Mangayo Ka bag mga Ngalan sa mga Tawo nga Imong Matabangan?
Kon ikaw sa pagkakaron nagadumalag pagtuon sa Bibliya, nganong dili suknaon ang gitun-an kon aduna ba siyay mga higala, paryente, o kaila nga gusto usab nga makakat-on kon unsay gitudlo sa Bibliya? Sagad nga ihatag ang daghang ngalan. Uban sa pagtugot sa gitun-an, makahisgot ka sa iyang ngalan inigduaw nimo nianang mga tawhana aron tanyagan silag pagtuon sa Bibliya. Mahimo kang moingon, “Si [Ngalan sa gitun-an] nagtuon sa Bibliya, ug siya naghunahuna nga basin gusto usab nimong makapahimulos sa among walay-bayad nga programa sa pagtuon sa Bibliya.” Unya ipasundayag sa mubo ang paagi sa pagdumala sa pagtuon, nga gamiton ang librong Gitudlo sa Bibliya.
Kon ikaw adunay gitun-an nga nagahimog dakong pag-uswag, imong madasig siya sa pagbatbat sa kahikayan sa pagtuon ngadto sa mga higala ug membro sa pamilya nga basin interesado niana. Siya makadapit kanila sa pag-apil sa iyang pagtuon. O kon dili kana kombenyente, siya makahikay nga imo silang mahibalag aron ipasundayag ang kahikayan sa pagtuon. Ang pagbuhat niini makadasig sa gitun-an nga mosugod sa pagpakig-ambit sa iyang kahibalo sa Bibliya ngadto sa uban.
Ang mga tawo nga regular nimong gibalik-duaw basin makahatag usab kanimog mga ngalan sa mga tawong matabangan bisan pag sila mismo wala pa modawat ug regular nga pagtuon sa Bibliya. Sa dihang imo silang tanyagan ug kopya sa librong Gitudlo sa Bibliya, yano kang makasukna, “Duna ka bay nailhan nga basin gustong makabaton ug kopya niining basahona?”
Tungod sa pagkadinalian sa panahon, buot natong gamiton ang tanang paagi sa pagtabang sa mga tawo nga makadungog ug makadawat sa maayong balita. Mangayo ka bag mga ngalan sa mga tawo nga imong matabangan?