Makaiikag nga mga Kausaban sa Ang Bantayanang Torre!
1 Sayo niining tuiga, ang mga kongregasyon nakadawat ug usa ka makaiikag nga pahibalo: Sugod sa Enero 2008, ang Bantayanang Torre aduna nay duha ka edisyon, ang usa para sa publiko ug ang lain para kanatong mga Saksi ni Jehova! Tingali mangutana kamo: ‘Unsay mga kalainan niining duha ka magasin? Unsay mga bentaha niini? Unsay bag-ong mga bahin diha sa maong mga edisyon?’
2 Ang mga Kalainan: Ang petsa uno nga gula mailhang Edisyon Para sa Publiko. Ang tanang artikulo niining gulaa patikon alang sa kaayohan sa publiko. Ang petsa kinse nga gula mailhang Tun-anang Edisyon ug kini dili itanyag sa kanataran. Kini maundan sa tanang tun-anang artikulo para sa usa ka bulan ug uban pang mga artikulo nga mapuslanon alang sa dedikadong mga Kristohanon. Ang Edisyon Para sa Publiko sa Ang Bantayanang Torre makapaikag gihapon sa mga Saksi apan mas makapaikag kini sa mga dili Saksi nga may pagtahod ug pagtuo sa Bibliya. Sa laing bahin, ang Pagmata! padayong patikon para sa mas daghang magbabasa, nga naglakip sa mga maduhaduhaon bahin sa relihiyon ug sa mga dili Kristohanon.
3 Mga Bentaha: Sa Tun-anang Edisyon, dili na kinahanglang ipatin-aw pa ang mga terminong sama sa “payunir” kay nasabtan na man kini sa mga Saksi. Kining edisyona naundan usab ug tukmang mga impormasyon nga ilabinang giandam para sa mga Saksi ni Jehova ug sa mga gitun-an sa Bibliya nga mauswagon sa espirituwal. Unsa usay mga bentaha sa Edisyon Para sa Publiko? Tungod kay ang mga ulohan ug ang estilo sa pagsulat ipahiuyon man sa publiko, ang mga dili Saksi malingaw gayod sa pagbasa sa tibuok magasin. Siyempre, ang tanang Saksi ni Jehova makakuha gihapon ug kaayohan sa pagbasa sa matag gula. Kay usa na man lang ka Bantayanang Torre ug usa ka Pagmata! ang atong itanyag sa kanataran matag bulan, usa ka bulan gayod natong magamit ang makapainteres nga mga presentasyon.
4 Bag-ong mga Bahin: Adunay makaiikag nga bag-ong mga bahin ang giplano alang sa Edisyon Para sa Publiko nga Ang Bantayanang Torre. Ang usa niini maghisgot sa paninugdang mga pagtulon-an sa Kasulatan sa yano kaayong paagi. Ang lain magpakita kon sa unsang paagi makatabang ang Bibliya sa mga pamilya. Adunay mga artikulo para sa mga batan-on aron ilang matun-an ang Bibliya. Sa matag gula adunay artikulo nga maghisgot ug pipila ka teksto sa Bibliya nga magtudlo kanato bahin kang Jehova.
5 Kami nanghinaot nga panalanginan ni Jehova kining bag-ong kahikayan bahin sa Ang Bantayanang Torre. Hinaot kining magasina, ug ang Pagmata!, makaabot sa daghan pang takos nga mga tawo uban ang maayong balita.—Mat. 10:11.