Pangutana

◼ Unsay mga kapeligrohan sa pagpakigkomunikar sa usa ka tawo nga wala nato mailhi diha sa Internet?

Adunay daghang bahin diha sa Internet nga gidisenyo aron magkakomunikar ang mga tawo. Makabutang kag personal nga mga impormasyon diha niana, nga mahimong maglakip sa mga hulagway ug uban pa. Ang mga tawo nga makakita sa maong mga impormasyon makakontak na kanimo. Kini popular kaayo taliwala sa mga batan-on, ug ang pipila ka batan-on diha sa kongregasyon naggamit niini aron makakomunikar sa uban nga nagpailang mga Saksi ni Jehova.

Dali ra kaayong ikatago sa usa nga atong makaila diha sa Internet ang iyang tinuod nga pagkatawo, ang iyang relasyon kang Jehova, ug ang iyang mga motibo. (Sal. 26:4) Ang usa ka tawo nga nagpaila nga usa ka Saksi ni Jehova mahimong dili diay magtutuo, napalagpot, o usa pa gani ka aktibong apostata. (Gal. 2:4) Sumala sa mga taho, daghang tig-among-among ug mga bata ang naggamit sa Internet aron mangitag biktimahon.

Bisan pag nakaseguro kita nga ang atong gikakomunikar adunay maayong baroganan sa kongregasyon, ang pagpakig-estorya diha sa Internet mahimong dali rang mosimang ngadto sa dili-maayong mga ulohan. Kini tungod kay ang mga tawo morag dili kaayo managana sa pagpakigsulti sa uban nga wala sa ilang atubangan. Mahimong maghunahuna usab sila nga ang pagpakigkomunikar diha sa Internet maoy usa ka pribadong butang ug mobati sila nga bisan unsay ilang isulti dili kini mahibaloan sa uban, sama sa ilang mga ginikanan o sa mga ansiyano. Ikasubo nga daghang batan-on gikan sa Kristohanong mga panimalay ang nalit-agan ug nalangkit sa malaw-ay nga sinultihan. (Efe. 5:3, 4; Col. 3:8) Ang uban nagbutang pa ganig makapukaw sa sekso nga mga hulagway ug law-ay nga mga angga, o madayganon sa sekso nga mga video nga musika diha sa ilang kompiyuter.

Tungod niini, kinahanglang susihon sa mga ginikanan kon unsay gihimo sa ilang mga anak diha sa kompiyuter. (Prov. 29:15) Peligroso gayod ang pagdapit ug usa ka di-kaila diha sa atong panimalay o tugotan siyang makig-uban sa atong mga anak nga sila ra. Sa samang paagi, peligroso usab nga kita o ang atong mga anak makighigala sa mga di-kaila diha sa Internet, bisan pag magpaila sila nga mga Saksi ni Jehova.—Prov. 22:3.