Magmasiboton Kanunay sa Ministeryo
1 Sa matag tuig sukad pa sa 1992, ang mga Saksi ni Jehova sa tibuok kalibotan masibotong naggugol ug kapin sa usa ka bilyong oras sa pagsangyaw ug paghimog tinun-an. Malipayon gayod kitang nakaamot usab sa maong talagsaong kalamposan!—Mat. 28:19, 20.
2 Siyempre, angay gayong pasalamatan ug dayegon si Jehova sa iyang padayong pagpaluyo kanato niining ‘makuyaw nga mga panahon.’ (2 Tim. 3:1) Unsa may kinahanglan natong buhaton aron kita magmasiboton niining hinungdanong buluhaton?
3 Hinungdan sa Kasibot: Ang halalom nga gugma sa Diyos ug sa silingan, ug ang atong tinguha sa pagtuman sa atong dedikasyon ang motukmod kanato nga magmasiboton sa atong pag-alagad. (Mat. 22:37-39; 1 Juan 5:3) Ang gugma mopalihok kanato sa pagsakripisyo aron kita bug-os makapakig-ambit sa pagsangyaw.—Luc. 9:23.
4 Paningkamoti nga Makapabiling Masiboton: Ang atong kaaway, ang Yawa naningkamot gayod sa pagpaluya sa atong kasibot sa ministeryo. Ang kawalay-interes sa mga tawo sa teritoryo, ang mga kabaldahan niining kalibotana, ang mga kapit-os sa panginabuhi, ug ang kabalaka tungod sa mga kaluyahon maoy pipila lamang sa mga instrumento nga gigamit ni Satanas sa pagpaluya kanato.
5 Busa, angay gayod kitang maningkamot nga makapabiling masiboton. Hinungdanong ugmaron nato “ang gugma nga [atong] nabatonan sa sinugdan.” Nalangkit niana ang makanunayong pagbasa ug pagpamalandong sa Pulong sa Diyos, ang Bibliya, ug pagpahimulos sa tanang espirituwal nga mga tagana nga gihikay sa “matinumanon ug maalamong ulipon.”—Pin. 2:4; Mat. 24:45; Sal. 119:97.
6 Ingon sa tin-awng gipakita sa mga tagna sa Bibliya, ang adlaw sa paglaglag ni Jehova sa mga daotan haduol na kaayo. (2 Ped. 2:3; 3:10) Tungod niini, paningkamotan nato nga magmasiboton kanunay diha sa ministeryo, nga bug-os makig-ambit sa tibuok-kalibotang pagsangyaw ug paghimog tinun-an!