“Makigdinaitay sa Tanang Tawo”
1. Unsang tambag sa Bibliya ang angay natong ipadapat dihang masuko ang tagbalay?
1 Ang katawhan ni Jehova mahigugmaon sa pakigdait ug kita nagsangyaw bahin sa pakigdait. (Isa. 52:7) Apan usahay may mga tawo nga masuko dihang moduaw kita sa ilang balay. Unsay makatabang aron kita magmakigdaiton sa maong situwasyon?—Roma 12:18.
2. Nganong importante nga kita magmasinabtanon?
2 Magmasinabtanon: Ang pipila masuko kay supak sila sa atong mensahe, pero lain ug rason ang uban kon nganong sila maglagot. Tingali kita miduaw sa dili kombenyenteng oras o kaha may mga problema ang tagbalay. Bisan pag ang atong mensahe maoy nakapasuko kaniya, angay natong hinumdoman nga siya lagmit nalimbongan. (2 Cor. 4:4) Ang pagkamasinabtanon makatabang nato nga magpabiling kalmado ug dili isipon nga kita ang ilang gikasuk-an.—Prov. 19:11.
3. Sa unsang paagi kita magmatinahoron sa tagbalay?
3 Magmatinahoron: Daghan sa atong teritoryo hugot sa ilang tinuohan. (2 Cor. 10:4) Duna silay katungod nga mamati o dili. Dili gayod nato tamayon ang tinuohan sa tagbalay o ipakita nga mas daghan kitag nahibaloan sa Bibliya. Kon kita papahawaon, angay kitang matinahorong mobiya.
4. Unsay ipasabot sa pagsulti sa madanihong paagi?
4 Sulti sa Madanihong Paagi: Bisag kasab-an ta, ang atong tubag angay nga malumo ug madanihon. (Col. 4:6; 1 Ped. 2:23) Inay makig-ergo, paningkamoting makahisgot kag punto nga inyong gikauyonan. Sa malumong paagi, puwede tingaling makapangutana ka sa hinungdan nga siya misupak. Aron malikayan nga siya mas masuko, maayong ihunong na lang ang estoryahay.—Prov. 9:7; 17:14.
5. Unsay mga benepisyo sa pagkamakigdaiton diha sa ministeryo?
5 Kon kita makigdaiton, ang tagbalay basin makahinumdom sa atong reaksiyon ug mamati sa sunod higayong may mosangyaw kaniya. (Roma 12:20, 21) Bisan pag siya morag supakero, basin may adlaw rang ma-Saksi siya. (Gal. 1:13, 14) Modawat man siya sa kamatuoran o dili, mahimaya nato si Jehova ug madayandayanan ang atong pagtulon-an kon huptan nato ang pagpugong sa kaugalingon ug pagkamakigdaiton.—2 Cor. 6:3.