Ang Tanan sa Kongregasyon Makapakigbahin sa Paghimog Bag-ong mga Tinun-an
1 Ang usa ka tawo dili mahimong bag-ong tinun-an pinaagi sa mga paningkamot sa usa lang ka tawo. Si Jehova makagamit sa tanan niyang “mga isigkamagbubuhat” sa pagtabang sa mga estudyante sa Bibliya nga motubo sa espirituwal. (1 Cor. 3:6-9) Ang matag usa kanato makatabang sa mga bag-ohan dili lamang pinaagi sa atong kinasingkasing nga mga komento diha sa Kristohanong mga tigom kondili pinaagi usab sa atong maayong panggawi, nga maghatag ug puwersadong pamatuod nga ang espiritu sa Diyos nagalihok sa atong kinabuhi. (Juan 13:35; Gal. 5:22, 23; Efe. 4:22, 23) Unsa pay dugang mahimo sa pagtabang sa mga bag-ohan?
2 Ingong Kongregasyon: Kitang tanan makapakitag interes niadtong nagsugod sa pagtambong sa mga tigom pinaagi sa mabinationg pagtimbaya ug pagpakig-estorya kanila antes ug human sa panagkatigom. Namalandong sa iyang unang pagtambong sa tigom sa kongregasyon, usa ka lalaki miingon: “Nakahimamat akog mas daghang mahigugmaon gayong mga tawo, nga dili gayod nako kaila, sa usa lang ka adlaw kay sa mga nahimamat nako sa simbahan nga akong gitambongan sukad sa akong pagkabata. Dayag kaayo nga akong nakaplagan ang kamatuoran.” Siya nabawtismohan pito ka bulan human sa iyang unang pagtambong ug tigom.
3 Sinserong dayega ang estudyante sa Bibliya sa dihang makahimo siyag espirituwal nga pag-uswag. Siya ba nag-antos tungod sa pagsupak? Regular na ba siyang nagtambongan sa mga tigom? Nangarisgar ba siya aron mokomento? Nagpaenrol na ba siya sa Teokratikanhong Tunghaan sa Ministeryo o nagsugod na ba siya sa pagpakigbahin sa ministeryo? Dayega siya tungod sa pag-uswag nga iyang nahimo. Kini makapadasig ug makapalig-on kaniya.—Prov. 25:11.
4 Ingong Tagdumala sa Pagtuon sa Bibliya: Ang pipila ka magmamantala nakatabang sa ilang mga ginatun-an sa Bibliya sa pag-ilaila sa tagsatagsa ka membro sa kongregasyon pinaagi sa paghangyo sa ubang mga magmamantala sa pagduyog kanila sa pagtuon. Dapita dayon ang ginatun-an sa pagtambong sa mga tigom sa kongregasyon. Sa dihang mosugod na siya sa pagtambong sa mga tigom, paneguroa nga ipailaila siya sa uban. Siya ba nakigbisog sa pagbuntog sa usa ka bisyo, sama sa pagtabako? Aduna bay membro sa iyang panimalay nga supak sa iyang pagtuon? Lagmit makakuha siyag kaayohan pinaagi sa pagpakigsulti sa usa ka magmamantala nga nakabuntog sa susamang suliran.—1 Ped. 5:9.
5 Ang mga bag-ohan nanginahanglan ug espirituwal nga pagpaluyo gikan sa kongregasyon. Ang tanan makatabang kanila nga mouswag pinaagi sa pagpasundayag ug sinserong personal nga interes.