Pagpauswag sa Atong Kahanas sa Ministeryo—Kon Unsay Himoon Dihang Masuko ang Tagbalay

Kon Nganong Hinungdanon: Daghan tag mahibalag sa ministeryo nga maminaw. Apan gitagna ni Jesus nga ang pipila magdumot o masuko nato. (Juan 17:14) Busa dili ta angayng matingala kon masuko ang tagbalay. Kon mahitabo kini, ang atong reaksiyon angay nga makapalipay sa usa nga atong girepresentahan, si Jehova. (Roma 12:17-21; 1 Ped. 3:15) Makatabang ni nga dili mograbe ang situwasyon. Makahatag sab nig pamatuod sa tagbalay ug sa uban, ug basig mas andam na silang maminaw sa mga Saksi ni Jehova sa sunod higayon.—2 Cor. 6:3.

Kon Unsaon Paghimo:

• Magpabiling kalmado ug mahigalaon. Makatabang ni nga mokalma ang tagbalay. Ayawg kasuko niya. (Eccl. 7:9) Posibleng duna siyay problema o nakaduaw ka sa dili kombenyenteng panahon. Bisan pag di siya ganahan sa atong mensahe, sagad tungod kini kay siya nalimbongan.—2 Cor. 4:4.

• Magmalumo ug magmatinahoron sa pagtubag. (Prov. 15:1) Nadisturbo ba nimo siya sa iyang pagkatulog o gibuhat? Dili ta angayng mangayog pasaylo tungod sa atong ministeryo, pero puwede kang magsori nga nakaduaw ka sa dili kombenyenteng panahon. Nasuko ba siya nato kay nakadungog siyag sayop nga impormasyon bahin kanato? Kon mao, makaingon ka: “Nakasabot ko kon nganong nasuko ka. Pero morag dili tinuod ang imong nadunggan. Puwede ba nakong ipatin-aw?” Supak ba siya sa atong mga gituohan, tingali bahin sa pagpalagpot o sa dugo? Makaingon ka: “Nasabtan tika. Mao pod nay hunahuna sa uban. Puwede ba nakong ipakita diha sa Bibliya ang gibasehan sa maong pagtulon-an?”

• Kon suko kaayo ang tagbalay, mas maayo tingaling dili na motubag ug mobiya na lang. Kon moingon siya nga di na siya gustong magpaduaw sa mga Saksi, puwede kang moingon nga gitahod nimo ang iyang desisyon.

Sulayi Karong Bulana:

• Paghimog praktis sesyon panahon sa inyong pamilyahanong pagsimba.

• Pagbiya ninyo sa nasukong tagbalay, hisgoti uban sa imong partner kon unsa untay mas maayong himoon sa maong kahimtang.