Maisogon Apan Makigdaiton
1 Daghan sa mga tawo nga atong masangyawan magpahayag sa ilang sinserong mga pagtuo nga sukwahi sa kamatuoran sa Bibliya. Bisan pag kinahanglan kitang mosangyaw nga maisogon, buot usab kitang “makigdinaitay sa tanang tawo” ug maglikay nga dili makapasuko kanila. (Roma 12:18; Buh. 4:29) Sa unsang paagi kita mahimong maisogon apan makigdaiton samtang atong ipresentar ang mensahe sa Gingharian?
2 Pangitag Punto nga Inyong Kauyonan: Ang usa ka tawong makigdaiton dili makiglalis. Dili mosanong ang tagbalay sa atong mensahe kon atong ipanghimakak gayod ang dugay na niyang gituohan nga mga pagtulon-an. Kon sayop ang iyang gisulti, mataktikanhon kitang makasulti ug usa ka punto nga lagmit iyang uyonan. Pinaagi sa pagpasiugda sa punto nga atong gikauyonan uban sa tagbalay, atong mahibaloan ang negatibo niyang mga pagbati ug matandog ang iyang kasingkasing.
3 Kon ato lang palabyon ang sayop nga panghunahuna sa tagbalay, wala ba nato ikompromiso o pahuyanga ang kamatuoran? Wala. Ang atong buluhaton ingong Kristohanong mga ministro mao ang pagsangyaw sa maayong balita sa Gingharian sa Diyos, dili ang pagpanghimakak sa tanang sayop nga panghunahuna nga atong mahibalag. (Mat. 24:14) Imbes supakon ang sayop nga panghunahuna nga gipahayag, kita makalantaw niana ingong kahigayonan sa pagsabot sa hunahuna sa maong tawo.—Prov. 16:23.
4 Hupti ang Dignidad sa Tagbalay: Dunay mga panahon nga kinahanglan kitang magmaisogon sa dihang ipanghimakak ang sayop nga mga pagtulon-an. Apan, ingong makigdaitong mga tawo, kita dili magtamay o magsaway niadtong nagtuo ug nagtudlog kabakakan. Ang magarbohong tinamdan makapahilayo sa mga tawo, apan ang mapainubsanon ug maluloton nga paagi sa pagpakig-estorya magbukas sa hunahuna sa mga mahigugmaon sa kamatuoran. Ang pagpakitag pagtahod sa atong mamiminaw ug sa ilang mga gituohan maghupot sa ilang dignidad, ug sa ingon mas masayonan sila sa pagdawat sa atong mensahe.
5 Gikonsiderar ni apostol Pablo ang mga gituohan niadtong iyang gisangyawan ug gipaningkamotan niyang ikapresentar ang maayong balita sa paagi nga makatandog sa ilang mga kasingkasing. (Buh. 17:22-31) Siya andam nga mahimong “tanang butang ngadto sa tanang matang sa katawhan,” aron iyang ‘maluwas sa bisan unsa mang paagi ang pipila.’ (1 Cor. 9:22) Kita makahimo usab niana pinaagi sa pagkahimong makigdaiton samtang kita maisogong magsangyaw sa maayong balita.