Ang Kristohanong Ministeryo—Atong Labing Hinungdanong Buluhaton
1 Kitang tanan adunay nagkalainlaing matang sa mga buluhaton nga kinahanglan natong himoon. Ang pagtagana alang sa kaugalingong panimalay maoy kinahanglanon nga gikan sa Diyos. (1 Tim. 5:8) Apan, ang buluhaton nga nalangkit nianang maong diyosnong kinahanglanon angayng dili mahimong mas hinungdanon kay sa buluhatong pagsangyaw sa Gingharian ug paghimog tinun-an.—Mat. 24:14; 28:19, 20.
2 Si Jesus naghatag kanato ug sulondan nga angayng sundon sa “pagpangita pag-una sa gingharian.” (Mat. 6:33; 1 Ped. 2:21) Bisan pag kabos sa materyal, gituman niya sa bug-os ang kabubut-on sa iyang Amahan. (Luc. 4:43; 9:58; Juan 4:34) Nagkugi siya sa pagsangyaw sa matag kahigayonan. (Luc. 23:43; 1 Tim. 6:13) Giawhag niya ang iyang mga tinun-an sa pagbaton ug samang dakong kaikag diha sa buluhatong pagpangani.—Mat. 9:37, 38.
3 Pagsundog Kang Jesus Karong Adlawa: Atong masundog ang panig-ingnan ni Jesus pinaagi sa pagpaningkamot sa pagkinabuhig yanong kinabuhi nga nagsentro sa pagtagad diha sa Kristohanong ministeryo. Kon aduna kitay mga kinahanglanon sa kinabuhi, tumanon nato ang tambag sa Bibliya nga dili magtigom ug daghan kaayong mga butang sa kalibotan. (Mat. 6:19, 20; 1 Tim. 6:8) Pagkamaayo gayod nga pauswagon ang atong pakig-ambit diha sa buluhatong pagsangyaw! Kon makasagubang kitag malisod nga mga kahimtang, hinaot manlimbasog kita sama sa gihimo ni Jesus, nga dili tugotan ang mga kabalaka sa kinabuhi nga molabaw sa atong labing hinungdanong buluhaton sa pagwali sa maayong balita sa Gingharian.—Luc. 8:14; 9:59-62.
4 Bisan ang mga tawong daghag responsabilidad nag-una sa buluhatong pagsangyaw. Usa ka igsoong lalaki nga may dakong pamilya, may dakong katungdanan sa trabaho, ug nag-alagad ingong ansiyano sa Kristohanong kongregasyon nag-ingon: “Akong giisip ang akong ministeryo ingong akong panguna nga buluhaton.” Usa ka payunir nga igsoong babaye miingon: “Ang pagpayunir mas bililhon pa kay sa usa ka malamposong sekular nga karera.”
5 Bisag unsa pay atong mga kahimtang, hinaot sundon nato ang panig-ingnan ni Jesus. Sa unsang paagi? Pinaagi sa paghimo sa atong Kristohanong ministeryo nga atong labing hinungdanong buluhaton.