Atong Ministeryo—Buluhaton nga Nagpadayag ug Kahangawa
1 Namatikdan ni Jesus nga ang mga panon sa katawhan nga nagpatalinghog sa iyang mensahe maoy “pinanitan ug nagkatibuagsa sama sa mga karnero nga walay magbalantay.” (Mat. 9:36) Uban ang malumong pagbati ug gugma, iyang gitudloan sila sa mga sukdanan ni Jehova, gihupay, ug gitagana nga may kahangawa ang ilang espirituwal nga mga panginahanglan. Samtang palandongon nato ang iyang mga paagi, makakat-on kita sa paghunahuna ug pagbati sama kang Jesus, ug ang maong hiyas sa kahangawa madayag diha sa atong ministeryo.
2 Sa daklit palandonga kon unsay sanong ni Jesus sa dihang ang mga tawong nagkinahanglan gayod ug tabang miduol kaniya. (Luc. 5:12, 13; 8:43-48) Siya nagpakitag konsiderasyon sa mga tawong may linaing mga panginahanglan. (Mar. 7:31-35) Siya nahibalo sa mga pagbati sa uban ug nagpakitag kabalaka. Wala siya maimpluwensiyahi sa gawasnong panagway lamang. (Luc. 7:36-40) Sa pagkatinuod, hingpit nga gibanaag ni Jesus ang malumong kahangawa sa atong Diyos.
3 “Giabot ug Kaluoy”: Dili lang tungod sa obligasyon nga si Jesus nagtuman sa iyang ministeryo. Siya “giabot ug kaluoy” sa katawhan. (Mar. 6:34) Sa susamang paagi karon, dili lang kita nagapahayag ug usa ka mensahe kondili kita nagatinguha sa pagluwas ug bililhong mga kinabuhi. Tinguhaa nga masabtan ang reaksiyon sa mga tawo. Nganong nabalaka o puliki kaayo sila? Sila ba gipasagdan ug gilimbongan lamang sa mga magbalantay sa bakak nga mga relihiyon? Ang atong tinuod nga interes sa uban mahimong magtukmod kanila sa pagpatalinghog sa maayong balita.—2 Cor. 6:4, 6.
4 Ang kahangawa makapatandog sa mga kasingkasing. Ingong ilustrasyon: Usa ka babaye nagbangotan sa pagkamatay sa iyang tulo-ka-bulan nga anak babaye. Sa dihang giduaw siyag duha ka Saksi, iya silang gipadayon nga may intensiyon nga ipanghimakak ang ilang mga argumento kon nganong gitugotan sa Diyos ang pag-antos. Apan ang maong babaye miingon sa ulahi: “Sila namati kanako nga may dakong kahangawa, ug sa dihang sila milakaw na, maayo na kaayo ang akong gibati nga ako miuyon nga sila moduaw pag-usab.” Naningkamot ka ba sa pagpakitag kahangawa sa tanan nga imong mahibalag diha sa pagsangyaw?
5 Ang pag-ugmad sa kahangawa motabang kanato sa pagpaambit sa tinuod nga kahupayan ngadto sa uban. Sa pagbuhat niana, atong mahimaya “ang Amahan sa malumong mga kaluoy,” si Jehova.—2 Cor. 1:3.