Sundoga si Kristo Diha sa Imong Ministeryo
1 Si Jesus naghatag kanato ug panig-ingnan nga angayng sundogon diha sa atong ministeryo. Ang iyang halalom nga gugma alang sa Diyos ug sa mga tawo gipasundayag niya sa daghang higayon ug sa daghang paagi. Iyang gitudlo ang kamatuoran ngadto sa mga maaghop ug naghimo siyag mga buhat sa mahigugmaong-kalulot alang sa mga sinakit ug dinaogdaog.—Mat. 9:35.
2 Ang Panig-ingnan ug mga Pagtulon-an ni Jesus: Si Jesus wala malinga pinaagi sa pag-apil-apil sa politika o sa paghimo lamang ug dalayegong mga buhat sa kaluoy alang sa kaayohan sa komunidad. Wala usab siya magpalinga sa ubang maayog-tuyo nga mga kalihokan aron dili mabalda ang iyang pangunang buluhaton. (Luc. 8:1) Iyang giuna ang pagsangyaw sa maayong balita sa Gingharian sa Diyos nga mao ang bugtong permanenteng solusyon sa mga suliran sa katawhan. Si Jesus adunay hinungdanong buluhaton nga himoon ug limitado ra ang iyang panahon sa paghimo niana. Sa dihang gihawiran sa mga taga-Capernaum si Jesus, iyang giingnan ang iyang mga tinun-an: “Mangadto kita sa laing dapit . . . aron makawali usab ako didto, kay alang niini nga katuyoan nga ako mianhi.”—Mar. 1:38.
3 Human mabansay ang iyang mga tinun-an, gipalakaw sila ni Jesus uban niining espesipikong mga instruksiyon: “Pagwali, nga magaingon, ‘Ang gingharian sa mga langit haduol na.’” (Mat. 10:7) Iyang gitudloan ang iyang mga sumusunod nga kinahanglang ilang unahon ang intereses sa Gingharian. (Mat. 6:33) Ang panamilit nga mga pulong ni Jesus ngadto sa iyang mga tinun-an sa wala pa siya mokayab sa langit tin-awng nagpaila kon unsay angay nilang buhaton. Siya miingon: “Busa panglakaw kamo ug paghimog mga tinun-an sa katawhan sa tanang kanasoran.—Mat. 28:19.
4 Ang Kahinungdanon sa Gingharian: Ang pangunang ulohan nga hisgotan ni Jesus mao Gingharian sa Diyos, ug iyang giawhag ang iyang mga tinun-an sa pagsundog sa iyang panig-ingnan. Ang tawhanong mga paningkamot sa pagsulbad sa mga suliran sa katawhan dili gayod molampos. (Jer. 10:23) Ang Gingharian sa Diyos lamang ang magbalaan sa ngalan sa Diyos ug maghatag ug permanenteng kahupayan sa katawhan. (Mat. 6:9, 10) Ang pagtudlo sa mga kamatuoran sa Gingharian ngadto sa mga tawo nga “nagapanghupaw ug nagaagulo tungod sa tanang dulumtanang mga butang nga ginahimo” motabang kanila sa pagkinabuhi ug usa ka malipayon, malamposong kinabuhi karon ug sa paghawid pag-ayo sa kasaligang paglaom alang sa umaabot.—Ezeq. 9:4.
5 Si Jesus aktibo gihapong nakigbahin sa pagsangyaw sa maayong balita sa Gingharian sa Diyos, ug siya nagpasalig kanato nga iya kitang paluyohan. (Mat. 28:20) Sa unsang sukod nga nasundog nato diha sa atong ministeryo ang panig-ingnan nga gihatag ni Jesus kanato? (1 Ped. 2:21) Niining hinungdanon yugto sa kataposang mga adlaw, hinaot atong buhaton ang tanan natong maarangan sa pagsunod pag-ayo sa panig-ingnan nga gihatag ni Jesus diha sa ministeryo!