Lima ka Paagi sa Pagpangitag Bible Study
1. Kon lisod ang pagpangitag Bible study diha sa atong teritoryo, unsay angay natong buhaton, ug ngano?
1 Nalisdan ka ba sa pagpangitag Bible study? Padayon sa pagpangita. Panalanginan ni Jehova kadtong dili mohunong sa pagbuhat sa iyang kabubut-on. (Gal. 6:9) Ang lima ka sugyot sa ubos makatabang kanimo.
2. Unsaon nato paggamit ang direktang paagi sa pagsugod ug pagtuon sa Bibliya?
2 Direktang Paagi: Daghang tawo ang nahibalo nga kita nagtanyag sa Ang Bantayanang Torre ug Pagmata!, apan wala tingali sila mahibalo nga nagtanyag kitag mga pagtuon sa Bibliya. Nganong dili nimo sulayan ang direktang paagi sa pagtanyag niana dihang mamalaybalay? Makapangutana ka usab sa mga interesadong imong ginaduaw kon gusto ba nilag pagtuon sa Bibliya. Kon mobalibad sila, makapadayon ka sa pagbilig literatura ug sa pag-ugmad sa ilang interes. Usa ka brader ang tigbilig magasin sa usa ka magtiayon sulod sa daghang tuig. Human makabilin sa kinabag-ohang mga magasin, siya mobiya na unta apan nakahunahuna sa pagpangutana: “Gusto ba ninyong magtuon sa Bibliya?” Sa iyang kahingangha, sila miingong oo. Karon sila mga bawtismado na.
3. Angay ba natong hunahunaon nga ang mga tigtambongan sa tigom gidumalahan nag pagtuon sa Bibliya? Ipatin-aw.
3 Mga Tigtambongan sa Tigom: Ayaw hunahunaa nga ang mga interesado nga imong makita diha sa mga tigom sa kongregasyon gidumalahan nag pagtuon sa Bibliya. Usa ka brader mitaho: “Kapin sa katunga sa akong mga Bible study nasugdan sa pagtuon pinaagi sa pagpakigsulti niadtong nanambong sa mga tigom.” Usa ka sister ang miduol sa usa ka maulawong babaye nga may bawtismadong mga anak nga babaye diha sa kongregasyon. Ang babaye tigtambongan na sa tigom sa mga 15 ka tuig ug kanunayng moabot sa Kingdom Hall inigsugod sa tigom ug mobiya dayon human niana. Misugot ang babaye nga magtuon ug ngadtongadto nabawtismohan. Ang sister misulat: “Nagmahay ko nga milabay pa ang 15 ka tuig una ko mangutana niya kon gusto ba niyang magtuon!”
4. Sa unsang paagi ang uban makatabang kanato sa pagkaplag ug mga interesado nga magtuon sa Bibliya?
4 Mga Interesado nga Gisugyot sa Uban: Usa ka sister maningkamot sa pagkuyog sa uban sa ilang mga Bible study. Uban sa pagtugot sa magtutudlo, siya mangutana sa Bible study inighuman sa pagtuon kon may kaila ba siya nga gustong magtuon sa Bibliya. Dihang motanyag sa librong Gitudlo sa Bibliya ngadto sa usa nga imong gibalikduaw, makasukna ka: “May kaila ka ba nga basin gustong makabaton niining libroha?” Usahay, may mga kahimtang nga ang mga magmamantala ug mga payunir dili na makaato sa pagdumalag pagtuon sa tanang mahibalag nila sa teritoryo. Busa, pahibaloa ang uban nga andam ka sa pagdumalag pagtuon sa Bibliya.
5. Nganong angay natong pangutan-on ang di-magtutuong mga kapikas sa mga igsoon diha sa kongregasyon kon gusto ba nilang magtuon?
5 Di-Magtutuong mga Kapikas: Duna bay mga magmamantala sa inyong kongregasyon nga may di-magtutuong mga kapikas? Ang pipila ka di-magtutuo dili gustong makig-estorya sa ilang Saksi nga kapikas bahin sa Bibliya apan mahimong modawat ug pagtuon uban sa usa nga dili sakop sa ilang pamilya. Labing maayo nga konsultahon una ang magtutuong kapikas kon unsay kinamaayohang paagi sa pagtanyag sa pagtuon.
6. Unsa ka hinungdanon ang pag-ampo dihang mangitag Bible study?
6 Pag-ampo: Ayaw gayod pakamenosa ang gahom sa pag-ampo. (Sant. 5:16) Si Jehova nagsaad nga dunggon niya ang atong mga pag-ampo kon kini nahiuyon sa iyang kabubut-on. (1 Juan 5:14) Usa ka brader nga puliki kaayog eskedyul nag-ampo nga makabaton siyag Bible study. Ang asawa nabalaka kon ang iyang bana may panahon ba sa pag-atimag Bible study, ilabina kon ang estudyante daghag problema. Busa iya kadtong gilakip dihang nag-ampo siyang makakaplag ang iyang bana ug Bible study. Gitubag ang ilang mga pag-ampo duha ka semana sa ulahi sa dihang usa ka payunir sa kongregasyon nakakaplag ug usa ka lalaki nga buot magtuon ug kana iyang gihatag sa brader. Ang asawa misulat: “Kadtong mobati nga dili makaarang sa pagdumalag pagtuon sa Bibliya, kini ang akong ikasulti: Himoang espesipiko ang inyong mga pag-ampo, ug ayawg hunong sa pag-ampo bahin niana. Dili gyod ikahubit ang among kalipay.” Kon molahutay ka, ikaw mahimong makakaplag usab ug Bible study ug mobatig kalipay kay may natabangan ka nga mosubay sa “dalan padulong sa kinabuhi.”—Mat. 7:13, 14.