa dihang atong makat-onan ang mga kamatuoran sa Bibliya panahon sa atong personal nga pagtuon, ang atong kasingkasing matandog ug mosamot pa ang atong kasibot. Ang atong gugma sa Magtatagana sa maong kamatuoran ug ang atong tinguha sa pagpaambit sa maayong balita ngadto sa uban motukmod kanato sa pagdayeg sa Diyos ug sa pagmantala sa iyang ngalan diha sa publiko. (Heb. 13:15) Tataw nga ang atong kasibot sa pagsangyaw sa maayong balita magpaila nga ato gayod kanang gipabilhan.
3. Sa unsang paagi ang espiritu sa Diyos makaapektar sa atong ministeryo?
3 Pag-ampo Alang sa Espiritu sa Diyos: Dili kita mahimong epektibo sa ministeryo pinaagi lang sa atong kaugalingong kusog. Kita magmasiboton gayod kon ang espiritu sa Diyos padayong nagalihok diha kanato. (1 Ped. 4:11) Ang pagpakigsuod sa Tinubdan sa “dinamikong kusog” makapalig-on kanato sa espirituwal aron kita makasangyaw nga maisogon. (Isa. 40:26, 29-31) Sa dihang si apostol Pablo nakaagom ug kalisdanan sa iyang ministeryo, iyang ‘nabatonan ang tabang nga gikan sa Diyos.’ (Buh. 26:21, 22) Ang balaang espiritu ni Jehova makatabang kanato nga magmainiton sa atong ministeryo, busa angayng mag-ampo kita alang niana.—Luc. 11:9-13.
4. Unsay maayong resulta sa pagkamasiboton, apan unsay angay natong hinumdoman?
4 Ang mainitong kasibot sa pagsangyaw sa Gingharian makaaghat sa mga isigka-Kristohanon nga magmasiboton gayod. (2 Cor. 9:2) Diha sa teritoryo, kasagaran ang mga tawo mosanong sa mensahe kon kini gipresentar uban ang kadasig ug hugot nga pagtuo. Apan, ang kasibot kinahanglang ubanan sa pagkamataktikanhon ug kalumo. (Tito 3:2) Maningkamot kita kanunay nga pasidunggan ang tagbalay ug tahoron ang iyang opinyon.
5. Unsang inspiradong tambag ang angay natong paningkamotan nga ipadapat?
5 Isip mga magmamantala sa Gingharian, hinaot nga kanunay kitang “magmainiton sa espiritu.” Ugmaron nato ang atong kasibot pinaagi sa personal nga pagtuon sa Bibliya ug tim-os nga pag-ampo kang Jehova, ang usa nga makatagana kanatog balaang espiritu. Niining paagiha, mahimo kitang masiboton sa pagtuman sa atong ministeryo “uban ang balaang espiritu ug hugot nga pagtuo.”—1 Tes. 1:5.