Himoang Bug-os-Panahong Pag-alagad nga Imong Karera
1 Sa gidapit ni Jesus ang uban nga mahimong iyang mga sumusunod, iyang gipatin-aw nga kini naglakip sa pagmantala sa halayong dapit sa Gingharian sa Diyos. (Luc. 9:57-62) Bisan tuod ang atong pagsanong niining imbitasyona dili magkinahanglan ug kausaban sa trabaho, tino nga kini nagalangkit ug kausaban sa mga butang ginauna. Kinahanglan tang “imantala sa halayong dapit ang mga pagkahalangdon” ni Jehova, nga nagalakip sa paghimog mga tinun-an. (1 Ped. 2:9; Mat. 28:19, 20) Ang tanan nga napahinungod kang Jehova, diay, mosentro sa ilang mga kinabuhi sa ministeryo. Daghan ang nakaarang sa paghimo sa bug-os-panahong pag-alagad nga ilang karera.—2 Cor. 4:1, 7.
MAGANTIHONG PAAGI SA KINABUHI
2 Sa paglingi sa 54 ka tuig sa bug-os-panahong pag-alagad, usa ka payunir natukmod sa pagsulat: “Ang mga kangaya nga gihatag ni Jehova nagpaway-bale gayod sa mga kasakitan. Kon ako hatagan ug higayon sa pagkinabuhi pag-usab sa akong kinabuhi, sa kahinangop gugolon ko ang akong tanang panahon sa pagdayeg sa dakong Diyos, si Jehova.” Walay kalibotanong karera ang makahatag ug dulot pansulod nga katagbawan ug kalipay nga mosangpot gikan sa maong kurso. Ang pagpangagpas sa kinabuhi sa bug-os-panahong pag-alagad maoy pagpasundayag sa diyosnong debosyon nga mopatunghag mga ganti karon ug sa ugma-damlag.—1 Tim. 4:8.
3 Ang karera diha sa bug-os-panahong ministeryo magpatunghag kalipay kay kini nagalangkit man ug dakong pagpanghatag. (Buh. 20:35) Ang panaghigala uban kang Jehova ug sa iyang Anak maugmad ug mapalig-on pinaagig bug-os pang pagkalambigit sa intereses sa Gingharian. (Luc. 16:9; 1 Cor. 15:58) Matagamtam ang katagbawan ug mahinlong tanlag tungod kay ikaw nagabuhat nga tibuok-kalag sumala sa imong mga kahimtang. Ang imong mas disiplinadong paagi sa kinabuhi magpaarang kanimo sa dugang pagbuhat diha sa pagsunod sa sugo ni Kristo sa ‘pagpangita una sa gingharian.’—Mat. 6:33.
MAGMAUSWAGON SA IMONG MINISTERYO
4 Ang usa ka karera nagalangkit ug pangagpas sa mauswagong kahimoan diha sa pipila ka nataran o tumong. Ang mauswagong kahimoan importante sa paglahutay ug sa pagmentinar sa kangaya ug kasibot ingong payunir. Si Jehova nagatagana ug espirituwal nga edukasyon diha sa mga miting ug mga asembliya. Dugang niini mao ang mga tigom uban sa mga ansiyano sa Enero ug uban sa magtatan-aw sa sirkito sa dihang siya moduaw. Sa semana sa sirkitong asembliya, ang usa ka espesyal nga sesyon gihikay alang sa mga payunir. Ikaw ba nagahimog mga nota ug sa matanlagon nagapadapat sa mga sugyot nga gihatag sa maong mga miting?
5 Kon ikaw wala magdumalag mauswagong pagtuon sa Bibliya, himoon mo ba kini ingong imong tumong? Mapauswag mo ba ang imong mga pasiuna diha sa mga ganghaan o ang paagi sa imong pagbuntog sa mga pagsupak? Ikaw ba naghunahuna sa pagbalhin aron motabang sa usa ka kongregasyon nga nagakinahanglan ug tabang? Sa pagtagad niining mga butanga ikaw makaarang sa pag-uswag sa imong karera.
6 Kon ikaw sa tininuod nagahunahuna sa pagduyog sa buluhatong payunir, padayon sa pag-ampo kang Jehova sa maong butang. (Mat. 7:7, 8) Daghan ang nakaugmad ug pagsalig kang Jehova pinaagig pagkahimong mga katabang nga payunir una.
7 Dili tungod sa pipila talagsaong katakos ang magpaarang sa usa ka tawo sa pagpayunir. Ang usa ka tiunay nga gugma sa Diyos ug sa mga tawo, uban sa kahinangop sa paghimog personal nga mga sakripisyo, ang gikinahanglan. (Mat. 22:37-39; Filip. 4:13) Busa pangagpas ug pagpabilin sa payunir nga ministeryo ingong imong karera!